دەرەكتەرگە زەر سالساق, مۇگەدەكتىگى بويىنشا مەملەكەتتىك الەۋمەتتىك جاردەماقى الاتىن ازاماتتاردىڭ سانى – 541,7 مىڭ, اسىراۋشىسىنان ايىرىلعانىنا بايلانىستى كومەك الاتىندار – 193,3 مىڭ ادام. مۇندا مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىك توبىنا, سەبەبىنە, سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنىڭ شاماسىنا بايلانىستى بولادى. اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ اسىراۋىنداعى ادامداردىڭ سانىنا, قايتىس بولۋ سەبەپتەرىنە, ەڭ تومەن كۇنكورىس دەڭگەيىنە قاراي بەلگىلەنەدى.
بۇدان بولەك, مىندەتتى الەۋمەتتىك ساقتاندىرۋ جۇيەسىنە قاتىسۋشىلاردا الەۋمەتتىك تاۋەكەلدەر تۋىنداعان جاعدايدا مەملەكەتتىك الەۋمەتتىك ساقتاندىرۋ قورىنان الەۋمەتتىك تولەمدەر تولەنەدى. 1 اقپانداعى جاعداي بويىنشا 86,1 مىڭ ادام ەڭبەك ەتۋ قابىلەتىنەن ايىرىلعانىنا بايلانىستى الەۋمەتتىك تولەم السا, 61,3 مىڭعا جۋىق وتباسى اسىراۋشىسىنان ايىرىلىپ, الەۋمەتتىك تولەم العان. بۇل تولەمدەردىڭ مولشەرى سوڭعى ەكى جىلداعى ماسق-عا الەۋمەتتىك اۋدارىمدار جۇرگىزىلگەن ورتاشا ايلىق تابىسقا, ەڭبەككە قابىلەتتىلىگىنەن ايىرىلۋ كوەففيتسيەنتتەرىنە, اسىراۋىنداعى ادامدار سانىنا, مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە, تابىستى اۋىستىرۋىنا قاراي بەلگىلەندى. تولەمدەر رەسپۋبليكالىق بيۋدجەتتەن تولەنەتىن ۇقساس جاردەماقىلارعا قوسىمشا جۇرەدى.
مۇگەدەكتىگى, اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قاڭتاردان باستاپ ەڭ تومەن كۇنكورىس دەڭگەيىنىڭ ۇلعايۋىنا بايلانىستى 6,5%-عا وسكەن. ەڭبەككە قابىلەتىنەن ايىرىلۋ, اسىراۋشىسىنان ايىرىلۋ بويىنشا مەملەكەتتىك الەۋمەتتىك ساقتاندىرۋ قورىنان تولەنەتىن تولەمدەردىڭ مولشەرى دە 6,5%-عا ارتقان. بيىل مۇگەدەكتىگى بويىنشا مەملەكەتتىك الەۋمەتتىك جاردەماقى مولشەرى 1-توپ ءۇشىن – 101 702 تەڭگە, 2-توپ ءۇشىن – 81 362 تەڭگە, 3-توپ ءۇشىن – 55 474 تەڭگە بولىپ بەلگىلەنگەن. 1 اقپانداعى جاعداي بويىنشا ەڭبەككە قابىلەتىنەن ايىرىلۋ بويىنشا الەۋمەتتىك تولەمدەردىڭ ورتاشا مولشەرى 71 245 تەڭگە, اسىراۋشىسىنان ايىرىلۋ بويىنشا تولەمدەر 72 214 تەڭگەنىڭ شاماسىندا بولدى.
بيىل اتاۋلى الەۋمەتتىك كومەككە (اەك) بيۋدجەتتەن 132,9 ملرد تەڭگە قاراستىرىلعان. اقپانداعى دەرەك بويىنشا 31,9 مىڭ وتباسىنداعى 169,1 مىڭ ادامعا 2,3 ملرد تەڭگە سوماسىنا ااك تاعايىندالعان. ااك-ءتىڭ نەگىزگى ماقساتى – ازاماتتاردى اقشالاي تولەممەن قولداۋ عانا ەمەس, وتباسىنىڭ ەڭبەككە قابىلەتتى مۇشەلەرىن جۇمىسپەن قامتۋعا جاردەمدەسۋدىڭ بەلسەندى شارالارىنا تارتۋ ارقىلى وتباسىن قيىن جاعدايدان شىعارۋ. مىسالى, ااك شەڭبەرىندە تابىسى كەدەيلىك شەگىنەن اسپايتىن ازاماتتارعا توقسان سايىن الەۋمەتتىك كومەك تاعايىندالادى.تابىسى از وتباسىنداعى 1-6 جاس ارالىعىنداعى ءار بالاعا 1,5 اەك مولشەرىندە اي سايىنعى قوسىمشا تولەم بەرىلەدى. 1 اقپاندا ااك الۋشىلار قاتارىنان مەكتەپ جاسىنا دەيىنگى 52 مىڭ بالاعا 305,1 ملن تەڭگە سوماسىندا قوسىمشا تولەم تاعايىندالدى. اەك-ءتىڭ تاعى ءبىر باعىتى – جۇمىسقا ورنالاستىرۋ. بۇل رەتتە ءوز ءىسىن اشۋعا نيەتتى وتباسىلارعا گرانتتار بەرۋ, بىلىكتىلىكتى ارتتىرۋ كۋرستارىنا جىبەرۋ (قاجەت بولعان جاعدايدا), باسقا دا تاسىلدەر ارقىلى جۇمىسپەن قامتۋعا جاردەمدەسۋ قاراستىرىلعان.
قازىردە ەل ازاماتتارى ااك تاعايىنداۋعا ءوتىنىشتى تۇرعىلىقتى جەرىندەگى مانساپ ورتالىعىندا, اۋىل وكرۋگىنىڭ اكىمىنە نەمەسە ەلەكتروندىق ۇكىمەت پورتالى (egov.kz) ارقىلى بەرە الادى. قورىتا كەلگەندە, 1 قاڭتاردان باستاپ ەلدەگى كەدەيلىك شەگى وڭىرلىك مەدياندىق تابىستىڭ 35% دەڭگەيىندە, بىراق وڭىرلىك ەڭ تومەن كۇنكورىس دەڭگەيىنەن 70%-دان تومەن ەمەس دەڭگەيدە ايقىندالدى.
