اتالعان جارىستا جالعىز التىندى ءجاميليا باقبەرگەنوۆا ولجالادى. قاتىسۋشىلار سانىنىڭ ازدىعىنان 72 كگ سالماق دارەجەسىندەگى باسەكەلەر اينالمالى جۇيە بويىنشا ءوتتى. تۇساۋكەسەر كەزدەسۋىندە ەۋروپا چەمپيوناتىنىڭ تولىق جۇلدە جيىنتىعىنىڭ يەگەرى, ۋكراينالىق اللا بەلينسكايادان باسىم تۇسكەن ول كەلەسى بەلدەسۋدە الەكساندرە يۋنيس گلاۋدەنگە جول بەردى. ودان كەيىن پانامەريكا ويىندارىنىڭ ەكى دۇركىن كۇمىس جۇلدەگەرى, ارگەنتينالىق ليندا ماچۋكۋدى جىققان ءجاميليا البانياداعى رەيتينگتىك جارىستىڭ جەڭىمپازى اتاندى.
اسا اۋىر سالماقتا سايىسقا تۇسكەن ەلميرا سىزدىقوۆا رەسەيلىك ۆالەريا تريفونوۆا مەن رۋمىنيالىق الەكساندرا اندجەليدى ايقىن باسىمدىقپەن ۇتقانىمەن, جارتىلاي فينالدا اقش-تىڭ وكىلى ديمون گۋيلفوردتان ايلاسىن اسىرا المادى. ال قولا مەدال ءۇشىن سايىستا ەلميرا قىتايلىق ءيانلاننىڭ قوس جاۋىرىنىن جەرگە قادادى.
ەركىن كۇرەس شەبەرلەرىنىڭ جارىسىندا 86 كگ سالماقتاعى بولات ساقاەۆ پەن رۇستەم مىرزاعاليەۆ قانا جەڭىس تۇعىرىنا كوتەرىلە الدى. العاشقى اينالىمداردا ءوزىنىڭ كوماندالىق ارىپتەسى دانيار قايسانوۆ پەن قىرعىزستاندىق مۇحاماد ابدوللاەۆتى جەڭگەن بولات جارتىلاي فينالدا گرۋزيالىق تاريەل گاپحرينداشۆيليدى جولىنىن ىعىستىردى. فينالدا امەريكالىق چاندلەر مارستەللەرگە ەسە جىبەرگەن ول كۇمىس مەدالدى موينىنا ءىلدى. ال رۇستەم ءۇشىنشى ورىن ءۇشىن باسەكەدە پولشالىق سەباستيان يازەرجانسكيدى ويسىراتا ۇتتى.
گرەك-ريم كۇرەسى شەبەرلەرى تيراناداعى ءتۋرنيردى ءۇش قولامەن قورىتىندىلادى. ول جۇلدەنىڭ يەگەرلەرى – ەراسىل مامىربەكوۆ پەن ەرسىن ابيىر (55 كگ) جانە باعدات ساباز (67 كگ). ءبىر قۋانتارلىعى, ءۇشىنشى ورىن ءۇشىن تارتىستا قانداستارىمىز ءوز قارسىلاستارىن باس كوتەرتپەي ۇتتى. اتاپ ايتساق, ەراسىل البانيالىق ەندي مۋكانى, ەرسىن قىرعىز ۇلان مۇراتبەك ۇلىن جانە باعدات قىتايلىق لي لەيدى ەركىن ەڭسەردى.
