پاۆلودارداعى 75 ءبىلىم ورداسى ۋاقىتشا ينتەرنەتسىز قالدى

پاۆلودار. 7 اقپان. ءبىلىم جانە عىلىم مينيسترلىگىنەن تۇسكەن بۇيرىق نەگىزىندە, ە-learning وقىتۋ باعدارلاماسىنا قارجىلاندىرۋ توقتاتىلعاندىقتان پاۆلودار وبلىسىنداعى جالپى جانە كاسىپتىك ءبىلىم ءبىلىم بەرەتىن مەكتەپتەر مەن كوللەدجدەردى قوسقاندا 75 مەكەمە ينتەرنەتتەن ۋاقىتشا قول ءۇزدى. بۇل تۋرالى egemen.kz ءتىلشىسى حابارلادى. باعدارلامانى قارجىلاندىرۋ ەندى جەرگىلىكتى بيلىككە جۇكتەلەتىن كورىنەدى. بىراق, ءبىلىم باسقارماسىنىڭ حابارلاۋىنشا, ە-learning باعدارلاماسى قاي مەزگىلدە ىسكە قوسىلىپ, قارجىنىڭ قاشان بولىنەتىنى ازىرگە بەلگىسىز. جالپى, بۇل ەلەكتروندىق وقىتۋ باعدارلاماسى ەلىمىزدە 2010 جىلدان بەرى ىسكە اسىرىلۋدا. ەلەكتروندىق وقىتۋ جۇيەسى 4-10 مبيت/س جىلدامدىقتى قۇرايتىن كەڭجولاقتى ينتەرنەت جەلىسى ارقىلى جۇزەگە اسىرىلادى. سوندىقتان, وبلىس ورتالىعىنداعى كەيبىر مەكتەپ-كوللەدجدەر قازىر ۋاقىتشا «مەگالاين» جۇيەسىن قولدانۋدا. فاريدا بىقاي. دەرەك: egemen.kz. سۋرەت: alebedev.ru.