د.يسابەك نە جازسا دا قاراپايىم ادامنىڭ جان-دۇنيەسىن اقتارىپ, كوز الدىڭا تارتادى. «شيەلىنىڭ قاۋىندارى» شىققاندا تەمىرجول بەكەتىندە تەڭكيىپ جاتقان سارى قاۋىن ءتىل ۇيىرسە, قالامگەر ءومىردىڭ ءتاتتىسىن ەمەس, اششىسىن كورسەتىپ تۇرعانىن دا كەيىن بىلدىك. سول سارى قاۋىن قازىرگى ساعىنىشىمىز, قاۋىندىقتىڭ ورنى مۇناي مەن ۋران القابىنا اينالىپ, بايقوڭىردىڭ بەلگىسىز بولاشاققا جول سىلتەرىن دە اۆتور ەرتە ەسكە سالىپ, شىعارمانىڭ كوركەمدىك شەشىمى ۋداي شىندىققا اينالىپ تۇر. بۇل – ادەبيەتتىڭ ۇلى مۇراتى.
د.يسابەك – 60-جىلدار پروزاسىنا قارعىن بوپ كەلگەن قالامگەر. كەمەلدەنگەن سوتسياليزم ادامدارىن جەرىنە جەتكىزە سۋرەتتەپ, جان-دۇنيەسىندەگى قىرتىس-تىرتىستى ۇشكىر قالامنىڭ ۇشىمەن كەيىپكەر عىپ ءۇيىرىپ, الەۋمەتتىك ءمانى زور وبرازدار گالەرەياسىن جاسادى. «ەسكەرتكىش», «سوتسياليزم ءزاۋلىمى», «كونفرونتاتسيا», «وكپەك جولاۋشى» شىعارمالارى قوي باققان قارا قازاق پەن تراكتور جۇرگىزىپ, كوڭىلىن دەمدەگەن اۋىل ادامىنىڭ بەينەسى, ولاردىڭ بويىندا بۇعاۋلى قوعامعا دەگەن ىشتەي قارسىلىق پەن تۇلكى زاماننىڭ ساياساتىن تۇسىنە المايتىن داراقىلىق بار. «ەل تىلەگى – ەلۋ ميلليون» دەگەن پارتيانىڭ جىمىسقى ساياساتىنا دا امالسىز مويىنسۇنعاندار سولار ەدى. اۋەلى «گاۋھارتاستى» كىتاپتان وقىپ, كەيىن كينو عىپ كورگەن وقىرماننىڭ جانى قالاي شىرقىراسا, شال مەن بالا – بولاشاق پەن وتكەن ءومىر تاعدىرى «دەرمەنە» ارقىلى قوعامدا ۇدەرىس تۋعىزدى.
ءيا, دۋلات يسابەك قانقۇيلى سوعىس باستالعاندا اكەلەرىن مايدانعا اتتاندىرىپ سالعان «جەتى جەتىمنىڭ» ءبىرى بولسا, ء«بىز سوعىستى كورگەن جوقپىز» شىعارماسى اكە كورمەي وسكەن ۇرپاقتىڭ سوعىسقا ايتقان قارعىسى دەر ەدىم.
قوش, قازاق ادەبيەتىنە «قارعىن» بوپ كەلگەن دارا تۇلعا! «ادەبيەتشىنىڭ ءوزى, پروزانىڭ كوزى, سىنشىنىڭ وتكىر ءسوزى بولا بىلگەن قۋاندىق ءىنى-دوسقا اۆتوردان سىي بولسىن! دۋلات يسابەك. 15.02.2012.» دەپ قولتاڭبا قالدىرعان «قارعىن» اتتى كىتابىڭىز كىتاپحانامنىڭ تورىندە تۇر. اقىل قوسقان اعا, ۇلكەن جولداعى ۇستاز, ءازىلى جاراسقان اق كوكىرەك زامانداس, ءسىز ادەبيەت الەمىنىڭ تورىندەسىز. ءبىز – يسابەك الەمىنەن سۋسىنداپ وسكەن ۇرپاقپىز. ونىڭ الەمى وزگەشە...
قۋاندىق تۇمەنباي,
جازۋشى,
«ايبوز» ۇلتتىق ادەبي سىيلىعىنىڭ لاۋرەاتى
