سەنات توراعاسىنىڭ ورىنباسارى جاقىپ اسانوۆ حالىقارالىق ۆوركشوپتى اشا كەلىپ, سەنات سپيكەرى ماۋلەن اشىمباەۆتىڭ كەزدەسۋگە قاتىسۋشىلارعا ارنالعان قۇتتىقتاۋىن جاريا ەتتى. توراعا ورىنباسارى جاساندى ينتەللەكتىنى دامىتۋ مەن ونىڭ ەتيكالىق ماسەلەسىنىڭ ماڭىزىنا توقتالدى.
«جاساندى ينتەللەكت قازىردىڭ وزىندە ءومىرىمىزدىڭ اجىراماس بولىگىنە اينالدى. ول الەمنىڭ كەلبەتىن وزگەرتتى جانە مەديتسينادان ءبىلىم بەرۋگە دەيىنگى نەگىزگى سالالارعا دەندەي ەندى. سەناتتا دا ونى زاڭ شىعارۋ ۇدەرىسىنە ەنگىزۋ بويىنشا جۇمىس قولعا الىندى. جي قوعامنىڭ قاجەتىن تالداي الادى, زاڭداردىڭ سالدارىن بولجاي الادى, نورماتيۆتىك اكتىلەردى دايىنداۋعا كومەكتەسەدى. ءبىز قازىردىڭ وزىندە الەمدىك تاجىريبەنى زەردەلەۋدەمىز جانە ساراپشىلارمەن ءوزارا ءىس-قيمىلدى باستادىق. پارلامەنت وزگەرىستەرگە اشىق جانە زاماناۋي تەحنولوگيانى ەنگىزۋگە دايىن», دەدى ج.اسانوۆ.
ءىس-شاراعا مەملەكەتتىك ورگانداردىڭ وكىلدەرى, عىلىمي-زەرتتەۋ ينستيتۋتتارىنىڭ جەتەكشى ساراپشىلارى, IT-سالا ماماندارى, پارلامەنت سەناتىنىڭ دەپۋتاتتارى دارحان قىدىرالى, عالياسقار سارىباەۆ, ناۋرىزباي بايقاداموۆ, اليشەر ساتۆالديەۆ قاتىستى.
قاتىسۋشىلار ۆوركشوپتىڭ توپتىق سەسسيالارى اياسىندا جاساندى ينتەللەكتىنىڭ دامۋ كەزەڭدەرى مەن يننوۆاتسيالارىن, تىلدىك ۇلگىلەر مەن تسيفرلىق لينگۆيستيكانى, جاساندى ينتەللەكت ەكوجۇيەسىن دامىتۋ ماسەلەلەرىن تالقىلادى. دەنساۋلىق ساقتاۋدا جي-ءدى قولدانۋعا, اتاپ ايتقاندا, وزىق الگوريتمدەردى قولدانا وتىرىپ, مەديتسينالىق سينتەتيكالىق دەرەكتەردى گەنەراتسيالاۋعا ەرەكشە نازار اۋدارىلدى. سونىمەن قاتار كەلەشەكتە جاساندى ينتەللەكتىنى ەتيكالىق رەتتەۋ جانە ونىڭ قوعامعا اسەرى جايىندا ايتىلدى.
2023 جىلى پارلامەنت سەناتىنىڭ توراعاسى ماۋلەن اشىمباەۆتىڭ قاتىسۋىمەن استانادا وتكەن الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ XXI وتىرىسى اياسىندا مۇسىلمان اقساقالدار كەڭەسى ورتالىق ازيا بيۋروسىنىڭ كەڭسەسى اشىلعان ەدى. وكىلدىك سودان بەرى ورتالىق ازيانىڭ بۇكىل ءوڭىرىن قامتي وتىرىپ, بەلسەندى جۇمىس ىستەپ كەلەدى.
