قازاقستاندا 51 جوعارى وقۋ ورنى العاشقى اسكەري دايىندىق ءپانى بويىنشا وقىتۋشىلار دايارلاۋ ليتسەنزياسىنا يە. الايدا ولاردىڭ تەك 41-ىندە عانا اسكەري كافەدرا بار. ول كافەدرالاردا وقيتىن ستۋدەنتتەردىڭ جارتىسىنا جۋىعى اقىلى نەگىزدە ءبىلىم الادى, بۇل ولاردىڭ دايىندىعىنىڭ تيىمدىلىگىنە كۇمان تۋدىرادى. سونىمەن قاتار, بىرىڭعاي ادىستەمەلىك بازا جوق, زاماناۋي وقۋلىقتار جەتىسپەيدى, ال وقۋ باعدارلامالارىندا ءالى كۇنگە دەيىن كونەرگەن كەزەڭدەگى تاكتيكا پايدالانىلادى.
«بۇگىندە الەمدىك قورعانىس جۇيەسىندە اۋقىمدى وزگەرىستەر بولىپ جاتىر. «قازىرگى ۇرىستاردىڭ ءادىس-تاسىلدەرى باسقا, اسىرەسە, گيبريدتىك سوعىس تۇرلەرى كەڭ تاراۋدا. شابۋىلدار اسكەري عانا ەمەس, اقپاراتتىق, پسيحولوگيالىق, ساياسي ەكونوميكالىق جانە باسقا دا سيپات الۋى مۇمكىن» دەگەن قازاقستان پرەزيدەنتى جوعارى تەحنولوگيانى مەڭگەرگەن كاسىبي اسكەر دايارلاۋدى تاپسىرعان بولاتىن. سوندىقتان اسكەري جوو مەن قورعانىس سالاسىنا ۇشقىشسىز باسقارىلاتىن ۇشۋ اپپاراتتارى مەن زاماناۋي تەحنولوگيانى جەتىك مەڭگەرگەن ۇلتتىق رۋحتاعى كاسىبي مامانداردى كوپتەپ تارتۋ ماڭىزدى دەپ ويلايمىز», دەدى سەناتور.
سەناتور ساۋالىندا ەل مەكتەپتەرىندەگى العاشقى اسكەري تاربيە جەتكىلىكتى دەڭگەيدە بەرىلمەيتىنىن دە تىلگە تيەك ەتتى. پانگە ارنالعان كابينەتتەردىڭ ماتەريالدىق بازالارىنىڭ ەسكى ءارى جاتتىعۋ قارۋلارى ساقتالاتىن بولمەلەر, تاكتيكالىق الاڭدار مەن اتىس تيرلەرى جوق بولۋى دا ساۋالعا ارقاۋ بولدى.
«اسكەري دالالىق جيىندار وتكىزىلمەيدى. اتاۋىنا «تەحنولوگيا» ءسوزى قوسىلىپ, ساعاتى قىسقارعان ءپان 10 سىنىپپەن شەكتەلەدى, 11 سىنىپ وقۋشىلارى ۇبت-عا دايىندالۋ ءۇشىن بوساتىلادى. ەلىمىزدە 51 جوو باستاپقى اسكەري دايارلىق ءپانىنىڭ مۇعالىمىن وقىتۋعا ليتسەنزيا بار. وسى ماماندىقتى وقىعاندار اسكەرگە بارماي-اق ءپاننىڭ مۇعالىمى بولىپ شىعادى. ءوزى ساپقا تۇرماعان, قولىنا قارۋ ۇستاماعان, تەمىردەي ءتارتىپ كورمەگەن ادام جاستارعا قالاي تاربيە بەرەدى», دەدى سەناتور.
تاقىرىپ اياسىندا كەلەلى ماسەلەلەردى كوتەرگەن دارحان قىدىرالى, ولاردى شەشۋ جولىندا باستاپقى اسكەري دايارلىق ءپانىنىڭ ساعاتى مەن ساپاسىنا ءمان بەرۋدى ۇسىندى.
