سۋرەتتى تۇسىرگەن – جانگەلدى ابدىعالىم
وبلىس اكىمىنىڭ گرانتىن جەڭىپ العان جاس كاسىپ يەلەرى ءتۇرلى باعىتتا ەل ەكونوميكاسىنا ۇلەس قوسىپ ءجۇر. گرانت يگىلىگىن الەۋمەتتىك توپقا جاتاتىن جانداردا دا سەزىنىپ وتىر. گرانت تاعايىنداۋ كەزىندە كوبىنە ءبىلىم بەرۋ, وڭالتۋ ورتالىقتارى, جارتىلاي دايىن تاعامدار مەن كونديتەرلىك ونىمدەر ءوندىرىسى, شارۋا قوجالىقتارى سىندى جوبالار كوپ قولداۋعا يە بولادى.
قاراعاندى وبلىسى بويىنشا ەڭبەك ۇتقىرلىعى ورتالىعىنىڭ ديرەكتورى نۇرجان سىزدىقوۆتىڭ ايتۋىنشا, گرانت يەگەرى اتانۋدىڭ العاشقى مىندەتتى شارتى – «باستاۋ بيزنەس» كاسىپكەرلىك نەگىزدەرى كۋرسىنان ءوتىپ, سەرتيفيكات يەمدەنۋ. ونى ونلاين وقۋعا دا مۇمكىندىك قاراستىرىلعان.
– گرانت الۋعا الەۋمەتتىك وسال توپ وكىلدەرى – كوپبالالى وتباسىلار, مەملەكەتتىك جاردەماقى, اسىراۋشىسىنان ايىرىلۋ جاعدايى بويىنشا الەۋمەتتىك تولەم الۋشىلار, مۇگەدەكتىگى بار ادامدار, مۇگەدەكتىگى بار بالالاردىڭ اتا-انالارى نەمەسە قامقورشىلارى, قانداستار, قونىس اۋدارۋشىلار قاتىسا الادى. ول ءۇشىن جۇمىسسىز رەتىندە تىركەلۋ نەمەسە ءۇش جىلدان اسپايتىن مەرزىمگە جەكە كاسىپكەر مارتەبەسىنە يە بولۋ كەرەك. گرانت قاراجاتى بيزنەس يدەيالاردى جۇزەگە اسىرۋعا نەمەسە دامىتۋعا قايتارىمسىز نەگىزدە بەرىلەدى, – دەيدى نۇرجان حاميت ۇلى.
بيىل حالىقتىڭ وسال توبىنا جاتاتىن 183 ادام 400 ايلىق ەسەپتىك كورسەتكىش كولەمىندە وسىنداي قايتارىمسىز گرانتقا يە بولادى. ەڭبەك نارىعىن دامىتۋدىڭ 2024–2029 جىلدارعا ارنالعان تۇجىرىمداماسىنا سايكەس وبلىس بويىنشا 353 880 مىڭ تەڭگە بولىنگەن. كونكۋرستىڭ باستالۋ مەرزىمى ازىرگە بەلگىسىز.
حالىقتىڭ الەۋمەتتىك وسال توبىنداعى جانداردىڭ مەملەكەت قولداۋىمەن گرانت الىپ, كاسىپ باستاپ جاتقانى ءبىرىنشى رەت ەمەس. بىلتىر وبلىستىڭ وسىنداي ساناتتاعى 178 ادامى كاسىپكەر اتاندى. سولاردىڭ قاتارىندا قاراعاندىلىق شىنار تەن مەن ادەلينا بيتيۋكوۆا بار. بۇرىن ولار جۇمىسسىز ەدى. قازىر گرانت كومەگى ارقىلى كاسىبىن دوڭگەلەتىپ وتىر, جۇمىستارىندا كىدىرىس جوق.
قايتارىمسىز گرانتتىڭ كومەگىمەن «NeuroTen» نەيروكوررەكتسيالىق ورتالىق اشقان شىنار تەن – 10 جاستاعى ەرەكشە بالانىڭ اناسى. جۇبايى الەكساندر تەن ەكەۋى بالالارىن وڭالتۋدىڭ ءتۇرلى ءتاسىلىن جۇزەگە اسىرعان. باسقا دا بالالارعا كومەكتەسكىسى كەلگەن ولار وسىنداي كاسىپتى جولعا قويعان.
– گرانت اقشاسىن سەنسورلىق-ديناميكالىق كۋبقا ارنالعان مەتالل كونسترۋكتسيانى, بەيىمدىك دەنە شىنىقتىرۋعا ارنالعان قۇرال-جابدىقتاردى ساتىپ الۋعا جۇمسادىق. بۇل جابدىقتاردىڭ بالالاردىڭ ۆەستيبۋليارلىق, تاكتيلدىك جۇيەسىن دامىتۋعا بىردەن-ءبىر كومەگى بار. قالىپتى بالالاردا مۇنداي داعدىلار بالالار الاڭدارىندا تابيعي تۇردە داميدى, ال ەرەكشەلىكتەرى بار بالالارعا ارنايى جاعدايلار جاساپ, دامىتۋ قاجەت, – دەيدى ش.تەن.
ءبىرىنشى ورتالىعىن كاسىپكەر بىلتىر ساۋىردە اشقان. تامىزدا گرانت كونكۋرسىنا قاتىسىپ, ۇتىپ العان قاراجاتىنا ەكىنشى ورتالىعىن جابدىقتاعان. ويتكەنى كومەككە ءزارۋ ەرەكشە قاجەتتىلىگى بار بالالار كوپ. ورتالىقتا لوگوپەد-دەفەكتولوگ, پسيحولوگ جۇمىس ىستەيدى. كاسىبىن كەڭەيتكەن سوڭ ون ادامعا جۇمىس بەرگەن. الداعى ۋاقىتتا كۇندىزگى ستاتسيونار اشۋ جوسپارلارىندا بار. ەرەكشە بالالار كۇنى بويى سول جەردە بولادى, قاجەتتى شارالاردىڭ بارىنەن وتەدى. اتا-انالار بالانىڭ جانىندا ۇنەمى بولا المايدى. بۇل فيزيكالىق, پسيحيكالىق تۇرعىدان وتە اۋىر.
«قالاي دەگەندە دە, بالاعا الەۋمەتتەنۋ كەرەك. بۇل ستاتسيوناردا بالاباقشا سياقتى ءبىر تاربيەشىگە 25 بالادان ەمەس, ءار بالاعا ءبىر پەداگوگتەن بولۋى كەرەك», دەيدى كاسىپكەر.
كاسىپكەردىڭ ەكى ورتالىعى دا – قالانىڭ مايقۇدىق بولىگىندە. قازىر ولارعا سۇرىپتاۋ ستانساسىنان, تەمىرتاۋدان, دوسكەي, كوكپەكتى سەكىلدى اۋىلدان بالالار بارىپ ءجۇر. كاسىپكەر ورتالىقتىڭ جاڭا فيليالدارىن قالانىڭ باسقا اۋداندارىنان اشقىسى كەلەتىنىن ايتادى.
اتا-انالاردىڭ قىزىعۋشىلىعىن تۋدىرىپ وتىرعان ادىستەمەلىكتى كاسىپكەر وتباسىنىڭ وزدەرى جاساعان. ءار بالانىڭ جاعدايىنا قاراي جەكە باعدارلاما ازىرلەگەن. ورتالىقتاعى بالا ءار كەزەڭ سايىن جەتىلىپ, باسقاسىنا كوشىپ وتىرادى. اۆتورلىق ادىستەمەسىن ءۇش-ءتورت جاسقا وقىتىپ, دايارلاپتى. ولار قازىر ورتالىقتا جەمىستى جۇمىس ىستەپ ءجۇر. ورتالىق جەتەكشىسى بالالاردان بولەك, ولاردىڭ اتا-انالارىمەن دە جۇمىستىڭ ماڭىزى زور ەكەنىن ايتادى.
– بەيىندىك دەنە شىنىقتىرۋ كادىمگى دەنە شىنىقتىرۋ ەمەس, ودان اۋقىمدى. مەنىڭ ادىستەمەمنىڭ نەگىزىندە بەرىك ءتارتىپ بار. وسىندا كەلگەندە ورىنداپ, ۇيدە اكە-شەشەسى بالانىڭ ىڭعايىنا جىعىلسا, ناتيجە شىقپايدى. بالانىڭ بويىنداعى جاعىمسىز ارەكەتتەر تۇزەلمەيدى. بۇل جەردە بالانىڭ جۇمىسى بىتپەيدى. ونى ۇيدە جالعاستىرۋ كەرەك. تۇرمىستىق, الەۋمەتتىك ماشىقتار, بالانىڭ تاماقتانۋى, دۇرىس كۇن رەجىمى ەسكەرىلىپ, كەشەندى بولعانى دۇرىس. تۇراقتى كەلىپ جۇرگەن 75 اتا-انامىز بار, – دەيدى ش.تەن.
25 جاستاعى ادەلينا بيتيۋكوۆا – ءىى توپتاعى مۇگەدەك. بىراق كاسىبىن باستاۋعا ەشتەڭە كەدەرگى جاسامادى. ونىڭ اشقان شىعارماشىلىق ورتاسى ۇلكەنگە دە, كىشىگە دە پايدالى. شىعارماشىلىق كەڭىستىكتە سۋرەت سالادى, تافتينگپەن اينالىسادى, كيىمدەردى وڭدەيدى. مۇندا كەلەتىندەردىڭ ەڭ كىشكەنتايى – التى جاستا.
– ءبىز قۇممەن, سۋدا سۋرەت سالۋمەن, كيىمدەردى وڭدەۋمەن, تافتينگپەن (كىلەم تىگۋ ونەرى) اينالىسامىز. تافتينگ – ەندى قولعا الىنا باستاعان جاڭا سالا. ازىرگە ونىمەن اينالىساتىن ءبىز عانا. گرانت قاراجاتىنا تافتينگ جابدىعىن ساتىپ الدىق. كاسىبىمىزدى دامىتىپ, ورتالىعىمىزدى جاڭا باعىتتارمەن تولىقتىرىپ كەلەمىز. ءبىرشاما جوبامىز بار, – دەيدى ا.بيتيۋكوۆا.
جاس كاسىپكەر قايتارىمسىز گرانت تۋرالى Instagram الەۋمەتتىك جەلىسىنەن ءبىلىپتى. «باستاۋ بيزنەستى» وقىپ, سەرتيفيكاتىن العان سوڭ يدەياسىن بيزنەس جوسپار تۇرىندە ۇسىنعان. بۇعان دەيىن سۋرەت سالۋدى بالالارعا ۇيىندە ۇيرەتىپ ءجۇرىپتى. تەك شىعارماشىلىق ورىننىڭ جوقتىعى كەدەرگى كەلتىرىپ كەلگەن. گرانت سونى جۇزەگە اسىرۋعا مۇمكىندىك بەرگەن. ادەلينا ءوزى سەكىلدى شىعارماشىل بەس ادامدى جۇمىسپەن قامتىپ وتىر.
كوپبالالى, الەۋمەتتىك وسال توپتاعى وتباسىلاردىڭ بالالارى ستۋديادا تەگىن وقيدى. ورتالىقتا كورمەلەر, ويىن كەشتەرى, ءتۇرلى ءىس-شارا ءجيى ۇيىمداستىرىلادى.
قاراعاندى وبلىسى
