جوعارىداعى جاعدايدان كەيىن UFC باسشىلىعى رەيتينگتە 9-ورىندا تۇرعان ستيۆ ەرتسەگتىڭ ورنىنا دەرەۋ باسقا سپورتشىنى ىزدەدى. كوپ كەشىكپەي اسۋدىڭ قارسىلاسى رەتىندە اللان ناسيمەنتونىڭ ەسىمى اتالدى. «تازا سۇيەك» دەگەن بۇركەنشىك اتپەن تانىلعان 33 جاستاعى برازيليانىڭ وكىلى 2011 جىلدان بەرى ارالاس جەكپە-جەكتى سەرىك ەتەدى. بىراق كەيىننەن ناسيمەنتونىڭ باسقا بىرەۋمەن ايقاساتىنى بەلگىلى بولدى. قانداسىمىز ەندى پورتۋگاليالىق مانەل كاپەمەن كۇش سىناسادى. مانەل انگولادا تۋىپ, كەيىننەن پورتۋگالياعا قونىس اۋدارعان. 31 جاستاعى فايتەر ارالاس جەكپە-جەكتەگى تۇساۋكەسەر كەزدەسۋىن 2012 جىلدىڭ كوكتەمىندە وتكىزدى. بارلىعى 27 رەت ايقاس الاڭىنا شىعىپ, 20 رەت جەڭىسكە جەتتى. 17 باسەكەدە ايقىن باسىمدىق تانىتتى. بۇركەنشەك ەسىمى – «Starboy» («جۇلدىزدى جىگىت»). 2019 جىلى پيرەنەي تۇبەگىنەن كەلگەن كوكجال سايتاماداعى Rizin 20 تۋرنيرىندە كاي اساكۋرادان ايلاسىن اسىرىپ, سول پرومۋشەننىڭ چەمپيونى اتاندى. 2021 جىلى UFC-گە قابىلداندى. الەمدەگى ەڭ بەلدى ۇيىمداعى العاشقى ەكى كەزدەسۋىندە الەشاندرو پانتوجا مەن ماتەۋس نيكولاۋدان ۇتىلدى. ودان كەيىن ودە وسبورن, جالعاس جۇماعۇلوۆ, دەۆيد دۆوراك, فەليپە دوس سانتوسقا سان سوقتىردى. بىلتىر ەكى جەكپە-جەك وتكىزدى. جازدا مۇحامماد موكاەۆتان جەڭىلسە, قىستا برۋنو گۋستاۆو دا سيلۆانى ەسىنەن تاندىردى.
جامبىل وبلىسى سارىسۋ اۋدانىندا دۇنيەگە كەلگەن اسۋ الماباەۆ 25 قاڭتاردا 31 جاسقا تولدى. 2013 جىلدان بەرى كاسىپقويلار اراسىندا باق سىناپ ءجۇر. رەكوردى – 23 جەكپە-جەك, 21 جەڭىس, 12 نوكاۋت, 2 جەڭىلىس. اسۋ ءۇشىن 2017 جىل ءساتسىز بولدى. قازاق فايتەرى تاگير ۇلانبەكوۆ پەن مەحمان مامەدوۆتەن ۇتىلدى. ساتسىزدىكتەن ساباق العان الماباەۆ قاتارىنان 17 باسەكەدە باسىمدىق تانىتتى. 2019 جىلى م-1 Global پروموۋشەنىنىڭ ۋاقىتشا چەمپيونى اتاندى.
ۇزاق ۋاقىت بويى اسۆ, الاش پرايد, Tech-Krep, Fight Nights, نايزا, م-1 Global, Brave سەكىلدى ۇيىمداردا كۇش سىناسىپ, ءبىراز تاجىريبە جيناقتاعان اسۋ 2023 جىلعى 5 تامىزدا UFC-دەگى تۇساۋكەسەر كەزدەسۋىن وتكىزدى. نەشۆيلدە يامايكالىق ودا وسبورندى «قىلقىندىرۋ» تاسىلىمەن ۇتتى. بىلتىر امەريكالىق كارلوس ۆەرگارا, حوسە دجونسوندى, برازيليالىق ماتەۋس نيكولاۋدى تورەشىلەردىڭ شەشىمىمەن جەڭدى. وسى تابىستارىنىڭ ارقاسىندا رەيتينگتە 8-ورىنعا كوتەرىلدى.
قازىردە ماماندار الماباەۆتىڭ الەۋەتىن جوعارى باعالاپ وتىر. بۇل سالماقتىڭ چەمپيونى – الەشاندرە پانتوجا (برازيليا). برەندون رويۆال (اقش), برەندون مورەنو (مەكسيكا), ءامىر البازي (يران), كاي كارا-فرانس (جاڭا زەلانديا), تاتسۋرو تايرا (جاپونيا), مانەل كاپە (انگولا), الەكس پەرەس (اقش) سىندى ساڭلاقتار رەيتينگتە ءبىزدىڭ جىگىتتەن جوعارى تۇر. دەسەك تە اسۋدىڭ الار اسۋلارى ءالى الدا. وسى جەكپە-جەكتە جەڭىسكە جەتسە تاعى بىرنەشە ساتىعا بيىكتەيدى. جەڭىستى جولى جالعاسىن تاپسا, چەمپيوندىق تاجگە دە تالاساتىن بولادى.
