باس ديرەكتور شاكەرحان رۇستەمنىڭ ايتۋىنشا, ىشكى نارىقتا جەرگىلىكتى ءوندىرىستىڭ ۇلەسى شامامەن 26%-دى قۇرايدى, ال 74% بولاتىن يمپورتتىق تاۋارلار – رەسەي, بەلارۋس, قىتاي جانە تۇركيانىڭ ەنشىسىندە. ماماننىڭ ايتۋىنشا, سالانىڭ كەنجەلەپ قالۋىنىڭ سالماقتى سەبەبى بار: اعاش وڭدەۋ ونەركاسىبى ءۇشىن شيكىزات بازاسى جوق. قاجەتتى ماتەريالداردىڭ 70%-ى شەتەلدەن كەلەدى.
«جيھاز ءوندىرىسىن باستاپقى كەزەڭدە تابىستى دەپ ايتۋ قيىن. قىمبات قۇرال-جابدىقتار ساتىپ الۋعا قارجى سالۋ قاجەت. بارلىق وندىرىستىك جەلىنى ورنالاستىرۋعا ارنالعان ءۇي-جاي كەرەك. ونىڭ كولەمى ەڭ از دەگەندە 700–1000 شارشى مەتر بولعانى ءجون. ەگەر مەنشىكتى عيمارات بولماسا, وندا ءتيىستى الاڭدى جالعا الۋ ءبىراز شىعىندى قاجەت ەتەدى. پايدا تابۋ ءۇشىن تۇراقتى دامۋ, جيھاز ۇردىستەرىن قاداعالاۋ, كليەنتتەرگە كرەاتيۆتى شەشىمدەر مەن ەكسكليۋزيۆتى ديزاين ۇسىنۋ ماڭىزدى», دەيدى شاكەرحان رۇستەم.
ءوندىرىستى كەڭەيتۋ ءۇشىن كومپانيا «تسەنتر كرەديتبانكىنە» ءوتىنىم بەرىپ, جىلىنا 21,75%-بەن نەسيە العان. ونىڭ 13,75%-ىن «دامۋ» قورى سۋبسيديالايدى, قالعان 8%-ىن كاسىپكەر تولەيدى. نەسيە قاراجاتى ينۆەستيتسياعا جۇمسالعان. كومپيۋتەرمەن باسقارىلاتىن شەتەلدىك تەحنولوگيا قول ەڭبەگىن 50%-عا دەيىن قىسقارتىپتى. بۇل قۇرىلعىلاردىڭ كومەگىمەن ماتەريالدار تەگىستەلەدى, پلەنكامەن قاپتالادى, ءارتۇرلى ورنەكتەر سالىنادى. شاكەرحان رۇستەم ايتىپ وتكەندەي, بۇل جولعى جەڭىلدەتىلگەن نەسيە وندىرىسكە سەرپىن بەرۋگە مۇمكىندىك بەردى.
«ىشكى نارىقتا باسەكەگە دايىنبىز. بىزدە ارالاس سالالاردى دامىتۋ ماڭىزدى. قازىر پليتالىق ءوندىرىستىڭ بىرنەشە جوباسى جۇمىس ىستەپ جاتقانىن بىلەمىن. سىرتقى نارىقتا تانىلۋ ءۇشىن ىشكى نارىقتاعى ءباسىڭ جوعارى بولۋى كەرەك. قىتاي مەن بەلورۋسسيادا بۇل سەگمەنتتىڭ دامىپ كەتكەنى سونشالىقتى, وزىندىك ەرەكشەلىكتەرى ايقىن كورىنەدى. ۇلتتىق ونىمدەرى برەندكە اينالدىرعان. قىتايدا وتە ءىرى, جان-جاقتى ارتاراپتاندىرىلعان كاسىپورىندار جەتەدى. ول ەلدە جيھاز قۇرامىنداعى وتاندىق شيكىزات ۇلەسى – 100%: اعاشىنان باستاپ جەلىمىنە دەيىن. بىزدە دە سوعان جاقىنداپ كەلەمىز. اعاش رەسەيدەن كەلەدى, وزگەسى وزىمىزدە دايىندالادى», دەيدى كەيىپكەرىمىز.
كەز كەلگەن ءوندىرىس سياقتى جيھاز بيزنەسى دە كادر تاپشىلىعىن باستان كەشىپ جاتىر. «ادام رەسۋرستارى وتە قىمبات بولىپ بارادى. قاجەتتى كادرلاردى تابۋ قيىن, تەك بارىنشا اۆتوماتتاندىرۋ ارقىلى عانا ونى ءبىرشاما تەڭەستىرە الامىز. بىراق تەحنولوگيا دامىعان سايىن ونىڭ ءتىلىن مەڭگەرگەن مامانداردىڭ دا قاجەتتىلىگى سەزىلەدى», دەيدى كاسىپكەر.
الماتى
