«مەن الداعى جىلدى «جۇمىسشى ماماندىقتار جىلى» دەپ جاريالادىم. بۇل – ەڭبەك ادامدارىنا دەگەن ەرەكشە قۇرمەتتىڭ بەلگىسى. ءبىز وتانشىلدىق, ەڭبەكقورلىق جانە بىلىكتىلىككە ايرىقشا ءمان بەرەمىز. ءدال قازىر مەرەكەگە قاراماستان مىڭداعان وتانداسىمىز جۇمىس ىستەپ جاتىر. ولاردىڭ اراسىندا شەكاراشىلار, دارىگەرلەر, ءتارتىپ ساقشىلارى, قۇتقارۋشىلار مەن ءورت سوندىرۋشىلەر, ءوندىرىس باسىنداعى ماماندار جانە باسقا دا ازاماتتار بار. مۇنى ءوز ىسىنە دەگەن ادالدىقتىڭ ناعىز ۇلگىسى دەۋگە بولادى. مەن بۇكىل حالقىمىزدىڭ اتىنان سىزدەرگە شىنايى ريزاشىلىعىمدى بىلدىرەمىن. شەتەلدە ءبىلىم الىپ جاتقان نەمەسە جۇمىس ىستەپ جۇرگەن ازاماتتارىمىزعا اماندىق تىلەيمىن!», – دەدى پرەزيدەنت.
وسى ورايدا ەلىمىزدەگى قاراپايىم ەڭبەك يەلەرىن ۇنەمى ءتۇرلى ماراپاتتارمەن قۋانتىپ جۇرەتىن جاندار تاعى ءبىر توپ ازاماتتاردىڭ ەڭبەگىنە ساي قۇرمەت كورسەتتى. بۇل جولى ماراپاتتاۋ ءراسىمىن قازاقستانداعى تۇڭعىش ايەلدەر اۆتومەكتەبىنىڭ نەگىزىن قالاۋشى, پرەزيدەنتتىمىزدىڭ العىس حات يەگەرى, “نامىس” توسبەلگىسىنىڭ جانە “التىن جۇرەك” نوميناتسياسىنىڭ يەگەرى, ەل جاناشىرى- اسىلزات ەرالىقىزى ۇيىمداستىردى. ءتۇرلى ماماندىق يەلەرىنىڭ ەڭبەگىنە ساي قۇرمەت كورسەتە وتىرىپ, ولاردىڭ الداعى ۋاقىتتاعى جوسپارلارىن ورتاعا سالىپ, جاڭا قازاقستاندى قۇرۋ جولىنداعى ۇسىنىس وي پىكىرلەرى دە تالقىلاندى.
ارقايسىسى ءار سالاداعى ماماندىق يەلەرى ەكەنىنە قاراماستان ولاردى بىرىكتىرەتىن ورتاق ۇيا قازاقستاندى دامىتۋ يدەياسىمەن توعىسۋى قۋانتپاي قويمايدى. ەڭبەكقور, ءوز ەلىنىڭ جاناشىرى وسىنداي جاندار باردا ەل ەرتەڭىنىڭ جارقىن بولارىنا ەرىكسىز سەنەسىڭ! ماراپاتتالعان جانداردىڭ ىشىندە ۇستاز دا, كاسىپكەر دە, سپورتشى, دارىگەر مەن جۋرناليست تە بار. پرەزيدەنت ءسوزىنىڭ جەردە قالماي, ەڭبەك يەلەرىنىڭ ەڭبەگىنە ساي قۇرمەت كورسەتىلىپ جاتقانى قۋانتادى.
