فوتو: gov.kz
الماتى قالاسى سەيسميكالىق بەلسەندى ايماقتا ورنالاسقان. سوندىقتان قالادا كۇشتى جەر سىلكىنىستەرىن بولجايتىن جانە ەرتە حابارلايتىن 28 ستانتسيا جۇمىس ىستەيدى. ەربولات دوساەۆ كەزدەسۋدە قوسىمشا 70 ستانتسيا ورناتۋ جوسپارلانىپ وتىرعانىن ايتتى. بيىل 30 ستانتسيا ورناتىلسا, 2026 جىلدىڭ سوڭىنا دەيىن تاعى 40 ستانتسيا ىسكە قوسىلماق.
الماتى اكىمى قحر جەر سىلكىنىستەرى اگەنتتىگىنىڭ تابيعي اپاتتار قاۋپىن ازايتۋ باعىتىنداعى جۇمىستارىمەن تانىسىپ, الماتىدا سەيسميكالىق قاۋىپ-قاتەردى تومەندەتۋ ماسەلەسىن تالقىلادى. رەسمي ساپار قورتىندىسىندا قازاقستاننىڭ سەيسمولوگيالىق بايقاۋ جانە زەرتتەۋلەر ۇلتتىق عىلىمي ورتالىعى مەن قىتايدىڭ جەر سىلكىنىستەرى اگەنتتىگىنىڭ گەوفيزيكا ينستيتۋتى اراسىندا سەيسميكالىق مونيتورينگ جانە ەرتە حابارلاۋ جۇيەلەرىن بىرىكتىرۋ بويىنشا بىرلەسكەن جۇمىس تۋرالى كەلىسىمگە قول قويىلدى. بۇل قۇجات ەكى ەل ماماندارىنا سەيسميكالىق اقپاراتپەن ناقتى ۋاقىت رەجيمىندە الماسۋعا مۇمكىندىك بەرەدى.
«حالىقتى تابيعي اپاتتار تۋرالى الدىن الا حاباردار ەتۋ جانە ولاردىڭ جەر سىلكىنىسىنە دايىندىعىن قامتاماسىز ەتۋ – وزەكتى ماسەلەنىڭ ءبىرى. وسىعان بايلانىستى CEA جانە قىتايدىڭ گەوفيزيكا ينستيتۋتىمەن ىنتىماقتاستىق ءبىز ءۇشىن وتە ماڭىزدى», دەدى ەربولات دوساەۆ.
ءوز كەزەگىندە قحر جەر سىلكىنىستەرى اگەنتتىگىنىڭ پرەزيدەنتى ۆان كۋن سەيسميكالىق مونيتورينگ پەن ەرتە ارەكەت ەتۋ بويىنشا تاجىريبە الماسۋ بارىسىندا جان-جاقتى قولداۋ كورسەتىلەتىنىن اتاپ ءوتتى.
