فوتو: اشىق دەرەككوز
دەپۋتاتتىڭ پىكىرىنشە, مۇنداي قىزمەتتەرگە دەگەن جوعارى سۇرانىس «جاتتىقتىرۋشىلار», «بيزنەس-ترەنەرلەر» جانە كوبىنەسە قاجەتتى بىلىكتىلىكتەرى جوق باسقا دا مامانداردىڭ كوپتەپ پايدا بولۋىنا اكەلدى.
«پىكىرىمەن كوپشىلىك ساناساتىن «ماماندار» سانى كۇن ساناپ ءوسىپ كەلەدى, ولاردىڭ كەيبىرەۋلەرى قاجەتتى ءبىلىمى مەن تاجىريبەسى جوق, كۋرستار مەن ترەنينگتەردى ساتۋعا كىرىسىپ, لەزدە ناتيجە بەرەتىنىنە ۋادە بەرەدى. بۇل ادامدار ساراپشى مارتەبەسىن يەلەنۋگە ۇمتىلادى, بىراق ولاردىڭ قىزمەتىندە كوبىنەسە ناقتى ساراپتامالىق نەگىز جوق. مۇنداي ارەكەتتەر ازاماتتاردى اداستىرىپ, قىزمەت كورسەتۋ ساپاسىنا نەگىزدى كۇمان تۋدىرادى جانە وسى سالاعا دەگەن سەنىمگە نۇقسان كەلتىرەدى. ماسەلەنىڭ اۋقىمدىلىعىن ازاماتتاردىڭ وتىنىشتەرىنىڭ سانى راستايدى: تەك 2024 جىلدىڭ وزىندە تۇتىنۋشىلاردىڭ قۇقىقتارىن قورعاۋ كوميتەتىنە ساپاسىز ءبىلىم بەرۋ قىزمەتتەرىنە قاتىستى 600-دەن استام شاعىم تۇسكەن. بۇل وسى سالاعا دەگەن سەنىمسىزدىكتىڭ جوعارى دارەجەسىن عانا ەمەس, ونى رەتتەۋدىڭ ناقتى قاجەتتىلىگىن دە كورسەتەدى», دەدى دينارا ناۋموۆا.
ونىڭ ايتۋىنشا, بۇل سالادا ءوز كليەنتتەرىنە ناتيجەگە جەتۋگە شىنايى كومەكتەسەتىن بىلىكتى ماماندار جۇمىس ىستەيدى. دەگەنمەن, «يلليۋزيا جاتتىقتىرۋشىلارى» دەپ اتالاتىن ادىلەتسىز ارەكەتتەردىڭ كوبەيۋى بۇكىل سالانى قابىلداۋعا تەرىس اسەر ەتەدى.
«ىسىنە ادال ەمەس پراكتيكتەردىڭ سەندىرە ايتاتىن ۋادەلەرىنىڭ قۇربانىنا اينالعان ازاماتتار بىزگە ءجيى جۇگىنەدى. اۋقىمدى تابىسقا تەز جەتۋ ءۇشىن كەيبىر ازاماتتار ءوز پروبلەمالارىنان شىعۋدىڭ جولىن ىزدەپ, «تەز بايۋ», «جاڭا ءومىر» نەمەسە ء«بىر ايدان كەيىن ارمانداعان مانساپ» ۋادەلەرىنە سەنىم ارتادى, قوماقتى قاراجات سالادى, كەيدە ءتىپتى وسى قىزمەتتەردى تولەۋ ءۇشىن نەسيە الادى. ۇمىتتەرى اقتالماعان جاعدايدا ادامدار ۋادە ەتىلگەن ناتيجەگە قول جەتكىزۋ مۇمكىن ەمەس ەكەنىن جانە ولاردىڭ قۇقىقتارىن قورعاۋ مەحانيزمدەرى ءىس جۇزىندە جوق بولعاندىقتان, اقشالارىن قايتارا المايتىنىن تۇسىنەدى», دەدى دەپۋتات.
دينارا ناۋموۆا بۇل سالاداعى رەتتەۋدىڭ جوقتىعىنان ماسەلە ۋشىعىپ تۇرعانىن اتاپ ءوتتى. ناقتى ستاندارتتار مەن بىلىكتىلىك تالاپتارىنىڭ بولماۋى كەز كەلگەن ادامعا ءوزىن جاتتىقتىرۋشى دەپ اتاۋعا مۇمكىندىك بەرەدى, بۇل الاياقتىققا جاعداي جاسايدى. ناتيجەسىندە تۇتىنۋشىلار دا, ساپالى ماماندار دا زارداپ شەگەدى, ويتكەنى ولار جالپى سالاعا دەگەن سەنىمدى جوعالتادى.
ايتا كەتەيىك, الەمدىك تاجىريبە كورسەتكەندەي, بىرقاتار ەلدەردە مامانداردى سەرتيفيكاتتاۋ جانە اككرەديتتەۋ پروتسەسى قاتاڭ رەتتەلەدى. مۇنداي شارالار تۇتىنۋشىلاردىڭ قۇقىقتارىن قورعاپ قانا قويماي, كورسەتىلەتىن قىزمەتتەردىڭ ساپاسىن ايتارلىقتاي جاقسارتۋعا ىقپال ەتەدى. سەرتيفيكاتتاۋ ماماننىڭ بىلىكتىلىگى مەن كاسىبي قۇزىرەتتىلىگىن راستاۋ قىزمەتىن اتقارادى, بۇل ازاماتتاردىڭ سەنىمىن ارتتىرادى جانە ساپاسىز قىزمەتتەردى الۋ تاۋەكەلدەرىن ازايتادى.
دەپۋتات جوعارىدا ايتىلعاندارعا بايلانىستى كەلەسى شارالاردى قابىلداۋ مۇمكىندىگىن قاراستىرۋدى ۇسىندى.
«جاتتىقتىرۋشىلاردى, كوۋچتەردى جانە وزگەلەرگە ءبىلىم بەرۋمەن اينالىساتىن ءارتۇرلى مامانداردى مىندەتتى سەرتيفيكاتتاۋ جانە اككرەديتتەۋ جۇيەسىن دامىتۋ. مۇنداي جۇيە كاسىبي ستاندارتتارعا سايكەستىكتى قامتاماسىز ەتەدى جانە ازاماتتاردىڭ وسى قىزمەتتەرگە سەنىمىن ارتتىرادى. بارلىق ازاماتتارعا قولجەتىمدى بولاتىن سەرتيفيكاتتالعان مامانداردىڭ بىرىڭعاي ءتىزىلىمىن قۇرۋ. بۇل اشىقتىقتى جانە وقۋدى باستاماس بۇرىن ماماننىڭ بىلىكتىلىگىن تەكسەرۋ مۇمكىندىگىن قامتاماسىز ەتەدى. تۇتىنۋشىلاردىڭ قۇقىقتارىن قورعاۋ جانە ءتيىستى قىزمەتتەردى كورسەتۋ سالاسىندا جۇمىس ىستەيتىن سۋبەكتىلەردىڭ كاسىبي جاۋاپكەرشىلىگىن ارتتىرۋ ماقساتىندا رەتتەۋدى جەتىلدىرۋگە باعىتتالعان زاڭنامالىق باستامالاردى قابىلداۋ. بۇل شارالار ازاماتتارىمىزدى الاياقتىقتان قورعاۋعا كومەكتەسىپ قانا قويمايدى, سونىمەن قاتار قىزمەت كورسەتۋ ساپاسى جوعارى ستاندارتتارعا ساي كەلەتىن كاسىبي قوعامداستىقتىڭ قالىپتاسۋىنا جاعداي جاسايدى», دەدى د.ناۋموۆا.
