ءبىراز جىلدان بەرى ايشىقتى ونەرىمەن ءوز جانكۇيەرلەرىن قۋانتىپ جۇرگەن اسا جەڭىل سالماقتاعى اسۋ «زۇلپىقار» الماباەۆ سىن ساعاتتا بىلگەنىنەن جاڭىلدى. لاس-ۆەگاستا 31 جاستاعى قازاق فايتەرى پورتۋگاليالىق مانەل «جۇلدىزدى جىگىت» كاپەمەن كۇش سىناستى. كاپە – كوپتى كورگەن كوكجال. ونىڭ وسى سپورت تۇرىمەن اينالىسىپ جۇرگەنىنە 13 جىلعا جۋىقتادى. كەزىندە KOC پەن Rizin پروموۋشەندەرىنىڭ التىن بەلبەۋىن يەلەنگەن انگولانىڭ تۋماسى بارلىعى 28 جەكپە-جەك وتكىزىپ, سونىڭ 21-ىندە جەڭىسكە جەتتى. 18 كەزدەسۋىن مەرزىمىنەن بۇرىن اياقتادى. وسىدان ءۇش جىلدان اسا ۋاقىت بۇرىن, ءدال وسى شاھاردا ءبىزدىڭ جالعاس جۇماعۇلوۆتى نوكاۋتپەن جەڭدى.
قوس ساڭلاقتىڭ ايقاسىندا كاپەنىڭ باسىمدىعى انىق بايقالدى. ءۇشىنشى راۋندا ول الماباەۆتىڭ كوزىن شۇقىپ الدى. بىراق تورەشى «ەشتەڭە بولعان جوق» دەگەندەي سىڭاي تانىتىپ, جەكپە-جەكتى توقتاتقان جوق. پيرەنەي تۇبەگىنەن كەلگەن تارلان وسى ءساتتى وڭتايلى پايدالانىپ, قانداسىمىزدى تومپەشتەي باستادى. اراعا تورەشى ءتۇسىپ, باسەكەنى توقتاتتى. ءسويتىپ, «جۇلدىزدى جىگىت» جەڭىسكە جەتتى. قاتارىنان 17 كەزدەسۋدى ءوز پايداسىنا شەشىپ, سەگىز جىل بويى ەشكىمگە دەس بەرمەگەن اسۋ بۇل جولى جەڭىلگەنىن مويىندادى. ەگەر «زۇلپىقار» وسى باسەكەدە باسىمدىق تانىتقاندا, چەمپيوندىق اتاق ءۇشىن ايقاسۋى ابدەن مۇمكىن ەدى. وكىنىشكە قاراي, الماباەۆقا ونداي باق بۇيىرمادى.
