ونكولوگيالىق ناۋقاستاردى ەمدەۋدىڭ جاڭا ءادىسى

الماتىدا قالالىق دەنساۋلىق ساقتاۋ باسقارماسى, «قاتەرلى ىسىككە قارسى بىرگە» قوعامدىق قورى, الماتى ونكولوگيالىق ورتالىعى مەن سالاماتتى ءومىر سالتىن قالىپتاستىرۋ الماتى قالالىق ورتالىعىنىڭ قولداۋىمەن 4 اقپان – دۇنيەجۇزىلىك قاتەرلى ىسىككە قارسى كۇرەس كۇنىنە وراي بىرقاتار ءىس-شارالار وتكىزىلدى. حالىقارالىق UICC وداعى بەلگىلەگەن بۇل كۇننىڭ ماقساتى – جەر شارى تۇرعىندارىنا اتى جامان اۋرۋ تۋرالى ماعلۇمات بەرۋ, ونى ۋاقتىلى انىقتاپ, ەمدەۋ جانە اۋرۋدىڭ الدىن الۋ. UICC – ونكولوگيالىق اۋرۋلارعا قارسى كۇرەسۋ ماقساتىندا 1933 جىلى قۇرىلعان الەمدەگى ەڭ ءىرى ۇكىمەتتىك ەمەس ۇيىم. اتالعان قوردىڭ جەر شارىنىڭ 120 مەملەكەتىندە 400-دەن استام مەكەمەسى بار. ونىڭ قازاقستانداعى وكىلى – الماتى قالالىق ونكولوگيالىق ورتالىعى مەن «قاتەرلى ىسىككە قارسى بىرگە» قوعامدىق قورى جانە دە ونكولوگيا مەن راديولوگيا قازعي. بۇگىندە ونكولوگيالىق اۋرۋلار تورتكۇل دۇنيەدەگى وزەكتى دە كۇردەلى پروبلەمالاردىڭ بىرىنەن سانالادى. قازاقستاننىڭ كانتسەر-رەگيسترىنىڭ مالىمەتى بويىنشا, جىل سايىن قازاقستاندا 30 مىڭعا جۋىق وبىر اۋرۋى انىقتالىپ, 140 مىڭعا تارتا ناۋقاس ديسپانسەرلىك ەسەپتە تۇرادى. رەسمي دەرەكتەرگە سۇيەنسەك, جىل سايىن ەلىمىزدە 17 مىڭعا جۋىق ادام اسقىنعان اتى جامان اۋرۋدان قايتىس بولادى ەكەن. مىنە, وسى اۋرۋدىڭ الدىن الۋ ماقساتىندا الماتىدا جىل سايىن ءداستۇرلى ءىس-شارالار وتكىزىلەدى. بيىل ونىڭ اۋقىمى كەڭەيتىلگەن. ماسەلەن, 27 قاڭتار مەن 7 اقپان ارالىعىندا الماتى قالاسىنىڭ بارلىق ەمحانالارىندا ونكولوگيالىق اۋرۋلاردىڭ الدىن الۋ بويىنشا ون كۇندىك ءوتتى. وندا الماتى قالاسىنىڭ كەز كەلگەن تۇرعىنى جاس شاماسىنا قاراماي, ءوز ەمحاناسىنا بارىپ, ونكولوگ, ماممولوگ مامانداردان كەڭەستەر الدى, سونىمەن قاتار كورسەتكىشتەرى بار بولعان جاعدايدا دياگنوستيكالىق تەكسەرۋدەن وتۋگە مۇمكىندىكتەر الدى. 31 قاڭتار كۇنى ساعات 14.00-دەن 18.00-گە دەيىن وڭتۇستىك استانانىڭ «مەگا» جانە «ەسەنتاي مولل» ءىرى ساۋدا-ويىن-ساۋىق ورتالىقتارىندا «قاتەرلى ىسىكپەن كۇرەسەيىك» اقپاراتتىق ناۋقان ءوتىپ, شارا بارىسىندا سالاماتتى ءومىر سالتى مەن قاتەرلى ىسىكتىڭ الدىن الۋ جايىندا بۋكلەتتەر, ونكواۋرۋلاردىڭ الدىن الۋ بويىنشا ون كۇندىك تۋرالى پاراقشالار جانە باسقا دا ماتەريالدار تاراتىلدى. سونداي-اق, 4 اقپاندا «ينتەرفاكس-كازاح­ستان» اگەنتتىگىندە الماتى قالاسى دەنساۋ­لىق ساقتاۋ باسقارماسى, الماتى ونكولوگيالىق ور­تالىعى, «قاتەرلى ىسىككە قارسى بىرگە» قوعامدىق قورى جانە سالاماتتى ءومىر سالتىن قالىپتاستىرۋ الماتى قالالىق ورتالىعى باسشىلارىنىڭ قاتىسۋىمەن دۇنيەجۇزىلىك قاتەرلى ىسىككە قارسى كۇرەس كۇنىنە ارنالعان ءباسپاسوز ءماسليحاتى ءوتتى. وندا الماتى ونكولوگيالىق ورتالىعىندا بىلتىر ساۋلەمەن ەمدەۋدى كۇشەيتكىش اپپاراتىمەن جۇزەگە اسىراتىن ەمدەۋدىڭ جاڭا تەحنولوگياسى ەنگىزىلىپ, وسى ادىسپەن بۇگىندە 20 ادام ەمدەلىپ شىققانى ايتىلدى. مۇنداي زاماناۋي تەحنولوگيا تمد ەلدەرىندە جوق. اتالعان تەحنولوگيا ناۋقاستى ەمدەۋ كۇندەرىن قىسقارتىپ, ناتيجەسىن جاقسارتادى. ول ءسۇت بەزى قاتەرلى ىسىگى ينتراوپەراتسيالىق وتا جاساۋ كەزىندە قولدانىلادى. قازىرگى تاڭدا الەمدە جاقسى ناتيجە بەرىپ وتىرعان لاپروسكوپيالىق ەمدەۋ ءادىسى دە ورتالىقتا ءساتتى جۇزەگە اسىرىلىپ كەلەدى. قازىر جاڭا ءادىس 30 شاقتى ادامدى ەمدەۋدە ءوز تيىمدىلىگىن كورسەتكەن. مامانداردىڭ ايتۋىنشا, تىركەلەتىن ناۋقاستار سانىنىڭ ارتۋى ەرتە ساتىدا انىقتاۋدىڭ ناتيجەسى بولىپ وتىر. ماسەلەن, 2014 جىلى قۋىق استى بەزىنىڭ قاتەرلى ىسىگى الماتىدا 7-8-ءشى ورىندا تۇرسا, قازىر 2-ءشى ورىنعا شىققان. بۇل كورسەتكىشتىڭ بىردەن كوتەرىلۋىنىڭ سەبەبى – سكرينينگتىك تەكسەرۋلەردىڭ ارقاسىندا اۋرۋدى ەرتە انىقتاعاننان دەيدى ماماندار. الماتى ونكولوگيالىق ورتالىعىندا 2014 جىلى 26 شاعىن ءينۆازيۆتى وپەراتسيا جاسالدى, دەدى ءباسپاسوز كونفەرەنتسياسىندا الماتى ونكولوگيالىق ورتالىعىنىڭ باس دارىگەرى ديليارا قايداروۆا. مۇنداي وتالار ىشەك, اسقازان, وكپە وبىرىنىڭ باستاپقى كەزەڭىندە ەندوسكوپيالىق تاسىلمەن جاسالادى. ءسۇت بەزى قاتەرلى دەرتىن ەمدەۋدە دە اعزا مۇشەسىن ساقتاپ قالۋعا مۇمكىندىك جوعارى. ەگەر بۇعان دەيىن ءسۇت بەزىن تۇگەل الىپ تاستاساق, قازىر ونى حيرۋرگيالىق جولمەن ساقتاپ قالامىز. ءبىزدىڭ ماماندارىمىز يتاليادا ءبىلىم الىپ كەلگەن. ورتالىق باسشىسىنىڭ ايتۋىنشا, ەل ۇكىمەتتىڭ ونكولوگيالىق باعدارلاماسىنا سايكەس ەلىمىزدە 6 سكرينينگتىك تەكسەرۋ ەنگىزىلگەن. قازاقستان تمد ەلدەرى اراسىندا تەگىن تەكسەرۋگە قارجى ءبولىپ وتىرعان جالعىز مەملەكەت. ايتا كەتەرلىك جاعىمدى جايت, 7 اقپاندا الماتى ونكولوگيالىق ورتالىعىندا ارنايى باق وكىلدەرى ءۇشىن ءداستۇرلى اشىق ەسىك كۇنى ءوتتى. ءىس-شارا بارىسىندا جۋرناليستەر تەكسەرۋدەن ءوتىپ, ونكولوگ مامانداردان كەڭەستەر الىپ, كورسەتكىشتەرى بويىنشا دياگنوستيكالىق زەرتتەۋدەن وتە الدى. سونداي-اق, الماتى قالاسىنىڭ باس ونكولوگى د.قايداروۆانىڭ قاتىسۋىمەن بريفينگ بولدى. گۇلزەينەپ سادىرقىزى, «ەگەمەن قازاقستان».