فوتو: boxemag.com
شاۆكات راحمونوۆتىڭ مەنەدجەرى سايات ءابدىراحمانوۆ ونىڭ تيتۋلدىق جەكپە-جەكتەن باس تارتۋىنا جاراقاتى سەبەپ بولعانىن اتاپ ءوتتى.
«UFC كانادادا وتكىزەتىن كەشىندە تاعى ءبىر تيتۋلدىق جەكپە-جەك ۇيىمداستىرۋدى ءجون كورىپ, بىزگە سۇراۋ سالدى. بەلال مۋحاممادقا قارسى كۇرەسۋدى ۇسىندى. شاۆكات جاراقاتىن جەدەل ەمدەۋ ءۇشىن قولدان كەلگەنىن ايانبادى. دەسە دە 100 پايىز دايىن بولماعان سوڭ, ماڭىزدى تيتۋلدىق جەكپە-جەكتەن باس تارتۋعا تۋرا كەلدى», دەپ ءتۇسىندىردى سايات ءابدىراحمانوۆ.
ول UFC ءپروموۋشنى شاۆكاتتىڭ بۇل جاۋابىن قالىپتى قابىلداعانىن, كەلەسى رەتتە سەگىزبۇرىشقا شىعاتىن جاۋىنگەر وتانداسىمىز بولاتىنىن جەتكىزدى.
ەسكە سالايىق, بۇعان دەيىن بەلال مۇحاممەد تە جاراقاتىنا بايلانىستى UFC 310 تۋرنيرىندە شاۆكات راحمونوۆپەن جۇدىرىقتاسۋدان باس تارتقان بولاتىن. ونىڭ ورنىنا سول كەزدە جەڭىلمەگەن يرلانديالىق يان ماچادو گارري شىققان ەدى. يان ماچادو گارري UFC 310 ءتۋرنيرىنىڭ سوڭعى كەزەڭىندە شاۆكات راحمونوۆتى قىلقىندىرۋ ءادىسى بويىنشا قيىندىققا ۇشىراتقان. سول جولى وتانداسىمىز ۇپاي سانى بويىنشا جەڭىسكە جەتتى. بۇل شاۆكاتتىڭ مەرزىمىنەن بۇرىن جەڭبەگەن العاشقى جەكپە-جەگى رەتىندە تىركەلدى.
