قيلى كۇندەردىڭ قىسپاعىنان امان وتكەن سارسەنباي قاريا 1924 جىلى 10 مامىردا دۇنيەگە كەلگەن. ول 1942 جىلى اسكەرگە شاقىرىلىپ, اياگوزدە جاساقتالعان تۇڭعىش قازاق پولكىنىڭ قۇرامىنا الىنعان. اۆتوماتشىلاردى دايارلايتىن التى ايلىق وقۋ-جاتتىعۋدان سوڭ, سوعىستىڭ ناعىز قايناعان ورتاسىنا تۇسەدى. ءبىر جىلدان سوڭ, سانى سيرەگەن ساربازدار باۋىرجان مومىش ۇلى باسقارعان 9-گۆارديالىق ديۆيزياعا قوسىلىپتى. ولارعا سول كەزدىڭ ەڭ قاۋىپتى ءارى قۇپيا قارۋىن كۇزەتۋ مىندەتى جۇكتەلگەن.
ء«بىز قۇپيانى ساقتايمىز دەپ انت بەرگەنبىز. ول كەزدە «كاتيۋشا» تۋرالى ايتىلمايدى. قۇپيا بولىمدە بولدىق. № 49 كاتيۋشانى كۇزەتتىك. ءبىر جەردە 15 مينۋت تۇرادى, ودان ارتىق تۇرمايدى. كۇندىز توعايدىڭ ىشىنە كەتىپ قالادى. قاي جەرگە جاۋ اسكەرى كوپ جينالادى, سونى اتادى. باۋىرجان مومىش ۇلى قاتال دا, ءادىل ادام عوي. بۇيرىق بەرەدى. ارتىڭدا وتانىڭ, اكە-شەشەڭ, ەلىڭ-جۇرتىڭ تۇر دەپ جىگەرلەندىرەدى», دەيدى اقساقال سول كۇندەردى ەسكە الىپ.
9-گۆارديالىق اتقىشتار ديۆيزياسىنىڭ ساپىندا سارسەنباي اقساقال پولشا, ليتۆا, لاتۆيا, ەستونيا سىندى ەلدەردى ازات ەتۋگە قاتىسقان. ءومىرىنىڭ ءۇش جىلىن مايدان دالاسىندا وتكىزگەن ول گەرمانياعا دەيىن جەتەدى. سول مەملەكەت اۋماعىنداعى شايقاس كەزىندە, 1945 جىلدىڭ 21 قاڭتارىندا باۋىرجان مومىش ۇلىمەن قاتار جارالانعان. جارالى سولداتتاردى ۇشاققا سالىپ, ماسكەۋگە جىبەرەدى. ۆلاديمير وبلىسى كالچيۋگين قالاسىندا ەمدەلەدى, جەڭىستى سول جەردە قارسى الادى. سارسەنباي اقساقال باۋىرجان مومىش ۇلىمەن سوعىستان كەيىن دە دامدەس-تۇزداس بولعانىن ايتادى.
مايدانگەر ەلگە كەلگەن سوڭ, مۇعالىم جانە پوشتاشى بولىپ ەڭبەك ەتكەن. سودان بولار ءالى كۇنگە دەيىن ءباسپاسوزدى شولىپ, راديونى تىڭداپ, تەلەارنادان جاڭالىقتاردى كورۋگە تىرىسادى. جۇزگە جۋىق نەمەرە, شوبەرە ءسۇيىپ وتىر. سارسەنباي اقساقال قازىر كەنجە نەمەرەسىنىڭ كۇتىمىندە.
بيىل اتالىپ وتەتىن ۇلى وتان سوعىسىنداعى جەڭىستىڭ 80 جىلدىعى قارساڭىندا ۇلتتىق ۇلاندا «جەڭىسكە 100 كۇن قالعاندا» اكتسياسى ءجۇرىپ جاتىر. وسى ءىس-شارا اياسىندا سوعىس جانە تىل ارداگەرلەرى ءۇشىن كوپتەگەن يگى ىستەر اتقارىلۋدا.
