قارجى نارىعىنداعى جاعداي قالىپتى

ۇلتتىق بانك كەشە ەلىمىزدىڭ قارجى نارىعىنداعى احۋال تۋرالى مالىمەتتەردى جاريا­لادى. ارينە, بۇگىنگىدەي جاھان ەكونوميكاسى شاتقاياقتاپ, قارجىلىق قال-جايى قۇبىلمالى كۇي كەشىپ تۇرعان كەزەڭدە ەلدەگى قارجىلىق احۋالدىڭ سونشالىق جاعىمدى كورسەتكىشتەرمەن ورنەكتەلۋى ەكىتالاي. دەگەنمەن, شۇكىر, ۇلتتىق بانك دەرەكتەرى دەگبىردى قاشىراتىنداي ەمەس ەكەن. كەرىسىنشە, الەمدى ابىگەرگە سالعان داعدارىس كەزىندە دە ەلىمىزدىڭ «ەسەبى تۇگەل» ەكەنىن ەسكە سالادى. كورسەتكىشتەر «بوركىمىزدى اسپانعا اتاتىنداي» ءسۇيىنشى ساندار بولماسا دا, قازاقى «تاۋبەمىزدى» تىلگە تيەك ەتەتىندەي. ايتالىق, وتكەن جىلدىڭ قورىتىندىلارى بويىنشا جىلدىق ينفلياتسيا 7,4 پايىزدى, قۇرادى. ال, ونىڭ الدىڭعى جىلدا بۇل 4,8 پايىز بولاتىن. بىراق بۇل جەردە جاھاندىق جاعدايدى ەسكەرىپ قاراعان ءجون. نەگىزىندە, 2014 جىلى ينفلياتسيا دەڭگەيىنىڭ ءوسۋى بىرنەشە فاكتورلارعا بايلانىستى بولدى. ماسەلەن, 2014 جىلعى ءبىرىنشى جارتىجىلدىقتا اقپانداعى ۇلتتىق ۆاليۋتانىڭ ايىرباستاۋ باعامىن تۇزەتۋگە جانە وعان بايلانىستى يمپورتتالاتىن تاۋارلاردىڭ قىمباتتاۋىنا, سونداي-اق, ماۋسىمدىق فاكتورلارعا بايلانىستى دا ينفلياتسيا ءوستى. ال ەكىنشى جارتىجىلدىقتا تامىز ايىنداعى ىشكى نارىقتا بەنزين مەن ديزەل وتىنى باعاسىنىڭ وسۋىنە, سونداي-اق, تابيعي مونوپوليالار كاسىپورىندارىنىڭ قىزمەتتەرىنە باعالاردىڭ وسۋىنە بايلانىستى ورىن الدى. دەسە دە, ۇلتتىق بانك ينفلياتسيانى 5-8 پايىز ماقساتتى دالىزدە ساقتاۋ بويىنشا شارالار قابىلداۋدى جالعاستىرۋدا. ال ەندى تولەم بالانسى جانە جالپى سىرتقى بورىش جايىنا توقتالايىق. وتكەن جىلعى 9 ايدىڭ ناتيجەلەرى بويىنشا اعىمداعى وپەراتسيالار شوتىنىڭ وڭ سالدوسى شامامەن 5,2 ملرد. اقش دوللارىن نەمەسە ءىجو-ءنىڭ 3,6 پايىزىن قۇراعان. ۇلتتىق بانكتىڭ ءباسپاسوز قىزمەتى تاراتقان مالىمەتتەرگە سۇيەنسەك, اعىمداعى وپەراتسيالار شوتىنىڭ 2013 جىلدىڭ وسىنداي كەزەڭىمەن سالىستىرعاندا سالىستىرمالى تۇردە جاقسارۋى تاۋارلار يمپورتىنىڭ ايتارلىقتاي جوعارى قارقىنمەن قىسقارۋى ناتيجەسىندە ساۋدا بالانسى ءپروفيتسيتىنىڭ 30,0 ملرد. اقش دوللارىنا دەيىن ۇلعايۋى ەسەبىنەن بولعان. ال تاۋارلار ەكسپورتى 2,6 پايىزعا تومەندەي وتىرىپ, 61,8 ملرد. اقش دوللارىن قۇراعان. يمپورت 14,4 پايىزعا, 31,8 ملرد. اقش دوللارىنا دەيىن قىسقاردى. ەلىمىزدىڭ سىرتقى قارىزى 2014 جىلعى 30 قىركۇيەكتە 155,2 ملرد. اقش دوللارىن كورسەتتى. سىرتقى قارىز قۇرىلىمىندا بانك سەكتورىنىڭ ۇلەسى 7 پايىزدى, ياعني 10,6 ملرد. اقش دوللارىن قۇراعان. قازىرگى كۇنى كوپتىڭ كوڭىلىندە جۇرگەن تۇيتكىلدى ماسەلەنىڭ ءبىرى ايىرباستاۋ باعامى تۋرالى دەرەكتەر. ال ۇلتتىق بانكتىڭ حابارلاۋىنشا, قازىرگى ۋاقىتتا تەڭگەنىڭ اقش دوللارىنا قاتىستى ايىرباستاۋ باعامى تۇراقتى بولىپ قالۋدا, ونىڭ 2014 جىلعى اقپاننىڭ ورتاسىنان باستاپ اياعىنا دەيىنگى اۋىتقۋلارى 1 اقش دوللارى ءۇشىن 180,87-184,95 تەڭگەنى قۇرادى. 2014 جىلعى جەلتوقساننىڭ اياعىندا ۇلتتىق بانكتىڭ رەسمي باعامى 1 اقش دوللارى ءۇشىن 182,35 تەڭگە بولدى. سونىمەن قاتار, دەپوزيت نارىعىندا ءوسىم بار. ايتالىق, رەزيدەنتتەردىڭ بانكتەردەگى دەپوزيتتەرىنىڭ كولەمى 2014 جىلى 15,9 پايىزعا, 11 694, 0 ملرد. تەڭگەگە دەيىن ءوستى. ۇلتتىق ۆاليۋ­تا­داعى دەپوزيتتەر 17,7 پايىزعا, 5 197,7 ملرد. تەڭگەگە تومەندەدى, شەتەل ۆاليۋتاسىنداعى دەپوزيتتەر 72,2 پايىزعا, 6 496,3 ملرد. تەڭگەگە دەيىن كوبەيدى. حالىقتىڭ بانكتەردەگى سالىمدارى (رەزيدەنت ەمەستەردى ەسەپتەگەندە) 2014 جىلى 12,5 پايىزعا, 4 438,1 ملرد. تەڭگەگە دەيىن ۇلعايعان. نەسيە نارىعىنداعى جاعداي دا قالىپتى. بانكتەردىڭ ەكونوميكانى نەسيەلەۋىنىڭ جالپى كولەمى 2014 جىلى 7,2 پايىزعا ۇلعايىپ, 12 106,1 ملرد. تەڭگە بولدى. ونىڭ 14,8 پايىزىن نەمەسە 1 787,8 ملرد. تەڭگەنى شاعىن بيزنەسكە بەرىلگەن نەسيەلەر قۇرايدى. ۇلتتىق ۆاليۋتاداعى نەسيەلەر كولەمى 7,9 پايىزعا 8 565,5 ملرد. تەڭگەگە دەيىن, شەتەل ۆاليۋتاسىنداعى نەسيەلەر كولەمى 5,5 پايىزعا 3 540,6 ملرد. تەڭگەگە دەيىن ۇلعايعان. تەڭگەدەگى نەسيەلەردىڭ ۇلەس سالماعى 2014 جىلعى جەلتوقساندا 2013 جىلعى جەلتوقسانمەن سالىستىرعاندا 70,3 پايىزدان 70,8 پايىزعا دەيىن كوتەرىلىپتى. ەندى حالىقارالىق رەزەرۆتەرى جانە اقشا اگرەگاتتارى تۋرالى ايتساق, 2014 جىلى ۇلتتىق بانكتىڭ جالپى حالىقارالىق رەزەرۆتەرى 17,0 پايىزعا, 28,9 ملرد. اقش دوللارىنا دەيىن ۇلعايدى, بۇل تاۋارلار مەن كورسەتىلەتىن قىزمەتتەر يمپورتىنىڭ 6 ايىن قۇرايدى. ۇلت­تىق قوردىڭ اكتيۆتەرى 2014 جىلى 3,9 پايىزعا ۇل­عايىپ, الدىن الا دەرەكتەر بويىنشا 73,6 ملرد. اقش دوللارىن قۇرادى. وتكەن جىلى ۇلتتىق قوردىڭ اكتيۆتەرىن قوسا العاندا, تۇتاس­تاي العاندا ەلدىڭ حالىقارالىق رەزەرۆتەرى 7,3 پاي­ىزعا, 102,5 ملرد. اقش دوللارىنا دەيىن ۇلعايدى. اقشا بازاسى 2014 جىلى 20,8 پايىزعا كەڭەيىپ, 3 413,6 ملرد. تەڭگەنى قۇرادى. اقشا بازاسىنىڭ كەڭەيۋىنە نەگىزىنەن تازا حالىق­ارالىق رەزەرۆتەردىڭ ۇلعايۋى ىقپال ەتتى. 2014 جىلى اقشا ماسساسى بانك جۇيەسىنىڭ سىرتقى, سول سياقتى, ىشكى اكتيۆتەرىنىڭ ءوسۋى ەسەبىنەن 10,5 پايىزعا, 12 816,3 ملرد. تەڭگەگە دەيىن ۇلعايدى. زەينەتاقى جۇيەسىندە دە جۇمىس جۇيەلى. مەملەكەت باسشىسىنىڭ تاپسىرماسى بويىنشا 2013 جىلعى ماۋسىمدا قازاقستاندا بىرىڭعاي جيناقتاۋشى زەينەتاقى قورى قۇرىلعانى بەلگىلى. ال وتكەن جىلى ونداعى كىرىس 6,3 پايىزعا جەتكەن. سالىمشىلاردىڭ زەينەتاقى جيناقتارى 2014 جىلدىڭ باسىنان بەرى 784,4 ملرد. تەڭگەگە ۇلعايا وتىرىپ, 2015 جىلعى 1 قاڭتارداعى جاعداي بويىنشا 4 517,8 ملرد. تەڭگەنى قۇراعان. دينارا بىتىكوۆا, «ەگەمەن قازاقستان».