مانزۋرا ماتكارىمقىزى وبلىستىق قازاقستان حالقى اسسامبلەياسى ۇيىمداستىرعان قاي ءىس-شارانىڭ دا بەل ورتاسىندا جۇرەدى. قحا جانىنداعى انالار كەڭەسىنىڭ بەلسەندىسى رەتىندە جاعدايى تومەن جانە كوپبالالى وتباسىلارىنا قايىرىمدىلىق جاساۋدان قالىس قالعان كەزى جوق. بالالار مەرەكەسىندە «اتامەكەن» وتباسىلىق ۇلگىدەگى بالالار اۋىلىنا بارىپ, سىي-سىياپات ۇيلەستىرۋدى دە داستۇرگە اينالدىرعان.
«جالپى, قايىرىمدىلىق دەگەن ەتنوس پەن شەكاراعا بولىنبەيتىن, جەر بەتىندەگى ادامزات اتاۋلىعا ورتاق قاسيەت قوي. ءبىزدىڭ بالا كۇنىمىز بەن جاستىق داۋىرىمىزدە قارتتارعا كومەكتەسۋ, قينالعان جانعا جاردەم جاساۋ قالىپتى قۇبىلىس بولاتىن. اكە-شەشەمىز, اينالامىز بىزگە سونداي تاربيە بەرگەن. ءوزىمنىڭ ويىم – جاقسىلىق جارناماسىز جاسالۋى كەرەك. «وڭ قولىڭنىڭ بەرگەنىن سول قولىڭ كورمەسىن» دەگەن قاعيدانى ۇستانامىن», دەيدى مانزۋرا ماتكارىمقىزى.
وتكەن عاسىردا بۇقارا وڭىرىنەن كەلگەن اتالارى وسى سىر بويىنا قونىس تەۋىپتى. تۇركىستان توپىراعىندا دۇنيەگە كەلگەن اكەسى ماتكارىم قىزىلوردادا وسكەن اناسى سارۆارمەن باس قۇراپ, ولاردىڭ 10 بالاسى وسى توپىراقتا ءوسىپ-ءوندى. 1978 جىلى ورتا مەكتەپتى بىتىرگەن سوڭ سامارقانداعى كووپەراتيۆ ينستيتۋتىنا ءتۇستى. ونى تامامداعاننان كەيىن جولداما بويىنشا قىزىلورداعا ورالىپ, وندىرىستىك تاۋارلار بىرلەستىگى مەكەمەسىنە جۇمىسقا ورنالاستى. زەينەتكە «Best service» مەكەمەسىنەن شىقتى. قازاقستان حالقى اسسامبلەياسى قۇرىلعالى بەرى ونىڭ قىزمەتىنە بەلسەنە ارالاسىپ كەلەدى.
«قوعامدىق كەلىسىم» مەكەمەسىنىڭ تاۋەلسىزدىگىمىزدىڭ 30 جىلدىعىنا ارنالعان «30 جىلعا – 30 تۇلعا» باستاماسى اياسىندا ەلدىڭ ءوسىپ-وركەندەۋىنە سۇبەلى ۇلەس قوسقان ازاماتتار قاتارىندا ەڭبەگى كوپكە تانىستىرىلدى.
وزبەك ەتنومادەني بىرلەستىگى قۇرىلعالى قىزمەت جاساپ كەلە جاتقان كەيىپكەرىمىز باۋىرلاس ەكى ەلدىڭ تاريحى مەن تانىمى استاسىپ جاتقانىن ايتادى. اسىرەسە قازاق پەن وزبەكتىڭ ماقال-ماتەلدەرىنىڭ ايتىلۋى دا, ماعىناسى دا ماندەس. «اتاڭنىڭ بالاسى بولما, ادامنىڭ بالاسى بول» دەگەن قازاقى تاربيەنى «وتانگ بولاسي بўلما, ودام بولاسي بўل» دەيتىن وزبەك شاڭىراعىنان دا كورەسىز. قازىر قاحار داداشەۆ باسقاراتىن وزبەك ەتنومادەني بىرلەستىگى باۋىرلاس ەلدىڭ دوستىعىن بەكىتە تۇسەتىن ءىس-شارالاردى ءجيى ۇيىمداستىرىپ كەلەدى.
«قازاقستان حالقى اسسامبلەياسىنا 25 جىل», «دۋستليك» وزبەك ەتنومادەني بىرلەستىگىنىڭ «دۋستليك» مەدالىمەن ماراپاتتالعان مانزۋرا ماتكارىمقىزىنىڭ جاستار تاربيەسىندەگى ورنى بولەك.
«جاستاردىڭ بىلىمىمەن قاتار تاربيەسىنە دە ءمان بەرۋىمىز كەرەك. پاندەميا كەزىندە 6 بەكەتتە 120 ادامعا تەگىن تۇسكى اس ۇيىمداستىرىپ, ارىس قالاسىنداعى جارىلىستان كەيىن قۇرىلىس ماتەريالدارىن جىبەرىپ, جاردەم كورسەتتىك. ماقتاارال ءوڭىرىن سۋ باسقاندا دا قاراپ وتىرا المادىق, كومەگىمىزدى بەردىك. بىلتىر ەلىمىزدىڭ سولتۇستىگىندە قارعىن سۋدان زارداپ شەككەن اعايىنعا جاردەم جاسادىق. ءار مەرەكە سايىن شاعىن فۋتبولدان تۋرنيرلەر وتكىزىپ, جاڭاجىلدىق بالالار ەرتەڭگىلىگىن ۇيىمداستىرىپ كەلەمىز. وسىنىڭ ءبارىن اتىمىزدى شىعارىپ, اتاعىمىزدى وزدىرۋ ءۇشىن ەمەس, كەيىنگى جاستارعا ۇلگى بولسىن دەگەن نيەتپەن جاساپ وتىرمىز. كەيىنگى تولقىنعا ورتاق وتان ءۇشىن وسىنداي ساتتە جۇدىرىقتاي جۇمىلا ءبىلۋ كەرەكتىگىن كورسەتكىمىز كەلدى», دەيدى مانزۋرا ماتكارىمقىزى.
قىزىلوردا
