قانداۋىرى التىن دارىگەر

ەل ءۇشىن ەتكەن ەڭبەك ەشقاشان ۇمىتىلمايدى. كوزى تىرىسىندە-اق «قولى جەڭىل دارىگەر» اتانعان تىلەۋلەس باتىرحانوۆ اعامىز ءوز ءىسىن جەتە بىلگەن, ەلگە قالتقىسىز قىزمەت ەتكەن ازامات ەدى. وڭ­تايلاندىرۋ كەزىندە كەيبىر اتاعى شىققان ارىپتەستەرى جەكە ەمحانا اشۋعا تالپىنىپ, ۇزىن اقشانىڭ شىلبىرىندا كەتكەندە «ءبارىمىز پايدا قۋا بەرسەك, مىنا جۇرتتى كىم ەمدەيدى» دەپ كۇيىنەدى ەكەن. جاقىندا وتباسىنا اقجولتاي حابار كەلگەن. استانادا ءدارى­گەرلەردىڭ كاسىبي مەرەكەسى قار­ساڭىندا قازاقستاننىڭ مەدي­تسينالىق اسسوتسياتسياسى قۇرىل­عانىنا 25 جىل تولۋىنا ورايلاستىرىلىپ, «ەۋرازيالىق دەنساۋلىق كوپىرى-2015» اتتى حالىقارالىق فورۋم ءوتتى. اتالعان سالتاناتتا ۇزدىكتەر ماراپاتتالدى. ۇلتتىق مەديتسينالىق اسسوتسياتسياسىنىڭ ەڭ جوعارعى ماراپاتى «اVE VITAE» وردەنىن وسى جيىندا وڭتۇستىك وڭىرىنەن كەزىندەگى ەلەۋلى ەڭبەگى ەسكەرىلىپ, تىلەۋلەس تىلەن ۇلىنا بەرۋگە شەشىم قابىلداندى. جيىندا وردەن تىلەۋلەس اعانىڭ ۇلى اسقارعا تابىستالدى. وقىرماندارعا تۇسىنىكتىرەك بولۋ ءۇشىن دارىگەر جونىندە از-كەم ايتقان ورىندى شىعار. ءشامشى انىمەن بايتاق قازاقستانعا تانىس ارىس اۋدانى اقبۇلاق ەلدى مەكەنىندە دۇنيەگە كەلگەن تىلەۋلەس تىلەن ۇلى باتىرحانوۆ 1972 جىلى الماتى مەملەكەتتىك مەديتسينا ينستيتۋتىنىڭ ەمدەۋ ءىسى فاكۋلتەتىن ۇزدىك بىتىرگەننەن كەيىن ءومىرىنىڭ سوڭىنا دەيىن وڭتۇستىك ءوڭىرىنىڭ دەنساۋلىق ساقتاۋ سالاسىندا ءونىمدى قىزمەت جاساعان. «قر دەنساۋلىق ساقتاۋ ءىسى­نىڭ ۇزدىگى», «التىن دارىگەر» توسبەلگىسىنىڭ يەگەرى, مەديتسينا عىلىم­دارىنىڭ كانديداتى, جوعارى ساناتتى حيرۋرگ-تراۆماتولوگ, جوعارى ساناتتى الەۋمەتتىك گيگيەنا جانە دەنساۋلىق ساقتاۋدى ۇيىمداستىرۋ دارىگەرى. 1973-2006 جىلدارى وبلىسىمىزدىڭ, قالامىزدىڭ بىرقاتار دەنساۋلىق ساقتاۋ سالالارىندا, سونىڭ ىشىندە شىمكەنت قالالىق مەديتسينالىق جەدەل جاردەم اۋرۋحاناسى باس دارىگەرىنىڭ ورىنباسارى, كەيىن باس ءدا­رىگەرى قىزمەتىندە, وب­لىستىق كلينيكالىق بالالار اۋرۋحاناسى باس دارىگەرىنىڭ ورىنباسارى لاۋازىمىندا قىزمەت اتقارعان. التىن قولدى دارىگەر 2006 جىلى دۇنيەدەن وتسە دە ەسەلى ەڭبەگى ۇمىتىلعان جوق. ءبىر كەزدەرى ول كىسى قىزمەت ەتكەن وبلىستىق كلينيكالىق بالالار اۋرۋحاناسىنىڭ قابىرعاسىنا مەموريالدىق تاقتا ءىلىندى. باقتيار تايجان, «ەگەمەن قازاقستان». شىمكەنت.