تاۋەلسىزدىك العان تۇستا الەم جۇرتى ەلىمىزگە كۇدىك-كۇمانمەن قاراعانى راس. قانشاما ۇلت وكىلى ءومىر سۇرەتىن رەسپۋبليكا تاتۋلىق پەن تىنىشتىق سىناعىنان قالاي وتە الار ەكەن دەپ دەمىن ىشىنە تارتقانى بار. بىراق ەلىمىز وسى سىندارلى كەزەڭنەن امان-ەسەن ءوتتى. بۇل قازاق حالقىنىڭ تابيعاتىنان تولەرانتتى مىنەزىنە قاتىستى بولسا, ەكىنشىدەن اسسامبلەيانىڭ ناتيجەلى جۇمىسىنىڭ جەمىسى. وسى كۇندە ۇيىم تەك مەرەكەلىك ءىس-شارالار ۇيىمداستىرۋمەن شەكتەلمەي, ەلدىڭ الەۋمەتتىك-ەكونوميكالىق دامۋىنا وزدەرىنىڭ جوبا-باستامالارى ارقىلى ۇلەس قوسىپ وتىر.
شىمكەنت قالالىق قازاقستان حالقى اسسامبلەياسىندا 16 ەتنومادەني بىرلەستىك بار. ولاردىڭ بارلىعى دا ءبىر ءۇيدىڭ بالاسىنداي ءبىر-بىرىمەن جاقىن ارالاسىپ, كوپتەگەن ماسەلەنى بىرىگە وتىرىپ شەشەدى. ەلدە قۋانىشتى نەمەسە قايعىلى جاعداي بولا ما, دەرەۋ سوعان ءۇن قاتىپ, ازاماتتىق تانىتادى. سونىڭ ءبىرى – بىلتىرعى كوكتەمدەگى سۋ تاسقىنى. سولتۇستىك پەن باتىس وڭىردەگى جۇرتقا وڭاي تيمەدى. قانشاما ءۇي سۋعا كەتتى. مال شىعىنى بولدى. مەملەكەت قولدان كەلگەندى جاساپ, تۇرعىنداردى قاۋىپسىز جەرگە كوشىرىپ, ۋاقىتشا باسپاناعا ورنالاستىردى. تاسقىندى ەڭسەرۋگە حالىق بولىپ جۇمىلا كىرىستىك. اركىم شاماسىنا قاراي كومەك قولىن سوزدى. ەلدىڭ قايعىسىن ءبىرىنشى بولىپ بولىسۋگە ۇمتىلعان قايىرىمدى جاندار قاتارىنان شىمكەنت قالاسى اسسامبلەياسىنىڭ مۇشەلەرى دا تابىلدى. ناقتى سانعا كوشسەك, ەتنومادەني بىرلەستىك وكىلدەرى جىلۋ جيناپ, 120 توننادان اسا ماتەريالدىق كومەكتى زارداپ شەككەن وڭىرلەرگە جىبەردى. بەس-التى جۇك كولىگىن قۇراعان جاردەم قورجىنىندا كيىم-كەشەك, ازىق-ت ۇلىك, گيگيەنالىق, مەديتسينالىق پرەپاراتتار, كورپە-توسەك, باسقا دا تۇرمىسقا قاجەتتى زاتتار بولدى. قالالىق اسسامبلەيا «جۇرەكتەن – جۇرەككە» اكتسياسى اياسىندا وسىناۋ قايىرىمدىلىق ءىس-شاراسىن ۇيىمداستىردى. تاسقىن سۋ باسىلىپ, جاعداي تۇراقتالعان سوڭ كومەك قولىن سوزۋعا اتسالىسقان ءبىر توپ ازامات پەن ۇيىمدار ماراپاتتالىپ, ەل اتىنان ۇلكەن العىس ارقالادى. ولاردىڭ قاتارىندا «يۋگپرودۋكتگرۋپپ» جشس, «اتامەكەن» كاسىپكەرلەر پالاتاسى, «اسسامبلەيا جاستارى» ۇيىمى, ەتنومادەني بىرلەستىك توراعالارى مەن وزگە دە بەلسەندى كىسىلەر بولدى.
قالالىق اسسامبلەيا – كوپتەگەن يگى ءىستىڭ باستاماشىسى. ۇيىم جانىندا اقساقالدار كەڭەسى, انالار كەڭەسى, مەدياتسيا كەڭەسى سەكىلدى قۇرىلىمدار جۇمىس ىستەيدى. اقساقالدار كەڭەسىنىڭ اتقاراتىن قىزمەتى – ۇلتارالىق تاتۋلىقتى دارىپتەۋ, قوعامدا بولىپ تۇراتىن ءتۇرلى كەلەڭسىز جاعدايدىڭ الدىن الۋ, اسىرەسە وزگە ۇلت وكىلدەرى اراسىنداعى تۇرمىستىق جانجالدىڭ الدىن الۋ, مەملەكەتتىك باعدارلامالاردى, ۇكىمەتتىك جوبالاردى حالىققا كەڭىنەن تانىستىرۋ, ناسيحاتتاۋ. سول سەكىلدى انالار كەڭەسى وتباسى ينستيتۋتىن نىعايتۋ, جاستار اراسىندا قۇقىق بۇزۋشىلىقتىڭ الدىن الۋ, رۋحاني-پاتريوتتىق تاربيە بەرۋ, ايەلدەر كاسىپكەرلىگىن دامىتۋ باعىتىندا جۇمىس اتقارادى. وسكەلەڭ ۇرپاقتى پاتريوتتىققا باۋلۋدا, وتانشىلدىق سەزىمىن قالىپتاستىرۋدا «اسسامبلەيا جاستارىنىڭ» الار ورنى ەرەك.
ستاتيستيكاعا جۇگىنسەك, بىلتىر قالالىق اسسامبلەيا تاراپىنان 150-دەن اسا ءىس-شارا وتكىزىلگەن. ولاردىڭ كوپشىلىگى الەۋمەتتىك, مادەني, ەتنوسارالىق بىرلىكتى نىعايتۋ, جالپىۇلتتىق بىرەگەيلىكتى ساقتاۋ ماقساتتارىنا باعىتتالعان. مەملەكەتتىك ءتىلدى دارىپتەۋ, قولدانىس اياسىن كەڭەيتۋ باستاماسى اياسىندا دا اسسامبلەيانىڭ ارقالاعان جۇگى اۋىر. سونىڭ ءبىر ايعاعى ۇيىمعا مۇشە ەتنوبىرلەستىك ورتالىعىنىڭ جاستارى ءىس-شارا, جيىنداردا تەك مەملەكەتتىك تىلدە سويلەپ, قازاقشا بايانداما جاساۋعا تىرىسادى.
بۇگىندە ءاربىر ەتنوس وكىلىنىڭ ۇلتتىق مەرەكەسى اتاۋسىز قالمايدى. ونى تويلاۋعا بارشا ەتنومادەني بىرلەستىك اتسالىسادى. روجدەستۆو, سابانتوي, سوللال, وفارين بولسىن, بۇل مەرەكەلەر – مەگاپوليس تۇرعىندارىنىڭ باسىن قوساتىن ورتاق قۋانىش. وسىنىڭ ءبارى ەلىمىزدە ۇلتارالىق دوستىق پەن ىنتىماقتىڭ شىنايى بەينەسىن كورسەتەدى.
شاھاردا قازاقستان حالقى اسسامبلەياسىنىڭ 30 جىلدىعىن اتاپ وتۋگە بايلانىستى قالا اكىمىنىڭ قاۋلىسىمەن ءىس-شارالار جوسپارى بەكىتىلدى. وعان سايكەس 1 ناۋرىز العىس ايتۋ كۇنىنەن باستاپ جىلدىڭ سوڭىنا دەيىن مادەني-كوپشىلىك ءىس-شارالار وتكىزۋ جوسپاردا بار. يگى ىستەردىڭ ىشىندە جوعارى وقۋ ورىندارىندا ستۋدەنتتەردىڭ قاتىسۋىمەن وتەتىن دوڭگەلەك ۇستەل, دوستىق ۇيىندەگى تاريحشى, زەرتتەۋشى, قوعام قايراتكەرلەرىنىڭ ەڭبەكتەرى باياندالاتىن سەمينارلاردى, ءتۇرلى ۇلت وكىلدەرىنىڭ قولونەرى مەن وندىرگەن تاۋارلارىنىڭ كورمەسىن, ارنايى «العىس» كەرۋەنىن اتاپ وتسەك بولادى. سونداي-اق بيىلعى سالتاناتتى مەرەيتوي اياسىندا «قازاقستان حالقى اسسامبلەياسىنا – 30 جىل» ەسكەرتكىش تاقتاسى اشىلادى. وتىز جىلدىق شەڭبەرىندە اسسامبلەيا مۇشەلەرى 30 قايىرىمدىلىق ءىستى قولعا الماقشى. سونىڭ العاشقىسى جۋىردا ەرەكشە بالالارعا قامقورلىق كورسەتەتىن قور عيماراتىنىڭ كۇردەلى جوندەۋىمەن جۇزەگە استى. پرەزيدەنت باستاماسىمەن 2025 جىل جۇمىسشى ماماندىقتار جىلى دەپ جاريالانعانى بەلگىلى. اسسامبلەيا وكىلدەرى وسىعان وراي جاقسى ءبىر ءىستىڭ ۇيىتقىسى بولۋعا ۇمتىلىپ وتىر. الەۋمەتتىك جاعىنان از قامتىلعان 30 جاستى قامقورلىققا الىپ, جۇمىسشى ماماندىعىنا وقىتىپ, تۇراقتى جۇمىسقا ورنالاسۋىنا جاردەم بەرمەك.
اسسامبلەيا 30 جىل ىشىندە قوعامعا تىرەك بولار ۇيىم ەكەنىن دالەلدەپ شىقتى. بارىنە ۋاقىت ءوزى تورەشى عوي. ءتيىمسىز قۇرىلىمدار تالاپ پەن سۇرانىستان ءبارىبىر دە شەت قالىپ قويادى. ال شيرەك عاسىردان اسا مەرزىم وتسە دە اسسامبلەيا ءوز ماڭىزىن جويعان جوق. كەرىسىنشە, ءرولى كۇشەيىپ, اتقاراتىن قىزمەت اۋقىمدىلىعى مەن ماقسات-مىندەتى ۇلعايىپ كەلەدى. ءتىپتى ەلىمىزدىڭ وسى ينستيتۋتتىق مودەلىنە تاڭداي قاعىپ, ۇلكەن قىزىعۋشىلىق تانىتقان ەلدەر كوپ. سوندىقتان جاسامپازدىققا جول سالعان اسسامبلەيانىڭ بەيبىتشىلىك باستاۋىنداعى ۇلى ميسسياسى ەشقاشان الاسارمايدى.
شىمكەنت
