اريستوتەل «ادام – الەۋمەتتىك جانۋار» دەگەن انىقتاما بەرگەن. بىراق بۇگىنگى تسيفرلىق داۋىردە ادامدار ءبىر-بىرىنەن رۋحاني تۇرعىدا الىستاپ بارادى. جاساندى ينتەللەكت, الەۋمەتتىك جەلى, ۆيرتۋالدى الەم – ءبارى دە ءبىزدى شىنايى قارىم-قاتىناستان الشاقتاتىپ جاتىر. عالىمدار ادامنىڭ جالعىزدىققا جۇتىلۋى جان ساۋلىعىنا عانا ەمەس, ءتان ساۋلىعىنا دا زيان كەلتىرەتىنىن دالەلدەگەن. الەۋمەتتىك بايلانىستىڭ جەتىسپەۋى اعزاداعى كۇيزەلىس گورمونىن كوبەيتىپ, يممۋندىق جۇيەنى السىرەتەدى. وسىدان بارىپ ۇيقىسىزدىق, قان قىسىمىنىڭ كوتەرىلۋى, جۇرەك-قان تامىرلارى اۋرۋلارى اسقىنا تۇسەدى. زەرتتەۋشىلەردىڭ پايىمىنشا, بۇل ماسەلەمەن كۇرەسۋدىڭ جولى – ومىردەگى شىنايى ساتتەردى باعالاۋدى ۇيرەنۋ. ادامدار كوبىنە قىمبات تەلەفون, قىمبات كيىم, سوڭعى ۇلگىدەگى كولىك الىپ, تىم قۇرىعىندا ءدامدى تاماق ءىشىپ كوڭىلىن كوتەرىپ, ءوزىن باقىتتى سەزىنگىسى كەلەدى. بىراق ونىڭ قۋانىشى كەلتە. كيىم توزادى, ايفوننىڭ جاڭا مودەلى, كولىكتىڭ ودان دا كۇشتىسى شىعادى. سونى العىسى كەپ كوڭىل تاعى قۇلازيدى. سوندىقتان زەرتتەۋشىلەر ادامدى شىن باقىتقا جەتكىزەتىن – زاتتار ەمەس, ومىردەن العان اسەر دەيدى. كورنەلل ۋنيۆەرسيتەتىنىڭ پروفەسسورى توماس گيلوۆيچ جۇرگىزگەن زەرتتەۋدە ادامدار ساتىپ العان زاتتىڭ قۋانىشىنان گورى ساياحاتتاعاننان, مادەني ءىس-شارالاردان, دوستارمەن ۋاقىت وتكىزۋدەن العان قۋانىش اسەرى ۇزاققا جەتەتىنى انىقتالعان. ۋاقىت وتە كەلە زاتتاردىڭ ءمانى جوعالادى, ال ەرەكشە ساتتەر ەستەلىككە اينالىپ, ادامعا باقىت سىيلايدى. اقش عالىمدارى ادامدارعا «زاتتاردى ەمەس, ساتتەردى ساتىپ الىڭىز» دەگەن كەڭەس بەرەدى. ويتكەنى ورتاق اڭگىمە قارىم-قاتىناستى نىعايتىپ, شىنايى بايلانىستى كۇشەيتەدى.
جالعىزدىق – قازىرگى زاماننىڭ ىندەتى. بىراق ءبىز ءبىر-بىرىمىزگە رۋحاني جاقىن بولۋعا ۇمتىلساق, بۇل دەرتتىڭ الدىن الۋعا بولادى.
