سۋرەت: dknews.kz
«بىلتىر ەنەرگەتيكالىق جانە كوممۋنالدىق ينفراقۇرىلىمدى جاڭعىرتۋعا ارنالعان ۇلتتىق جوبا قابىلداندى. بۇل جوبا اياسىندا ونەركاسىپ سالاسىن دامىتۋ ءۇشىن جاڭا ونىمدەر شىعارۋ دا قولعا الىنباق. وتاندىق كاسىپورىندار نەگىزگى سۇرانىستىڭ 40 پايىزىن عانا وتەي الادى», دەدى مەملەكەت باسشىسى.
جولداۋدى ىسكە اسىرۋ شارالارىنىڭ ءبىرى رەتىندە «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى قولعا الىندى. ۆيتسە-پرەمەر قانات بوزىمباەۆ جوبانى ىسكە اسىرۋ جونىندەگى جوبالىق كەڭسەنىڭ العاشقى وتىرىسىندا ۇلتتىق جوبا ينفراقۇرىلىمنىڭ توزۋ دەڭگەيىن تومەندەتۋگە, كوممۋنالدىق قىزمەتتەردى ۇزدىكسىز ۇسىنۋدى قامتاماسىز ەتۋگە باعىتتالعانىن ايتقان بولاتىن.
قازىر جىلۋ, ەلەكتر ەنەرگياسى, سۋمەن جابدىقتاۋ, سۋ بۇرۋ سالالارىندا قىزمەت كورسەتەتىن 87 مونوپوليست كاسىپورىنداعى ەنەرگەتيكالىق, كوممۋنالدىق ينفراقۇرىلىمنىڭ توزۋ دەڭگەيى 65%-دان 100%-عا دەيىن جەتكەن. وسىعان بايلانىستى جوبالىق كەڭسەگە ينجەنەرلىك جەلىلەر توزۋىن 40%-عا دەيىن تومەندەتۋ, ەلەكتر ەنەرگياسىن ءوندىرۋدىڭ جاڭا كوزدەرىن (قوسىمشا 7,3 گۆت) سالۋ مىندەتى قويىلدى.
«2029 جىلعا دەيىن كوممۋنالدىق جەلىلەردى جاڭعىرتۋعا ينۆەستيتسيالىق قاجەتتىلىك 6,8 ترلن تەڭگەنى, ەلەكتر ەنەرگياسىن وندىرۋگە 6,2 ترلن تەڭگەنى قۇرايدى. ەكىنشى دەڭگەيلى بانكتەردەن, ۇلتتىق قارجىلىق دامۋ ينستيتۋتتارىنان, حالىقارالىق قارجى ۇيىمدارىنان قاراجات تارتىلادى. تابيعي مونوپوليا سۋبەكتىلەرىن قارجىلاندىرۋ تەتىگىن قۇرۋ, جەڭىلدەتىلگەن قارجىلاندىرۋعا نەمەسە سۋبسيديالاۋعا وتىنىمدەردى قاراستىرۋ «بايتەرەك» ۇبح» اق-عا جۇكتەلگەن. جوبالاردىڭ جۇزەگە اسىرىلۋ بارىسىنا, قۇرىلىس-مونتاجداۋ جۇمىستارىنا باقىلاۋ جۇرگىزۋ «تكش قازورتالىق» اق-نىڭ قۇزىرەتىنە بەكىتىلگەن», دەدى ۇكىمەت باسشىسىنىڭ ورىنباسارى.
ۇلتتىق جوبادا وتاندىق ونەركاسىپتىڭ دامۋىنا ەرەكشە نازار اۋدارىلىپ, جۇمىس ىستەپ تۇرعان كاسىپورىنداردى 100% جۇكتەۋمەن قاتار, 27 جاڭا ءوندىرىس ورىندارىن اشۋ, جۇمىس ورىندارىن قۇرۋ جوسپارلانعان. ونەركاسىپ جانە قۇرىلىس مينيسترلىگىنە وتاندىق تاۋار وندىرۋشىلەر وندىرەتىن تاۋارلار, جۇمىستار, قىزمەتتەر ءتىزىمىن ازىرلەۋ, جوسىقسىز قاتىسۋشىلار ءتىزىمىن ەنگىزە وتىرىپ, ساتىپ الۋدىڭ بىرىڭعاي ەلەكتروندىق نىسانىن ەنگىزۋ تاپسىرىلدى.
بۇل رەتتە حالىقتىڭ الەۋمەتتىك تۇرعىدان وسال ساناتتارىن قولداۋ شارالارى دا ءجيى ايتىلىپ ءجۇر. تولەم قابىلەتى بار توپتار كوممۋنالدىق قىزمەتتەردى ءادىل, نارىقتىق تاريفتەر بويىنشا تولەۋى كەرەك. وسال ساناتتاعىلار تۇرعىن ءۇي اۆتوماتتاندىرىلعان جۇيەسى ارقىلى تاريفتەردىڭ وسۋىنەن قورعالۋعا ءتيىس دەيدى ماماندار.
ەنەرگەتيكا جانە كوممۋنالدىق شارۋاشىلىق سالاسىنداعى پروبلەمالار ەڭ وزەكتى ماسەلەلەردىڭ ءبىرى, ولار كەشەندى ءارى جەدەل شەشۋدى تالاپ ەتەدى. ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن, ۇيىمدارمەن بىرلەسە وتىرىپ, ۇلتتىق جوبانى ىسكە اسىرۋدىڭ جول كارتاسىن ازىرلەدى. جوبانى ءساتتى جۇزەگە اسىرۋعا مينيسترلىكتەر, اكىمدىكتەر مەن جەكە سەكتوردىڭ ءوزارا ىنتىماقتاستىعى, سونداي-اق ازاماتتاردىڭ بەلسەندى قاتىسۋى قاجەت.
