سۋرەت: ru.wikipedia.org
«ەل جاستارىنىڭ بىرلىگى – بەرەكە باستاۋى» اتاۋىمەن وتكەن كەزدەسۋگە «اۋىل» پارتياسىنىڭ توراعاسى, ءماجىلىس دەپۋتاتى سەرىك ەگىزباەۆ, ماجىلىستەگى «اۋىل» پارتياسى فراكتسياسىنىڭ دەپۋتاتى نيكولاي ارسيۋتين, ەلىمىزدەگى ءتۇرلى ەتنوس وكىلدەرى قاتىستى.
– كەز كەلگەن مەملەكەتتى اۋەلى ەكونوميكالىق, ساياسي الەۋەتىمەن باعالايمىز. الايدا ەلدىڭ ەڭ ءبىرىنشى بايلىعى – جەرگىلىكتى تۇرعىندارى. سول مەكەندەگى ىرزىقتى, مۇرانى, ۇلتتىق قۇندىلىقتى ساقتاپ, جەتكىزۋشى, ونىڭ ورىستەۋىنە نەگىز بولاتىن دا حالقى. اتا-بابامىز بىزگە باعا جەتپەس بىرلىكتى, ىنتىماقتى مۇرا ەتىپ قالدىردى. ونى ساقتاپ, ءارى قاراي ەسەلەپ, الەمگە ۇلگى ەتۋ بۇگىنگى جاستاردىڭ مۇراتى بولۋى كەرەك. قحا وسى ميسسيانى ورىنداۋدا وزىندىك ۇلەس قوسىپ كەلەدى, – دەدى س.ەگىزباەۆ.
«اۋىل» پارتياسى اسسامبلەيانىڭ ميسسياسىندا ايقىندالعان مەملەكەتتىك ساياساتتىڭ ستراتەگيالىق باعىتتارىن ۇنەمى قولداپ كەلەدى. ماسەلەن, پارتيا مۇشەلەرىنىڭ 20%-عا جۋىعى, پارلامەنت ماجىلىسىندەگى دەپۋتاتتاردىڭ 12%-ى, ءماسليحات دەپۋتاتتارىنىڭ 10%-ى – ءتۇرلى ەتنوس وكىلدەرى. كەزدەسۋدە دە وزگە ەتنوس جاستارى پارتيا مۇشەلىگىنە ءوتتى. ولاردىڭ اراسىندا نەمىس قىزى البينا دەۆيۆىە بار.
– قاراعاندى وبلىسى قارقارالى اۋدانىنىڭ قاراكول اۋىلىندا, قاراپايىم شارۋانىڭ وتباسىندا دۇنيەگە كەلدىم. اكەم ۆيتالي, انام ناتاليا ەكەۋى بەس بالانىڭ جارقىن بولاشاعى ءۇشىن تاڭ اتقاننان كەش باتقانعا دەيىن تىنىم تاپپاي قوي-ەشكىنى باعىپ, ەڭبەك ەتىپ كەلەدى. كەڭەس وداعى ىدىراعان تۇستا, اكەمنىڭ تۋىستارى گەرمانياعا كوشىپ جاتقاندا, ءوز تۋعان جەرىن, اۋىلىن قيماي قالىپ قويعان. ەس بىلگەلى قازاقى تاربيەنى كورىپ, سالت-داستۇرىنە قانىعىپ وستىك. قازاق مەكتەبىنە بارىپ, ءتىپتى قازىر ە.ا.بوكەتوۆ اتىنداعى قاراعاندى ۋنيۆەرسيتەتىنىڭ جۋرناليستيكا فاكۋلتەتىندە قازاق توبىندا وقيمىن. مەن دە پارتياداعى اعا بۋىن وكىلدەرى سەكىلدى پرەزيدەنت باستامالارىنىڭ جۇيەلى ىسكە اسىرىلۋىنا ۇلەسىمدى قوسقىم كەلەدى, – دەي كەلە ول بالدىرعانداردىڭ وزگە تىلدە شۇلدىرلەۋىنە الاڭداۋشىلىق ءبىلدىردى.
ءوز كەزەگىندە پارتيا باسشىلىعى الداعى دەپۋتاتتىق ساۋالداردا ۇسىنىستاردىڭ ەسكەرىلەتىنىن جەتكىزدى.
