فوتا: الماتى قالاسى قوعامدىق دەنساۋلىق ساقتاۋ باسقارماسى ءباسپاسوز قىزمەتى
2025 جىلعى اقپاننىڭ 20-سىندا الماتى قالاسى بالالار شۇعىل مەديتسينالىق كومەك كورسەتۋ ورتالىعىنا 2 جاس 3 ايلىق بالا بوگدە زات جۇتۋى مۇمكىن دەگەن كۇدىكپەن جەتكىزىلدى. اتا-اناسىنىڭ ايتۋىنشا, شامامەن ءبىر اپتا بۇرىن قوناققا بارعاندا, بالانىڭ مەتالل ماگنيتتى جۇتىپ قويۋ مۇمكىندىگى بولعان, بىراق ماگنيتتىڭ ناقتى سانى بەلگىسىز ەدى.
«قۇرساق قۋىسىنىڭ رەنتگەنوگرافياسى بارىسىندا ولشەمى 6,2×2,2 سم بولاتىن كوپتەگەن مەتالل زاتتان قۇرالعان كونگلومەرات انىقتالدى. بوگدە زاتتى الىپ تاستاۋ ءۇشىن بالا شۇعىل تۇردە اۋرۋحاناعا جاتقىزىلدى», دەلىنگەن الماتى قالاسى قوعامدىق دەنساۋلىق ساقتاۋ باسقارماسىنىڭ حابارلاماسىندا.
اۋەلى ماماندار بوگدە زاتتى ەندوسكوپيالىق ادىسپەن الۋعا تىرىستى, الايدا ماگنيتتەردىڭ تىعىز جينالۋى كەسىرىنەن بۇل مۇمكىن بولمادى. وسىعان بايلانىستى حيرۋرگيالىق ارالاسۋ – لاپاروتوميا جانە گاستروتوميا جاساۋ تۋرالى شەشىم قابىلداندى. وتا بارىسىندا بالانىڭ اسقازانىنان 105 ماگنيتتى مونشاق الىندى.
وتادان كەيىن بالا رەانيماتسيا بولىمىنە اۋىستىرىلىپ, كەيىن حيرۋرگيا بولىمىنە جاتقىزىلدى. قازىرگى ۋاقىتتا ونىڭ جاعدايى قاناعاتتانارلىق.
الماتى قالاسى بالالار شۇعىل مەديتسينالىق كومەك كورسەتۋ ورتالىعى اتا-انالارعا ويىنشىقتى تاڭداۋدا مۇقيات بولۋدىڭ ماڭىزىن ەسكە سالىپ, بالالاردىڭ قاۋىپسىزدىگىنە ءجىتى نازار اۋدارۋدى سۇرايدى.
