ءان مەن بي – ادام مەن الەمنىڭ ۇندەستىگى. جانىڭا سەزىم سىيلاي الاتىن, جۇرەكپەن سويلەيتىن ونەر. ساحناعا شىققان ءبيشىنىڭ ءار ۇلتتىڭ ءتول اۋەنىنە ىرعالىپ, قيمىلداعان قوزعالىسى سول ەلدىڭ مۇراسىن جاڭعىرتقانداي اسەر قالدىرادى. ال ءانى ىشكى جان دۇنيەسىنىڭ تەرەڭدىگىن, بولمىسىن اشا تۇسەدى. وسى قۋاتتى قۇرالدى «Birlik» ءانسامبلى يگى ماقساتتا قولدانىپ كەلەدى. ءار ەتنوستان قۇرالعان ونەرپازدار ورتاق ساحنادا ونەر كورسەتىپ, ءوزارا مادەني الماسۋدى كۇشەيتىپ, ەلدە ءبىرتۇتاس ۇلت قاعيداتىن نىعايتۋعا سەپتەسىپ ءجۇر.
العاش ۇجىمدى جاساقتاۋدا ەلىمىزدىڭ ءار بۇرىشىندا كاستينگ وتكىزىلىپ, ءتۇرلى ەتنوس وكىلدەرى مەن مۋلتيينسترۋمەنتاليستەر اراسىنان 20 ۇزدىك ءبيشى مەن مۋزىكانت تاڭدالعان. ولاردىڭ قابىلەت-قارىمىن, تەحنيكالارىن شىڭداۋدا, كومپوزيتسيالاردى دايىنداۋدا وسىنداي ۇجىمداردا ونەر كورسەتىپ جۇرگەن, تاجىريبەسى بار, الىس شەتەلدەن مەترلەر مەن مىقتى ماماندار شاقىرىلعان. ولاردىڭ قاتارىندا رەسەي, تاتارستان, وزبەكستاننىڭ ەڭبەك سىڭىرگەن قايراتكەرلەرى بار.
«باستاپقىدا ءانسامبلدىڭ قۇرامىندا 20 ءبيشى بولسا, قازىر 24-كە كوبەيدى. قازاقستاننىڭ ەڭبەك سىڭىرگەن قايراتكەرى قارلىعاش اجيەۆا وسى ءانسامبلدىڭ العاشقى كونتسەرتىنىڭ قويۋشى-رەجيسسەرى بولدى. ول ونەر ۇجىمىنا كوپتەگەن تالانتتى تاۋىپ, ساحناعا شىعارۋعا كومەكتەستى. ال باس بالەتمەيستەر رەتىندە جاناتاي كوجابەكوۆ شاقىرىلدى. بيىل ەلىمىزدەگى ماڭىزدى وقيعالاردىڭ ءبىرى قازاقستان حالقى اسسامبلەياسىنىڭ 30 جىلدىق مەرەكەسى تويلانعالى وتىر. وسىعان وراي 30 قاڭتاردا الماتى قالاسىنىڭ تۇرعىندارى مەن قوناقتارىنا ارناپ جەكە كونتسەرتىمىزدى وتكىزدىك. ءىس-شارادا ونەر ۇجىمى قازاق, ورىس, ازەربايجان, تاجىك, ۇيعىر, چەشەن, كورەي جانە تاتار حالىقتارىنىڭ بيلەرىن ورىندادى. ءبىر ايتا كەتەرلىگى, كورەرمەندەر ءدال وسى كونتسەرتتە «جىگەر» نەوقازاق ءبيىنىڭ پرەمەراسىن تاماشالادى», دەدى «Birlik» ءانسامبلىنىڭ كوركەمدىك جەتەكشىسى ءارى ءبيشىسى انەل ماراباەۆا.
ءانسامبلدىڭ بىرەگەي رەپەرتۋارى ەلدەگى 100-دەن اسا ەتنوستىڭ مۋزىكالىق مۇراسى مەن ونەرىن قامتيدى. قازاقتىڭ «كۇي شاشۋ», ورىستىڭ «رۋسسكي تانەتس», وزبەكتىڭ «دۋچاۆا», قىرعىزدىڭ «ەرگەمە», تاتاردىڭ «اق يدەل», تاجىكتىڭ «چيلۆاي حيرومون», ت.ب. بيلەرى بار. مۇنى بىلتىر تۇساۋكەسەر سالتاناتىندا مادەنيەت جانە اقپارات ءمينيسترى ايدا بالاەۆا ەرەكشە اتاپ وتكەن ەدى.
ء«وز ىسىنە, ونەرىنە جان-تانىمەن بەرىلگەن دارىندى ارتىستەردىڭ ارقاسىندا ءبىزدىڭ باي مادەنيەتىمىز بەن تاريحىمىز ۇرپاقتان-ۇرپاققا جالعاسادى. بۇل حالىقارالىق ارەنالاردا ايقىن كورىنىسكە يە. ءانسامبلدىڭ تۇساۋكەسەرى العىس ايتۋ كۇنىنە ورايلاستىرىلعان. وسىلايشا, ءارتۇرلى ەتنوستى بىرىكتىرەتىن, بىرلىك پەن ۇيلەسىمنىڭ نىشانىنا جانە قازاقستاننىڭ ءتول برەندىنە اينالاتىنىنا سەنىمدىمىن», دەدى ا.بالاەۆا.
انسامبل از عانا ۋاقىت ىشىندە ءبىراز بيىكتى باعىندىرىپ ۇلگەردى. وركەنيەت كوشىنە ىلەسكەن الەمنىڭ بىرقاتار ەلىندە, اتاپ ايتقاندا تۇركيا, رەسەي, تۇرىكمەنستاننىڭ ونەرسۇيەر قاۋىمىن تامساندىردى. بيىل ءتىپتى ەۋروپاعا اياق باسىپ, كونتسەرت بەرۋدى دە جوسپارلاپ وتىر.
«Birlik» – جاستاردىڭ ورتاق يدەيا اينالاسىندا جۇمىلىپ, قوعامنىڭ يگىلىگى ءۇشىن بىرلەسە الۋىنىڭ ايقىن دالەلى. ۇجىمنىڭ بولشەگى بولۋ شىعارماشىلىقتى ارتتىرىپ قانا قويمايدى, ۇجىم مۇشەلەرىندە ىنتىماقتاستىق پەن ءتۇرلى مادەنيەتكە دەگەن قۇرمەتتى قالىپتاستىرادى. وسىلايشا, قازاق ونەرىن جاڭا دەڭگەيگە كوتەرىپ, حالىقارالىق ارەنادا وتانىمىزدىڭ باي ۇلتتىق ونەرىن تانىستىرىپ, ەلىمىزدىڭ مادەني ارتۇرلىلىگىن كورسەتەتىن بىرلىك پەن كەلىسىم يدەياسىن ناسيحاتتايدى. سونداي-اق ونەر ۇجىمى الەمنىڭ جەتەكشى حورەوگرافتارى جانە مۋزىكانتتارىمەن مادەني ىنتىماقتاستىقتى بەلسەندى قولداپ كەلەدى. ەندى حالىقارالىق فەستيۆالدار مەن كونكۋرستارعا قاتىسۋدى كوزدەپ وتىرمىز», دەدى ا.ماراباەۆا.
دەمەك ونەر – شىعارماشىلىقتىڭ عانا كورىنىسى ەمەس, بىرلىكتىڭ دە سيمۆولى. بۇل ادامدار اراسىنداعى ايىرماشىلىقتاردى ۇمىتىپ, ورتاق يدەيا مەن ماقساتقا باعىندىرا الادى. مۇنىڭ كۇشى – ورتاق تىلدە سويلەي ءبىلۋ, جۇرەكتەن جۇرەككە جەتۋ, الەمدى ىزگىلىككە جەتەلەۋ جولىندا ءبىر بولۋ.
