سۋرەتتى تۇسىرگەن – اۆتور
سەنبىنىڭ تاڭىندا سامار اۋداندىق ىشكى ساياسات ءبولىمىنىڭ قىزمەتكەرلەرى مۇز ۇستىندە قارماق سالىپ وتىرعان دەمالۋشىلاردى ءوزارا سايىسقا تۇسۋگە شاقىرعان. نيەت بىلدىرگەندەردىڭ بارلىعىنا اۋەلى جارىستىڭ ەرەجەسى ءتۇسىندىرىلدى. ياعني ءبىر ساعاتتىڭ ىشىندە كىم كوپ بالىق اۋلايدى, سول جەڭىسكە جەتەدى. اۋلانعان بالىقتار سانىمەن ەمەس, سالماعىمەن ولشەنەدى. سونىمەن قاتار بالىق قاي قاتىسۋشىنىڭ قارماعىن ءبىرىنشى قابادى, وعان دا ارنايى سىيلىق قاراستىرىلعان. ەڭ ۇلكەن بالىق ۇستاعان قاتىسۋشى دا قۇر قايتپايدى دەپ شەشىلدى. ءسويتىپ, ءبىر ساعات ۋاقىت بەلگىلەنىپ, بالىقشىلار ءار-ءار جەرگە شوقيدى. باق سىناۋعا كىرىسكەن بالىقشىلاردىڭ ەڭ ۇلكەنى 72 جاستاعى ۆەرا دميتريەۆا بولسا, ەڭ جاسى 5-سىنىپ وقۋشىسى تورەجان ەرالى ەدى.
– بالىق اۋلاۋ – جان تىنىشتىعى. كۇندەلىكتى كۇيكى تىرلىكتى ءبىر ساتكە ۇمىتتىرادى. ال وسىنى كەرەمەتتەي جارىسقا ۇلاستىرىپ جاتقان ازاماتتارعا العىس ايتامىن, – دەيدى بالىقشى ءامىرحان ىحاي.
ءاپ-ساتتە بەلگىلەنگەن ۋاقىت اياقتالىپ, قازىلار القاسى اۋلانعان بالىقتى ەسەپتەۋگە كىرىسكەن. قورىتىندى بويىنشا, جارىسقا بەلسەنە قاتىسقان ءبىر ءۇيدىڭ بالالارى تورەجان ەرالى مەن ەرجان ەرالى «ەڭ جاس قاتىسۋشى» اتالىمىمەن ماراپاتتالىپ, باعالى سىيلىقتارعا يە بولدى. جۇلدەلى ءۇشىنشى ورىن جاندوس قايىربەكوۆكە بۇيىردى. ال ەكىنشى ورىنعا ءبىر ورىندى تاپجىلماي قارماق قاپتىرعان اندرەي ەككەل يەلەندى. ءبىر ساعاتتىڭ ىشىندە جالپى سالماعى ەكى كيلو بالىق اۋلاعان ءامىرحان ىحاي ءبىرىنشى ورىندى قانجىعاعا باستى. ايتىلعانداي, بايقاۋ مۇنىمەن اياقتالمايدى, الداعى ۋاقىتتا دا جالعاسىن تابادى. سۋدى جاعالاي جاتقان كورشىلەس اۋداندار دا جارىستى بىرلەسىپ ۇيىمداستىرۋعا ۇسىنىس ءبىلدىرىپ وتىر.
شىعىس قازاقستان وبلىسى,
سامار اۋدانى
