وسىعان دەيىن وتكىزىلگەن جارمەڭكەلەردە قۇرىلىسشى مەن كوممۋنالدىق سالاعا قاجەتتى ماماندارعا سۇرانىس كوپ بولىپتى. بۇل جولى دا جۇك كولىكتەرى جۇرگىزۋشىلەرىن, قۇرىلىس ماتەريالدارىن دايىندايتىن ەپتى مامانداردى ىزدەگەندەر از ەمەستىگى بايقالادى. ءار مەكەمەدەن كەلگەن وكىلدەر جۇمىس ىزدەگەن جاندارعا كاسىپ جايلى تولىق مالىمەت بەرىپ, ولارعا جاسالاتىن جاعداي تۋرالى دا ايتىپ ءوتتى.
«جارمەڭكەلەرگە ۇنەمى قاتىسىپ, مامانداردى شاقىرامىز. وسى جولى اۆتوكولىك, جول تەگىستەيتىن كولىك جۇرگىزۋشىلەرىن ىزدەپ كەلىپ وتىرمىز. بىزدە جۇمىس ىستەۋگە بار جاعداي جاسالعان. ىنتالى جاستاردى ءارى قاراي وقىپ, ماماندىعىن جەتىلدىرۋگە مۇمكىندىك بەرەمىز», دەيدى «اۆتوموبيل جولدارى باسقارماسى» جشس-نىڭ وكىلى اسەم بايۇلوۆا.
قۇرىلىس ماتەريالدارىن وندىرەتىن «قۇرىلىس» اق وكىلى بەتون جاسايتىن مامان ىزدەپ كەلىپتى. ء«وندىرىس اۆتوماتتاندىرىلعان, جۇمىسشىلاردى تاسىمالداۋ جولعا قويىلعان. جالاقى ۋاقتىلى تولەنەدى, باسقا دا الەۋمەتتىك قولداۋلارىمىز بار», دەيدى ول.
بۇل جولعى جارمەڭكەنىڭ ءبىر ەرەكشەلىگى – زاڭگەرلەر قاتىسۋشىلارعا «قارىزسىز قوعام» جوباسى اياسىندا قارجى ۇنەمدەۋ, نەسيەسىن تولەي الماعاندىقتان بۇعاتتالعان ەسەپ شوتىن قايتا اشۋ, بانكروتتىققا ءوتىنىش بەرۋ بويىنشا تەگىن كەڭەستەر بەردى.
«بىلتىر قالا بويىنشا 2302 ادام قارجى ساۋاتىن ارتتىردى. بيىل دا جالعاساتىن جوبا اياسىندا 3 مىڭنان استام تۇرعىندى وقىتۋ جوسپارلانىپ وتىر. ونىڭ بارىسىندا زاڭگەر, بانكير, باسقا دا سالا وكىلدەرىنەن جاساقتالعان جوبالىق كەڭسە قارىزى كوبەيگەن تۇرعىنداردىڭ كەستەلەرىن جەڭىلدەتىپ, جاعدايلارىنا قاراي وزگەرتىپ بەرەدى», دەيدى «Amanat» پارتياسى قالالىق فيليالىنىڭ اتقارۋشى حاتشىسى گۇلشات مۇساەۆا.
قالالىق جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى كەنجەگۇل قۇراقباەۆانىڭ ايتۋىنشا, مۇنداي جارمەڭكەلەر جىل بويىنا تۇراقتى وتكىزىلەدى.
قىزىلوردا
