سۋرەت: halyq-uni.kz
ەرتىس-بايان ءوڭىرىنىڭ كوكونىس وسىرۋشىلەرى بىلتىر 176 مىڭ توننا ءسابىز جيناپتى. بۇل كولەم ەلىمىزدىڭ بارلىق ءوڭىرىن قامتۋعا جەتكىلىكتى. الايدا الەۋمەتتىك جەلىدە پاۆلودارلىق فەرمەرلەر ءوز ونىمدەرىن ەلىمىزدىڭ وڭتۇستىك وڭىرلەرىنە جىبەرە الماي وتىرعانىن, سەبەبى رەسەيدىڭ ارزان كوكونىسى ايماقتاردى جاۋلاپ العانىن جازىپ جاتىر. وندىرۋشىلەر ءسابىزدىڭ كيلوسىن ءتىپتى 65–85 تەڭگەدەن وتكىزە الماي وتىرمىز دەپ مۇڭ شاعادى. الەۋمەتتىك جەلىدە تاراپ كەتكەن بەينەجازبادان كوكونىس ساقتاۋ قويمالارىندا تاۋ-تاۋ بولىپ ءۇيىلىپ جاتقان ءسابىزدىڭ بۇزىلا باستاعانىن كورۋگە بولادى.
اگروونەركاسىپ كەشەنىندەگى اۋماقتىق ينسپەكتسيانىڭ رەسمي مالىمەتىنە سۇيەنسەك, پاۆلودار وبلىسىنا وزگە مەملەكەتتەردەن ءسابىز اكەلىنبەگەن.
«وڭىرلىك اۋىل شارۋاشىلىعى باسقارماسىنىڭ ماماندارى «راحمەت» بازارىنا مونيتورينگ جۇرگىزىپ, ونداعى ءسابىزدىڭ جەرگىلىكتى كوكونىس وسىرۋشىلەردەن عانا كەلىپ تۇسەتىنىن انىقتادى. فەرمەرلەردىڭ قويمالارىندا ءسابىز بارشىلىق. اۋىل شارۋاشىلىعى باسقارماسى ءونىمدى سىرتقا ساتۋعا كومەك كورسەتۋ تۋرالى اۋىل شارۋاشىلىعى, ساۋدا جانە ينتەگراتسيا مينيسترلىكتەرىنە, وبلىس اكىمدىكتەرى مەن الەۋمەتتىك-كاسىپكەرلىك كورپوراتسيالارىنا حات جازدى. وندا ءسابىزدىڭ كولەمى مەن شارۋا قوجالىقتارىنىڭ بايلانىستارى كورسەتىلگەن», دەپ حابارلادى پاۆلودار وبلىسى اكىمىنىڭ ءباسپاسوز قىزمەتى.
اۋىل شارۋاشىلىعى باسقارماسى باسشىسىنىڭ ورىنباسارى تولەگەن كوشەرباەۆ جاعدايدىڭ مۇنداي بولاتىنىن جىل باسىندا-اق بولجاعان ەدىك دەيدى. جاۋاپتى ۆەدومستۆولارعا حات جازىلعانىمەن, نارىقتا ازىرگە وزگەرىس بايقالمايدى. شارۋالار بىلتىر جيناعان ءونىمنىڭ 100 مىڭ تونناسىن عانا ساتىپ ۇلگەرگەن.
«وكىنىشكە قاراي, پاۆلودار, اقتوعاي, جەلەزين اۋداندارى مەن اقسۋ قالاسىنىڭ اۋىلدىق ايماعىنداعى كوكونىس ساقتاۋ قويمالارىندا 50 مىڭ توننا ءسابىز قالىپ وتىر. ءوڭىر تۇرعىندارى ءبىر جىلدا شامامەن 17 مىڭ توننا, ونىڭ ىشىندە قىس پەن كوكتەم كەزەڭىندە 10 مىڭ توننا ءسابىز تۇتىنادى. جەرگىلىكتى نارىقتاعى ءونىمنىڭ بارلىعى وزىمىزدىكى», دەيدى مەكەمە وكىلى.
شارۋالار ۇكىمەت وزگە ەلدەرمەن بايلانىس ورناتىپ, شۇعىل تۇردە ەكسپورت ماسەلەسىن شەشىپ بەرسە دەگەن تىلەك ايتادى. بولماعان جاعدايدا, ءونىم كۇن جىلىنا بۇزىلىپ, تۇتىنۋعا جارامسىز بولىپ قالادى. قازىردىڭ وزىندە قويمالار ولاردى ىرىكتەۋگە كوشكەن. ايتپاقشى, كورشى ەلدىڭ رەسمي اقپارات قۇرالدارىنا قۇلاق تۇرسەك, قاڭتاردا رەسەيدىڭ ۆولگوگراد وبلىسىنان 880 توننا ءسابىز ەلىمىزگە ساتىلعان. ال 2024 جىلى وزبەكستان قازاقستانعا 50 مىڭ توننادان استام ءسابىز ەكسپورتتاعان. ءبىر عانا پاۆلودار وبلىسى رەسپۋبليكادا ءوسىپ شىعاتىن ءسابىزدىڭ 40 پايىزىن بەرىپ وتىرعانىن ايتۋىمىز كەرەك. ال ول كولەم ەل حالقىنىڭ سۇرانىسىن ارتىعىمەن ورىندايدى.
بىراق باعا جاعىنان العاندا رەسەيدىڭ ءونىمى وتاندىق ونىمنەن ارزان. كورشىلەردە كارتوپتىڭ كوتەرمە باعاسى – 11 رۋبل (61 تەڭگە). سوعان وراي وتاندىق ءونىم ءىرى دۇكەندەر جەلىسىنەن تىقسىرىلىپ قالىپ جاتىر.
پاۆلودار وبلىسى
