سۋرەت: z-taraz.kz
سۋ نىساندارىنىڭ كوكتەمگى ەگىس جۇمىستارىنا دايىندىعىن باعالاۋ وتىرىستىڭ نەگىزگى ماقساتى بولدى. سەناتورلار سالانى بىلىكتى ماماندارمەن قامتاماسىز ەتۋ دەڭگەيى مەن تامشىلاتىپ سۋارۋدى ەنگىزۋ جانە سۋ رەسۋرستارىن ءتيىمدى پايدالانۋ جونىندەگى جوبالاردى ىسكە اسىرۋ بارىسىن ساراپشىلارمەن بىرگە تالقىلادى. سونداي-اق بىلتىر اشىلعان قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ قىزمەتىمەن تانىسىپ, سالانى دامىتۋدىڭ وزەكتى ماسەلەلەرىن زەردەلەدى.
«سۋارۋ جۇيەلەرىن جاڭعىرتۋ جانە بىلىكتى مامان دايارلاۋ – اۋىل شارۋاشىلىعىن دامىتۋ مەن ءوڭىردىڭ ەكونوميكالىق تۇراقتىلىعىنا تىكەلەي قاتىستى ستراتەگيالىق ماڭىزدى مىندەتتەر. سۋ شارۋاشىلىعىنا كادر دايارلاۋدا جامبىل وبلىسى ارقاشان باستى ءرول اتقارىپ كەلەدى جانە بۇگىن ءبىزدىڭ الدىمىزدا جاڭا قاتەرلەر تۇرعانى بەلگىلى. زاماناۋي سۋ ۇنەمدەۋ تەحنولوگياسىن ەنگىزۋ, سۋ رەسۋرستارىن ءتيىمدى باسقارۋ جانە كادر تاپشىلىعى ماسەلەسىن شەشۋ قاجەت. ول اگرارلىق سەكتوردىڭ ونىمدىلىگىن ارتتىرۋمەن قاتار ەلىمىزدىڭ ۇزاقمەرزىمدى سۋ قاۋىپسىزدىگىن قامتاماسىز ەتۋگە مۇمكىندىك بەرەدى», دەدى اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ.
كوشپەلى وتىرىسقا قاتىسۋشىلار سۋ تاپشىلىعىنىڭ نەگىزگى سەبەپتەرىنە توقتالدى. ايتالىق, كليماتتىڭ وزگەرۋى, سۋ رەسۋرستارىن ءتيىمسىز پايدالانۋ جانە سالادا بىلىكتى مامانعا دەگەن سۇرانىستىڭ ارتا ءتۇسۋى. وسىعان بايلانىستى سۋ ۇنەمدەۋ ساياساتىن قالىپتاستىرۋ, سۋ شارۋاشىلىعى ينفراقۇرىلىمىن جاڭعىرتۋ, ترانسشەكارالىق ىنتىماقتاستىقتى كۇشەيتۋ جانە كادر دايارلاۋ ساپاسىن ارتتىرۋ جونىندە ناقتى ۇسىنىستار ازىرلەندى.
دەپۋتاتتار جامبىل وبلىسىنداعى بىرقاتار سۋ نىساندارىن ارالاپ, تامشىلاتىپ سۋارۋ جۇيەسى جابدىعىن شىعاراتىن زاۋىتتىڭ, «تاراز بىلعارى اياق كيىم» جشس, قانت زاۋىتىنىڭ جۇمىسىمەن, سونداي-اق جاڭارتىلا باستاعان «تەرىس-اششىبۇلاق» سۋ قويماسىنىڭ قازىرگى جاعدايىمەن تانىستى.
