ءادىل سوت ينۆەستيتسيا تارتادى

كەشە جوعارعى سوت توراعاسى قايرات ءماميدىڭ توراعا­لىعىمەن «ءادىل سوت جۇيەسى جانە تۇراقتى زاڭناما – جاعىمدى ينۆەستيتسيالىق احۋالدىڭ نەگىزى» تاقىرىبىندا اتتى دوڭگەلەك ۇستەل ءوتتى. اتالعان ءىس-شارانى ەلىمىزدىڭ جوعارعى سوتى مۇناي-گاز سالاسىنىڭ قازاقستاندىق زاڭگەرلەر قاۋىمداستىعىمەن جانە KAZBAR كوممەرتسيالىق زاڭگەرلەر القاسىمەن بىرلەسىپ ۇيىمداستىردى. جيىنعا پرەزيدەنت جا­نىن­داعى شەتەلدىك ينۆەستورلار كەڭەسىنىڭ قۇرامىنا كىرەتىن كوم­پانيالاردىڭ وكىلدەرى قاتىس­تى. دوڭگەلەك ۇستەلدىڭ اشىلۋ راسىمىندە  ءسوز العان جوعار­عى سوت توراعاسى قايرات ءمامي اتالعان باسقوسۋدىڭ باعىت­تارىن اتاپ ءوتتى. سونداي-اق, ول: «حالىقارالىق ساۋدا-ەكو­نو­مي­كالىق بايلانىستاردىڭ دامۋى, الەمدىك ەكونوميكاداعى ينتەگراتسيالىق ۇدەرىستەر جاڭا كوز­قاراستار مەن جاڭا تاسىلدەردى تالاپ ەتەدى. سوت تورەلىگىن ءتيىمدى جۇرگىزۋ ماسەلەلەرىنە قاتىستى دا جاڭا تاسىلدەر جەتىلدىرىلۋدە», دەي كەلە, قازاقستاندىق سوت جۇيەسى وسى جالپى الەمدىك ۇدەرىستەن تىس قالا المايتىندىعىن باسا جەتكىزدى. جوعارعى سوت توراعاسىنىڭ ايتۋىنشا, اتالعان دوڭگەلەك ۇستەلدى وتكىزۋ يدەياسى – ينۆەس­تيتسيالاردى قورعاۋ تۇرعىسىندا زاڭنامانى جانە سوت جۇيەسىن جەتىلدىرۋ ماسەلەلەرىنە  بايلانىس­تى تۋىن­داعان. كەلەسى كەزەكتە ءسوز العان پرە­مەر-ءمينيستردىڭ  ورىنباسارى بەردىبەك ساپارباەۆ جينال­عاندارعا العىس ايتا كەلە, پرەمەر-مينيستر كارىم ءماسىموۆتىڭ: «ەلباسى نۇرسۇلتان نازارباەۆ  قازاقستان سۋديالارىنىڭ VI سەزىندە سويلەگەن سوزىندە: «ححI عاسىرداعى ۇلتتىڭ دامۋىنىڭ ماڭىزدى ولشەمى – ءمىنسىز جانە ءتيىمدى ۇلتتىق سوت تورەلىگى جۇيەسى. تاۋەلسىز جانە ادىلەتتى سوت – قۇقىقتىق مەملەكەتتىڭ نەگىزى. ونسىز الەمنىڭ بىردە-ءبىر ەلىندە, ءتىپتى, ەڭ دامىعان مەملەكەتتەردە قولايلى ينۆەستيتسيالىق احۋالدىڭ دا, ازاماتتار ءال-اۋقاتىنىڭ جوعارى دەڭگەيىنىڭ دە, قوعامنىڭ تابىستى دامۋىنىڭ دا بولۋى مۇمكىن ەمەس», دەگەن بولاتىن. وسىعان وراي ءادىل دە تاۋەلسىز سوت ينۆەستيتسيالاۋعا قولايلى ورتا جاساۋدا نەگىز بولا الادى. بۇگىنگى تاڭدا مەملەكەتتە سوت جۇيەسىن قالىپتاستىرۋ با­رى­سىندا كوپتەگەن وڭ ىستەر اتقا­رىلۋدا», دەگەن سوزدەرىن جەتكىزدى. دوڭگەلەك ۇستەل وتىرىسىنا قاتىسۋشىلار ينۆەستورلاردىڭ قۇقىقتارىن قورعاۋ, ين­ۆەس­تي­تسيالىق داۋلاردى شەشۋ, ينۆەستورلارعا ارنالعان سالىق ارتىقشىلىقتارى, ينۆەستيتسيالار جانە تورەلىك تۋرالى زاڭنامانى جەتىلدىرۋدىڭ وزەكتى ماسەلەلەرىن تالقىعا سالدى. سول سياقتى ەلىمىزدىڭ ازاماتتىق پروتسەستىك كودەكسىنىڭ جاڭا رەداكتسياسىنداعى ينۆەستورلاردىڭ قاتىسۋىمەن داۋ­لاردى قاراستىرۋ جانە شەشۋ بولىگىندەگى نوۆەللالارى بويىنشا سىندارلى پىكىر الماسۋلار بولدى. وسىلايشا, دوڭگەلەك ۇستەل جۇمىسىنىڭ قورىتىندىسى بويىنشا ءتيىستى ۇسىنىمدار ازىرلەندى. ەلميرا ماتىباەۆا, «ەگەمەن قازاقستان».