اقپاراتتار اعىنى

*ەل ەكونوميكاسىن بانك­تەر تاراپىنان نەسيەلەندىرۋ كولەمى بىلتىر 7,2 پايىزعا ءوستى. ۇلتتىق بانكتىڭ حابارلاۋىنشا, سەكتوردىڭ جيىنتىق اكتيۆتەرى 2014 جىلى 17,9 پايىزعا كوبەيىپ, 18 239,3 ملرد. تەڭگەنى قۇراعان. *مەملەكەتىمىزدە ميك­رو­قارجى نارىعىندا 100 ملرد. تەڭگەگە جۋىق نەسيە بەرىلگەن. ميكروقارجى ۇيىمدارى قاۋ­ىمداستىعىنىڭ ديرەكتورى اناتولي گلۋحوۆتىڭ ايتۋىنشا, ەلىمىز بويىنشا ۇسىنىلعان شاعىن نەسيەلەردىڭ 60 پايىزى ميكروقارجى ۇيىمدارىنا تيەسىلى. *بيىل استانادا 108,6 شاقىرىم جول سالىنىپ, جوندەلەدى. قالالىق جولاۋشىلار كولىگى جانە اۆتوموبيل جولدارى باسقارماسى اتاپ كورسەتكەندەي, ەلورداداعى 11 تۇرعىن الابىندا جالپى ۇزىندىعى 24 شاقىرىمدى قۇرايتىن 30 كوشە سالىنادى. *تالدىقورعاندا جاڭا پوشتا بولىمشەسى پايدالانۋعا بەرىلدى. الماتى وبلىستىق اكىمدىگى ءباسپاسوز قىزمەتىنىڭ دەرەگىنشە, بۇل «قازپوشتا» اق №8 بايلانىس بولىمشەسىندە حالىققا زەينەتاقى الۋ, كوممۋنالدىق تولەمدەر, اقشالاي اۋدارىمدار جاساۋ, سالىق تولەۋ, تاعى باسقا دا كوپتەگەن قىزمەت ءتۇرى ۇسىنىلادى. سونداي-اق, وبلىس اۋماعىندا ەندى ەنگىزىلىپ جاتقان پوستامات العاش رەت وسى بولىمشەگە ورناتىلماق. *ورداباسى اۋدانىندا جاڭا ەمحانا قاتارعا قوسىلدى. وڭتۇستىك قازاقستان وبلىستىق اكىمدىگىنىڭ ءباسپاسوز قىزمەتى اۋدانداعى قاجىمۇقان ەلدى مەكەنىندە اشىلعان جاڭا دارىگەرلىك امبۋلاتورياعا 86 ملن. تەڭگە جۇمسالعانىن جەتكىزدى. مۇندا مەديتسينا قىزمەتكەرلەرىنە دە, ەم الۋشىلارعا دا بارلىق جاعداي جاسالعان. *«كونە تاراز» جوباسى مىڭداعان تۇرعىنداردى جۇمىسپەن قامتيدى. جامبىل وبلىستىق اكىمدىگى ءباسپاسوز قىزمەتىنىڭ مالىمەتىنە قا­را­عاندا, ۇستىمىزدەگى جىلدىڭ قىركۇيەگىندە قازاق حاندى­عىنىڭ 550 جىلدىعىن تويلاۋ كەزىندە «كونە تاراز» سايا­باعىنىڭ العاشقى نىساندارى قوناقتاردى قابىلدايدى. ايتا كەتەيىك, مۇنداعى ارحەو­لوگيالىق زەرتتەۋلەرگە, ەس­كەرتكىشتەردى قالپىنا كەلتى­رۋگە, ينفراقۇرىلىم مەن قۇ­رىلىس جۇمىستارىنا 6 ملرد. تەڭگە جۇمسالماق. *كوكشەتاۋدان اتىراۋ مەن اقتاۋعا قاتىنايتىن قو­سىمشا اۋە رەيستەرى اشىلدى. اقمولا وبلىسى اكىم­دىگىنىڭ ءباسپاسوز قىزمەتى جولاۋشىلار تاسىمالىن «SCAT اۋەكومپانياسى» اق جۇزەگە اسىراتىنىن مالىمدەدى. بۇل ەل ازاماتتارىنىڭ اقتاۋ مەن اتىراۋ اەروپورتتارى ارقىلى سولتۇستىك كاۆكاز وڭىرىنە, رەسەيدىڭ وڭتۇستىگىنە, تۇركيا مەن باسقا دا ەلدەرگە ۇشۋعا مۇمكىندىك بەرەدى. حابارلار ۇكىمەت, وبلىستىق اكىمدىكتەر سايتتارى, «قازاقپارات» اگەنتتىگى جانە nur.kz دەرەكتەرى بويىنشا دايىندالدى.