وبلىس كولەمىندە شالعايداعى مويىنقۇم اۋدانى عانا كوگىلدىر وتىنعا ءزارۋ بولاتىن. سوڭعى جىلدارى الىستاعى اۋدان ەلدى مەكەندەرىن تابيعي گازبەن قامتۋ ماقساتىندا اۋقىمدى جۇمىس قولعا الىنعان.
«وسى جىلى ءوڭىردىڭ 5 مىڭنان استام تۇرعىنى گازبەن قامتاماسىز ەتىلەدى دەپ جوسپارلاندى. ناقتى ايتساق, بۇگىنگى كۇنى وڭىردەگى ەلدى مەكەندەردىڭ 78 پايىزى گازبەن قامتىلعان, ياعني, 371 ەلدى مەكەننىڭ 288-ءى تابيعي گازعا قوسىلعان. بىلتىر قورداي اۋدانىنىڭ 3 اۋىلىنا گاز جۇرگىزىلىپ, وبلىس حالقىنىڭ گازبەن قامتىلۋ دەڭگەيى 91,3 پايىزدى قۇراسا, بيىل 9 اۋىلعا تابيعي گاز كىرگىزىلىپ, تۇرعىنداردىڭ گازبەن قامتىلۋ كورسەتكىشىن 91,8 پايىزعا جەتكىزۋ كوزدەلىپ وتىر.
وسى جىلى سارىسۋ اۋدانىنىڭ 14 ەلدى مەكەنىن گازبەن قامتۋ ءۇشىن «ەۆروحيم-قاراتاۋ» جانە شۋ اۋدانىنىڭ 18 ەلدى مەكەنىن گازداندىرۋ ءۇشىن «شۋ» اۆتوماتتى گاز تاراتۋ ستانتسيالارىنىڭ (اگتس) قۇرىلىسى جۇرگىزىلۋدە. ولاردىڭ جالپى قۇنى – 41,9 ميلليارد تەڭگە. سونىمەن قاتار, مويىنقۇم اۋدانىنىڭ ەلدى مەكەندەرىن گازداندىرۋ جوباسى باستالىپ, جوسپارداعى 9 اۋىلدىڭ باستاپقى ۇشەۋىنە (ايدارلى, بىرلىك, بينازار) جالپى قۇنى 18,5 ميلليارد تەڭگەنى قۇرايتىن گاز قۇبىرلارىن سالۋ جۇمىستارى جۇرگىزىلىپ جاتىر», دەيدى وبلىس اكىمدىگىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى دامير تۇڭعاتوۆ.
