استانا. 7 اقپان. كرەملدە تۇندە رەسەي, گەرمانيا جانە فرانتسيا باسشىلارى ۆلاديمير پۋتين. انگەلا مەركەل جانە فرانسۋا وللاند اراسىنداعى بەس ساعاتقا سوزىلعان كەلىسسوز مارەسىنە جەتتى. بۇل تۋرالى «كوممەرسانت» حابارلادى.
«جۇمادان سەنبىگە قاراعان تۇنە ماسكەۋدە رف, گفر جانە فرانتسيا باسشىلارى ۆلاديمير ءپۋتيننىڭ, انگەلا مەركەلدىڭ جانە فرانسۋا وللاندتىڭ قاتىسۋىمەن وتكەن ۇشجاقتى كەلىسسوز اياقتالدى. ءۇش ەلدىڭ ليدەرلەرى مينسك كەلىسىمىنىڭ ورىندالۋىنا قول جەتكىزۋ, سونداي-اق بۇل كەزدەسۋدىڭ قورىتىندىلارىن جەكسەنبىدە تەلەفون ارقىلى «نورماند فورماتىندا» جۇرگىزىلەتىن اڭگىمەدە شىعارۋ تۋرالى كەلىستى», - دەپ جازادى باسىلىم وسى ورايدا.
ماسكەۋدە ءتۇننىڭ جارىمى اۋا اياقتالعان كەلىسسوزدىڭ الدىن الا قورىتىندىلارى تۋرالى ءبىرىنشى بولىپ رف پرەزيدەنتىنىڭ ءباسپاسوز حاتشىسى دميتري پەسكوۆ ايتىپ بەردى. ول كەلىسسوزدىڭ سيپاتىن «جۇيەلى, مازمۇندى جانە شەشىمدى» دەپ اتاپ كورسەتتى. ونىڭ نەمىس جانە فرانتسۋز ارىپتەستەرى دە وسىنداي پىكىردە بولدى.
«قازىرگى تاڭدا مينسك كەلىسىمىن جەتىلدىرە ءتۇسۋ بويىنشا ىقتيمال بىرلەسكەن قۇجات ءماتىنىن دايىنداۋ ءۇشىن بىرلەسكەن جۇمىستار جۇرگىزىلۋدە. ول ۋكراينا پرەزيدەنتىنىڭ ۇسىنىستارى قوسىلعان جانە بۇگىن رف پرەزيدەنتى ۆلاديمير ءپۋتيننىڭ وعان قوسىلىپ, ءبىر ىزگە تۇسىرىلگەن ۇسىنىستارىن قامتيتىن قۇجات بولادى», - دەپ مالىمدەدى دميتري پەسكوۆ. قورىتىندى ماتىندە ءۇش تاراپتىڭ تالاپتارى ەسكەرىلەدى: ءسال كەيىنىرەك ءدال وسىنداي مالىمدەمەمەن گفر كانتسلەرىنىڭ ءباسپاسوز حاتشىسى شىعىپ سويلەپ, ءماتىننىڭ «انگەلا مەركەل مەن فرانسۋا وللاند بەرگەن ۇسىنىستار» نەگىزىندە جاسالاتىنىن اتاپ ءوتتى.
وسىمەن بىرگە, رف ءباسپاسوز حاتشىسىنىڭ ايتۋىنشا, ءماتىن «قولداۋ الۋ ءۇشىن» بارلىق تاراپتارعا جىبەرىلەدى, ال جۇمىستىڭ الدىن الا قورىتىندىلارى جەكسەنبى كۇنى اتالمىش ەلدەر ليدەرلەرىنىڭ تەلەفون ارقىلى «نورماند فورماتىندا» اڭگىمەلەرىندە شىعارىلادى. جۇرتتىڭ كوپشىلىگى ۋكرايناداعى داعدارىستى بەيبىت تۇردە شەشۋ جولىن تابۋدىڭ «ەڭ سوڭعى مۇمكىندىگى» رەتىندە قابىلداعان كەزدەسۋگە تاراپتار بارىنشا ىجداعاتتى جانە ارتىق دۋ-دابىرسىز دايىندالدى. مۇنىڭ باسپاسوزگە دە قاتىسى بار. بەيسەنبى كۇنى فرانسۋا وللاند پاريجدە وتكىزگەن ءباسپاسوز ءماسليحاتىنان كەيىن ءوزىنىڭ ماسكەۋگە باراتىنى تۋرالى سەنساتسيالىق مالىمدەمەسىن جاسادى, گەرمانيا كانتسلەرى انگەلا مەركەلمەن بىرگە ولار كيەۆكە جول تارتىپ, وندا ۋكراينا پرەزيدەنتى پەتر پوروشەنكومەن كەلىسسوز جۇرگىزدى.
بەس ساعاتقا سوزىلعان كەزدەسۋدىڭ مازمۇنى تۋرالى ونشالىقتى تەرەڭ اشىلىپ ايتىلعان جوق. «تاراپتار دونەتسك جانە لۋگانسك وبلىستارىنداعى شيەلەنىستەردى بەيبىت جولمەن رەتتەۋگە قولداۋ ءبىلدىرىپ, بۇعان رەسەيدىڭ دە مۇددەلى ەكەنىنە سەنىم ارتتى», - دەپ مالىمدەدى ۋكراينا پرەزيدەنتىنىڭ ءباسپاسوز حاتشىسى ليدەرلەردىڭ بۇدان بۇرىن مينسكىدە بەلگىلەنگەن تالاپتاردى ساقتاۋعا دا شاقىرعانىن اتاي وتىرىپ.
ەڭ باستى قىزىعۋشىلىق ماسكەۋدە قانداي تالاپتاپ قويىلاتىنى جونىندەگى كەلىسىم تۋراسىندا بولدى. الايدا, كەلىسسوزدىڭ كۇن ءتارتىبى سوڭعى ساتكە دەيىن قۇپيا ۇستالدى. رف پرەزيدەنتىنىڭ ءباسپاسوز حاتشىسى اتاپ وتكەندەي, ءتىپتى انگەلا مەركەل مەن فرانسۋا وللاند ءتۇن قاراڭعىسىندا كەلگەننەن كەيىن كرەملدە باستالعان كەزدەسۋدىڭ ءوزى الدەقانداي ءبىر دەلەگاتسيا مۇشەلەرى مەن ساراپشىلاردىڭ قاتىسۋىنسىز, «كوزبە كوز» سيپاتتا وتكىزىلدى. ايتقانداي, رف-نىڭ, گفر-دىڭ جانە فرانتسيانىڭ جوعارى لاۋازىمدى شەنەۋنىكتەرى ليدەرلەر كەلىسسوزىن بىرنەشە ساعاتتىڭ ىشىندە دايىنداپ ۇلگەردى.
سوعان قاراماستان, جۇما كۇنى ۋكرايناداعى احۋالدى رەتتەۋدىڭ جاڭا جوسپارلارىن تالقىلايتىن جيىننىڭ ءوتىپ قالۋى ىقتيمال يشاراسى ءبارىبىر باسپاسوزگە شىعىپ كەتتى. ماسەلەن, امەريكانىڭ The Wall Street Journal (WSJ) باسىلىمى ماسكەۋدە جاساقشىلارعا اۋقىمدى تەرريتوريا مەن اۆتونوميا بەرۋ جونىندەگى ماسەلەنىڭ تالقىلانىپ قالۋ نيەتى بار ەكەنىن حابارلاپ قويدى. وسىعان ۇقساس اڭگىمەلەر ەۋروپا پارلامەنتى دەپۋتاتتارىنىڭ اراسىنان دا ەستىلىپ جاتتى. بۇل دەرەك كوزدەرىندە ماسكەۋدە شۇعىل كەزدەسۋ وتىكىزىلىپ, وندا دا دونەتسك جانە لۋگانسك وبلىستارىنا ۇلكەن وكىلەتتىلىك بەرىلۋى جونىندە اڭگىمە بولاتىنى ايتىلدى.
مۇرات ايتقوجا.
دەرەك, سۋرەت: «كوممەرسانت».
