قازاقستان رەسپۋبليكاسى قورعانىس مينيسترلىگىنىڭ اسكەري ينستيتۋتتارى ەل تاۋەلسىزدىگى جىلدارى ىشىندە 35 مىڭنان استام وفيتسەردى, 4 مىڭ سەرجانتتى (كادەتتىك كورپۋستان) جانە 14 مىڭ «جاس ۇلان» رەسپۋبليكالىق مەكتەپتەرىنىڭ تاربيەلەنۋشىسىن دايارلادى.
سونىمەن قاتار, 50-دەن استام تۇلەك گەنەرال اسكەري اتاعىنا يە بولدى, بۇل اسكەري وقۋ ورىندارىنداعى ءبىلىم بەرۋ ساپاسىنىڭ جوعارى ەكەنىن جانە كادرلاردىڭ كاسىبي ءوسىپ-جەتىلگەنىن دالەلدەيدى.
قازىرگى ۋاقىتتا قازاقستاننىڭ اسكەري وقۋ ورىندارىنىڭ تۇلەكتەرىنىڭ شامامەن 60%-ى قارۋلى كۇشتەر قاتارىندا قىزمەتىن جالعاستىرۋدا.
«اسكەري مامانداردىڭ جوعارى دەڭگەيدەگى دايىندىعى اسكەردىڭ جاۋىنگەرلىك دايارلىعىن, موبيليزاتسيالىق ورىستەۋىن جانە ەلدىڭ قورعانىس قابىلەتىن ءتيىمدى قامتاماسىز ەتۋگە مۇمكىندىك بەرەدى. اسكەري ءبىلىم بەرۋدى دامىتۋ اياسىندا ماماندىقتار سپەكترى كەڭەيتىلىپ, بۇل شەتەلدە اسكەري كادرلاردى دايارلاۋدى ەداۋىر قىسقارتۋعا ىقپال ەتتى», دەلىنگەن حابارلامادا.
وتاندىق جوعارى وقۋ ورىندارىنداعى وقۋ ۇدەرىسى قارۋلى كۇشتەردىڭ قازىرگى زامانعى تالاپتارىنا ساي جۇرگىزىلۋدە, ال ەلدە جوق بىرەگەي ماماندىقتار بويىنشا دايارلاۋ حالىقارالىق دەڭگەيدە جالعاسۋدا.
قازاقستاننىڭ اسكەري ءبىلىم بەرۋ جۇيەسى داستۇرلەردى ساقتاي وتىرىپ, زامان تالابىنا ساي جاڭعىرىپ, قارۋلى كۇشتەردى جوعارى بىلىكتى كادرلارمەن قامتاماسىز ەتۋدە.
