سارىاعاشتاعى تارتىپسىزدىككە سەبەپ بولعان ادام قولعا ءتۇستى

استانا. 7 اقپان. وڭتۇستىك قازاقستان وبلىسى سارىاعاش اۋدانىنداعى ىنتىماق اۋىلىنىڭ تۇرعىنىن ءولتىردى دەگەن كۇدىك تاڭىلعان ادام كورشى وزبەكستان مەملەكەتىنىڭ اۋماعىنان ۇستالدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنە سىلتەمە جاساعان Tengrinews.kz ءتىلشىسى حابارلادى. «قازاقستان پوليتسياسىنىڭ كۇشىمەن وزبەكستان رەسپۋبليكاسى ىشكى ىستەر ورگاندارى قىزمەتكەرلەرىمەن بىرگە وڭتۇستىك قازاقستان وبلىسى ىنتىماق اۋىلىنىڭ تۇرعىنىن ولتىرۋگە كۇدىكتى ادام ۇستالىپ, قازاقستانعا ەكستراديتسيالاندى», - دەلىنگەن تاراتىلعان حابارلامادا. قازىرگى تاڭدا ۇستالعان ادام وڭتۇستىك قازاقستان وبلىسى ىشكى ىستەر دەپارتامەنتى تەرگەۋ وقشاۋلاعىشىندا وتىر. قىلمىستى تەرگەۋدى ىشكى ىستەر ءمينيسترىنىڭ تەرگەۋ دەپارتامەنتى مەن وبلىستىق ىشكى ىستەر دەپارتامەنتىنىڭ قىزمەتكەرلەرىنەن قۇرالعان ارنايى تەرگەۋ-جەدەل توبى جۇرگىزىپ جاتىر. ەسكە سالا كەتەيىك, 4 اقپان كۇنى سارىاعاش اۋدانىنىڭ بوستاندىق ەلدى مەكەنى ماڭىنان ىنتىماق اۋىلى تۇرعىنىنىڭ پىشاق سالىنعان دەنەسى تابىلدى. وسىعان بايلانىستى «كىسى ءولتىرۋ» بابى بويىنشا قىلمىستىق ءىس قوزعالدى. كەيىن پوليتسيا وقيعاعا كۇدىكتىنى انىقتادى. ول سارىاعاش اۋدانى بوستاندىق اۋىلىنىڭ 1976 جىلى تۋعان ن.نارمەتوۆ دەگەن تۇرعىنى بولىپ شىقتى. كۇدىكتى مارقۇمنىڭ جىلىجايىن جالعا العان ەكەن. سول كۇنى ولاردىڭ اراسىندا جالعا بايلانىستى كەلىسپەۋشىلىك ورىن العان. جانجالدىڭ سوڭى كۇدىكتىنىڭ جىلىجاي يەسىن ولتىرۋىمەن اياقتالعان. «5 اقپان كۇنى ب.ارتىقوۆتىڭ (قازا تاپقان ەر ادام) اۋىلداستارىنان تۇراتىن ءبىر توپ جىگىت ن.نارمەتوۆ تۇراتىن جەردە تارتىپسىزدىك جاسادى, سونىڭ سالدارىنان بىرنەشە اۆتوكولىك ورتەنىپ, اۋدارىپ تاستالدى. جاقىن ماڭداعى ۇيلەرگە زاقىم كەلدى. بۇدان كەيىنگى بۇزاقىلىق ارەكەتتەردى وقيعا ورنىنا كەلگەن پوليتسيا قىزمەتكەرلەرى توقتاتتى. قۇربان بولعاندار مەن زارداپ شەككەندەر جوق», - دەپ حابارلادى پوليتسەيلەر. قازىر وڭتۇستىك قازاقستان وبلىسىنىڭ سارىاعاش اۋدانىندا قوعامدىق ءتارتىپتى قامتاماسىز ەتۋ شارالارى جۇرگىزىلىپ جاتىر, جاعدايدى ىشكى ىستەر قىزمەتكەرلەرى باقىلاۋعا العان. قۇرىش نۇرىمبەت. دەرەك, فوتو: Tengrinews.kz.