سوناۋ سوعىس جىلدارىندا تۋعان قابىرعالى قالامگەردىڭ ەسىمى ەلگە ەرتە تانىلدى. قولىنا قالام ۇستاپ, ۇلت ءومىرىنىڭ كوركەم سۋرەتىنەن تۇراتىن العاشقى اڭگىمەلەرىمەن-اق اعا بۋىندى ەلەڭ ەتكىزگەن كلاسسيك جازۋشى قالىڭ ەلى قۋانسا – بىرگە قۋاندى, قايعىرسا – قايعىسىن ءبولىستى. تۇڭعىش جاريالانعان «جولدا», «شويىنقۇلاق» اڭگىمەلەرىنەن باستاپ قالامىنان تۋعان قاداۋ-قاداۋ تۋىندىلارى وقىرمان ولجاسىنا اينالعانى امبەگە ايان. «گاۋھارتاسى» مەن «دەرمەنەسى», «تىرشىلىگى», «قارعىنى» مەن «وكپەك جولاۋشىسىنىڭ» قاي-قايسىسى بولسىن وقىرمان ءسۇيىپ وقىعان, حالىقتىڭ ريزاشىلىعىنا بولەنگەن بىرەگەي شىعارمالار.
بىرنەشە حيكايالارى نەگىزىندە كوركەم فيلم ءتۇسىرىلىپ, ەل اراسىنا كەڭ تارالعانى دا جۇرتتىڭ ىستىق ىقىلاسىنان بولسا كەرەك.
اسقار تاۋعا بەرگىسىز ورلىك, كىسى بالاسى كورمەۋگە ءتيىس قورلىق, ءومىر بويىنا, عۇمىر نۇرىنا جەتەتىن ىزگىلىك پەن ساعىنىش ادام تۇگىلى ايۋانعا تىلەمەيتىن قاتىگەزدىك جانە ز ۇلىمدىقپەن كەسكىلەسكەن شىعارمالارى وقىرماننىڭ رۋحاني قۇبىلاسىنا اينالعانىن اڭداۋ قيىن ەمەس. سوندىقتان بولار, قازاق دراماتۋرگياسىن الەم ەلدەرىنىڭ ساحناسىنا شىعارىپ, كەڭىنەن تانىتقان يسابەكوۆ پەسالارى قويىلماعان ەل از بۇگىندە. ادام جانىنا تەرەڭ ۇڭىلەتىن شيەلەنىستى شىعارمالارى ارقىلى قازاق دراماتۋرگياسىن جاڭا دەڭگەيگە كوتەرگەن قالامگەردىڭ قازاسى – ۇلت رۋحانياتىنداعى ورنى تولماس وكىنىش.
ارىسىن جوقتاپ, اقتىق ساپارعا شىعارىپ سالعان ەلدىڭ قايعى-قاسىرەتىنەن الاتاۋدىڭ كەۋدەسى قارس ايىرىلىپ, قارالى جۇرت كۇڭىرەنىپ كەتتى. مارقۇمدى اللا پاناسىنا الىپ, الدىنان جارىلقاسىن!
«Egemen Qazaqstan» قالامگەرلەرى
