فوتو: اشىق دەرەككوز
«روبوت – سوت ورىنداۋشىسى» جوباسىن ىسكە قوسۋ ارقىلى اتالعان تسيفرلىق شەشىمدى قولدانۋ ناتيجەلەرى قارالدى. ماسەلەن, روبوت ىسكە قوسىلعان 2024 جىلدىڭ تامىز ايىنان بەرى 125 مىڭنان استام قۇجات ورىندالعان. ال, راسىمدەردەن ءوتۋ كەزىندە ازاماتتار 600 ملن تەڭگەدەن استام قاراجات ۇنەمدەگەن», دەلىنگەن حابارلامادا.
پرەمەر-مينيستر ادىلەت مينيسترلىگىنە اتقارۋ قۇجاتتارىنىڭ وڭايلاتىلعان تارتىپپەن ورىنداۋعا بولاتىن تىزبەسىن كەڭەيتۋدى تاپسىردى, بۇل – سوت اكتىلەرىن ورىنداۋدىڭ تيىمدىلىگىن ارتتىرادى.
سونىمەن قاتار ەلىمىزدىڭ جەدەلدەتىلگەن الەۋمەتتىك-ەكونوميكالىق دامۋى ءۇشىن مەملەكەتتىك باسقارۋ جۇيەسىن بيۋروكراتيادان ارىلتۋ بويىنشا پرەزيدەنت العا قويعان مىندەتتەردى ىسكە اسىرۋعا ەرەكشە نازار اۋدارىلدى.
«مەملەكەت باسشىسى ۇكىمەتتىڭ كەڭەيتىلگەن وتىرىسىندا بارلىق سالادا تسيفرلاندىرۋدىڭ ءبىرتۇتاس جۇيەسىن قۇرۋ قاجەتتىگىن اتاپ ءوتتى. بۇل جۇمىس جاپپاي جۇرگىزىلىپ جاتىر. ادىلەت ورگاندارىن دامىتۋ مەن تسيفرلاندىرۋ – مەملەكەتتىڭ, ازاماتتاردىڭ جانە بيزنەستىڭ زاڭدى مۇددەلەرىن قورعاۋعا باعىتتالعان اسا ماڭىزدى ۇدەرىس. وسى ورايدا, جاساندى ينتەللەكتىنى دامىتۋ الدىڭعى قاتارعا شىقتى. بۇل – بيۋروكراتيادان ارىلتۋدىڭ نەگىزگى ادىستەرىنىڭ ءبىرى. سوندىقتان كورسەتىلەتىن قىزمەتتەردىڭ جەدەلدىگىن, قولجەتىمدىلىگى مەن ساپاسىن ارتتىرۋ ءۇشىن تسيفرلىق تەحنولوگيالاردىڭ الەۋەتىن تۇگەل پايدالانۋ قاجەت», دەدى ولجاس بەكتەنوۆ.
