ادام ساۋداسىنىڭ قۇرباندارى قولداۋعا ءزارۋ

2024-2025 جىلدار  ارالى­عىن­دا ادامداردى زاڭسىز اكەتۋ­گە, اكەلۋگە, ساتۋعا قارسى كۇرەس ماسەلەلەرى جونىندەگى ۆەدومستۆو­ارالىق كوميسسياعا ەڭبەك جانە حالىقتى الەۋمەتتىك قور­عاۋ مي­نيسترلىگى توراعالىق ەتەدى. ۇكىمەتتىڭ 2024-2026 جىلدارعا ارنالعان ادام ساۋداسىنا بايلانىستى قىلمىستاردىڭ الدىن الۋ جانە ولارعا قارسى كۇرەس جونىندەگى ءىس-شارالار جوسپارى جۇيەلى ىسكە اسىپ كەلەدى. جوسپار 55 تارماقتان تۇرادى. ونىڭ ۇيلەسىمدى جۇرگىزىلۋىنە بىرقاتار ورتالىق مەملەكەتتىك, جەرگىلىكتى اتقارۋشى ورگاندار, «اتامەكەن» ۇكپ, باسقا دا ۇيىمدار جاۋاپتى بولىپ بەلگىلەنگەن.

ەڭبەك جانە حالىقتى الەۋمەت­تىك قورعاۋ مينيسترلىگى جەرگىلىكتى اتقارۋشى ورگاندارمەن بىرلەسىپ ادام ساۋداسىنىڭ قۇرباندارىنا ارناۋلى الەۋمەتتىك قىزمەت كور­سەتۋ, ولاردى جۇمىسقا ورنا­لاس­تىرۋ جونىندەگى ءىس-شارا­لاردى ورىندايدى. الەۋمەتتىك كودەكس­كە سايكەس, ادام ساۋداسى­نىڭ قۇر­باندارىنا ارناۋلى الەۋ­مەت­تىك قىزمەتتىڭ كەپىلدەندىرىل­گەن كولەمى, ونىڭ ىشىندە الەۋمەت­تىك تۇرمىستىق, مەديتسينالىق, پسيحولوگيالىق, پەداگوگيكالىق, ەڭبەك, مادەني, ەكونوميكالىق, قۇقىقتىق قىزمەتتەر كورسەتىلەدى. قىزمەت كورسەتۋ مەرزىمى – 6 اي. ەگەر قىلمىستىق ءىس اياقتالماسا نەمەسە ازامات مەديتسينالىق ۇيىمدا ستاتسيونارلىق ەمدەۋدە بولعان جاعدايدا مەرزىمدى 9 ايعا دەيىن ۇزارتۋعا مۇمكىندىك بار.

ەلىمىزدە ادام ساۋداسىنىڭ قۇر­بان­دارىنا ارناۋلى الەۋمەت­تىك قىزمەتتەر كورسەتەتىن 13 داع­دارىس ورتالىعى جۇمىس ىستەيدى. ونىڭ ىشىندە مەملەكەتتىك سەكتوردا اباي وبلىسى, شىمكەنت قالاسىندا ءبىر-ءبىر ۇيىمنان بار. مەملەكەتتىك الەۋمەتتىك تاپسىرىس شەڭبەرىندە اقمولا, اقتوبە, جامبىل, جەتىسۋ, قاراعاندى, قوستاناي, قىزىلوردا, سولتۇستىك قازاقستان, تۇركىستان (2 ۇيىم) وبلىستارىمەن قاتار, استانا قالاسىندا ورتالىقتار جۇمىس ىستەيدى.

جۇمىسپەن قامتۋ بارىسىندا ادام ساۋداسىنىڭ قۇربانى بولعان ازاماتتار «باستاۋ بيزنەس» جوباسى شەڭبەرىندە كاسىپ­كەرلىك نەگىزدەرىنە ونلاين وقۋعا, حا­لىقتىڭ الەۋمەتتىك وسال توپتارىنا بەرىلەتىن 400 اەك دەيىنگى گرانت الۋعا, «جاستار پراكتيكاسى», «العاشقى جۇمىس ورنى», «ۇر­پاقتار كەلىسىمشارتى» سەكىل­دى جوبالاردان بولەك, قىسقا مەر­زىم­دى كاسىپتىك وقۋعا قاتىسا الا­دى. بۇل رەتتە جۇمىسپەن قام­تۋ­عا جاردەمدەسۋدىڭ بارلىق شارا­لارى ءوتىنىش سيپاتىندا ورىن­دالاتىنىن اتاپ وتكەن ءجون. مۇمكىندىكتى پايدالانۋ ءۇشىن ەل ازاماتتارى تۇرعىلىقتى جەرى بو­يىنشا مانساپ ورتالىعىنا حابار­لاسۋى قاجەت. بۇل جاعدايدا زورلىق-زومبىلىق نەمەسە ادام ساۋداسىنىڭ قۇربانى مارتەبەسىن كورسەتۋ تالاپ ەتىلمەيدى. بارلىق قىزمەت «قۇپيا» نەگىزىندە, ءمان-جايلاردى قوسىمشا ناقتىلاۋسىز ۇسىنىلادى.