«بۇل كورمە ەكى كۇنگە جالعاسادى. 2022-2024 جىلدارى عىلىم جانە جوعارى ءبىلىم مينيسترلىگى پرەزيدەنت تاپسىرماسىن ورىنداۋ ماقساتىندا 23 شەتەلدىك ۋنيۆەرسيتەتپەن ستراتەگيالىق سەرىكتەستىك ورناتتى. سونىڭ نەگىزىندە قازاقستاندا شەتەلدىك جوو-لاردىڭ فيليالدارى اشىلىپ, قوس ديپلومدىق باعدارلامالار ىسكە اسىپ جاتىر. بيىل تاعى الەمدىك 11 ۋنيۆەرسيتەتپەن ستراتەگيالىق ارىپتەستىك ورناتامىز. كورمەنىڭ ماقساتى – شىمكەنتتىك جاستارعا شەتەلگە شىقپاي دۇنيە جۇزىلىك ۋنيۆەرسيتەت فيليالدارىنىڭ مامان دايارلاۋ مۇمكىندىكتەرىمەن تانىستىرۋ. شەتەلدىك فيليالداردىڭ ءبىرازى ەلىمىزدە ستۋدەنتتەر قابىلداۋدى باستاپ كەتتى. ماسەلەن بيىل ءۇشىنشى جىل قاتارىنان پەتروپاۆلدا اريزونا ۋنيۆەرسيتەتى بالالاردى وقىتىپ كەلەدى. سولتۇستىك وڭىردە فيليال اۋىل شارۋاشىلىعى سالاسىنىڭ, ءىت ماماندىعىنىڭ يەلەرىن دايىندايدى. ءبىر ايتا كەتەرلىگى فيليالدار تەك الماتى مەن استانا قالاسىنان اشىلىپ جاتقان. وڭىرلەردىڭ الەۋمەتتىك-ەكونوميكالىق جاعدايىن ەسكەرە كەلە سول جاقتاردا دا فيليالداردى شوعىرلاندىرۋعا دەن قويىلىپ وتىر. سونىڭ ارقاسىندا كەلەشەكتە وڭىرلەردە عىلىم مەن ءبىلىم داميدى دەگەن ۇمىتتەمىز. ايتالىق اقتوبە قالاسىنداعى جۇبانوۆ ۋنيۆەرسيتەتى جانىنان قۇرىلعان حەرريوت-ۋوتت جوو فيليالى ەكى جىلدان بەرى ستۋدەنت وقىتىپ جاتىر. بۇل فيليالدا بولاشاق مۇناي-گاز سالاسىنىڭ ماماندارى دايىندالادى. سەبەبى اقتوبە وبلىسىنىڭ ەكونوميكاسى مۇناي-گاز وندىرىسىنە نەگىزدەلگەندىكتەن سوعان ساي ماماندار دا قاجەت. بۇگىنگى تاڭدا پرەزيدەنت تاپسىرماسىنا وراي ەلىمىزدە جاساندى ينتەللەكەتىنى دامىتۋعا باسا كوڭىل بولىنە باستادى. وسىعان وراي مينيسترلىك الەمدە جي بويىنشا كوشباسشىسى سانالاتىن وڭتۇستىك كورەيا ەلىنىڭ سەۋل تەح باعدارلاماسىن قىزىلورداداعى قورقىتاتا ۋنيۆەرسيتەتىندە ىسكە اسىرۋعا كىرىستى. ياعني سىر ەلىنەن دە وقىتۋ باعدارلاماسى وزىق شەتەلدىك جوو فيليالى اشىلدى. شىمكەنت تورىندە ءوتىپ جاتقان بۇل ءىس-شارا كوشپەلى كەرۋەن دەپ اتالادى. ياعني بۇعان دەيىن قاراعاندى, استانا, الماتى, تاراز قالالارىندا ۇيىمداستىرىلدى. ەندى شىمشاھاردان سوڭ تۇركىستان مەن قىزىلوردا قالالارىندا وتكىزىلەتىن بولادى. سوسىن كورمەنىڭ ءبىرىنشى كەزەڭى اياقتالادى. ەكىنشى كەزەڭدە ەلىمىزدىڭ باتىس وڭىرلەرى قامتىلسا, ءۇشىنشى كەزەڭدە سولتۇستىك پەن شىعىس ايماقتاردا ۇيىمداستىرۋ جوسپاردا تۇر. تاعى ءبىر ايتا كەتەتىن تۇسى وسى فيليالدارعا وقۋعا تۇسكەن تالاپكەرلەر مەملەكەتتىك گرانت ەسەبىنەن وقۋعا مۇمكىندىك الا الادى. سونىمەن بىرگە ستۋدەنتتەر فيليال تالاپتارى مەن ەرەجەلەرىنە سايكەس بەلگىلى ءبىر كەزەڭدە شەتەلدەگى ۋنيۆەرسيتەتتىڭ نەگىزگى بازاسىندا وقۋعا مۇمكىندىگى بار. ماسەلەن ءال-فارابي اتىنداعى قازاق ۇلتتىق ۋنيۆەرسيتەتىندە ستۋدەنتتەر ەكى جىل قىتايدا وقىپ كەلە السا, اقش-تاعى اريزونا جوعارى وقۋ ورنىندا ءبىر جىلداي وقۋ مۇمكىندىگىنە يە بولادى. ياعني ۇتقىرلىق باعدارلاماسى اياسىندا شەتەلدە ءبىلىم الىپ كەلۋ ءار فيليالدىڭ ءوزىنىڭ جەكە شارتتارىنا بايلانىستى. بۇگىنگى تاڭدا كورمە ماقساتى تەك وقۋشىلاردى جوعارى ءبىلىم مۇمكىندىكتەرىمەن تانىستىرۋدى, قاجەتتى اقپارات بەرۋدى كوزدەيدى. ال تالاپكەرلەردى قابىلداۋعا دايىندىق فيليالداردا ناۋرىز ايىنان باستالادى. دەگەنمەن كوپشىلىك جوو وكىلدىكتەرى جازدا تاپسىرىلاتىن ۇبت ناتيجەسىن كۇتەدى. قىسقاشا ايتقاندا جەتەكشى جوو-لاردىڭ ەلىمىزدە فيليال اشۋى بۇل جاستارعا الىسقا بارماي-اق ءوز ەلىمىزدە حالىقارالىق تالاپقا ساي زاماناۋي ءبىلىم الۋدىڭ, ءبىر ماماندىق يەسى اتانىپ شىعۋدىڭ كەرەمەت مۇمكىندىگى», دەدى عىلىم جانە جوعارى ءبىلىم ءمينيستىرىنىڭ كەڭەسشىسى ر.ەمەلباەۆ.
مينيسترلىك وكىلىنىڭ ايتۋىنشا, فيليالداردا وقۋ كوبىنەسە اعىلشىن تىلىندە وتەتىندىكتەن تالاپكەرلەردەن وسى ءتىلدى جەتىك ءبىلۋ تالاپ ەتىلەدى. بۇل ورايدا وقۋشىلاردىڭ كوپشىلىگى اعىلشىن تىلىنەن IELTS, TOEFL سىناقتارىن تاپسىرۋدان جۇرەكسىنەتىندىكتەن كورمەدە وسى ەمتيحاندى وتكىزۋگە رۇقساتى بار كومپانيا ارنايى شاقىرىلدى. ونىڭ ماماندارى كەلگەن وقۋشىلارعا جوعارى اتالعان تىلدىك سىناقتىڭ ەرەكشەلىكتەرى مەن قىر-سىرىن بايانداپ بەردى. سونىمەن بىرگە بولاشاق تالاپكەرلەرگە قاي ماماندىق تاڭداۋعا كەڭەس بەرەتىن ارنايى ۇيىم وكىلدەرى دە سىناق تاپسىرتۋ ارقىلى وقۋشىلاردىڭ بەلگىلى ءبىر كاسىپكە يكەمدىلىكتەرىن انىقتاۋعا كومەكتەستى. مينيستر كەڭەسشىسىنىڭ مالىمدەۋىنشە 2025 جىلى شىمكەنتتە ءبىر شەتەلدىك جوو فيليالىن اشۋ كوزدەلىپ وتىر. ول تۇركياداعى پەداگوگيكالىق باعىتتا مامان دايارلايتىن رەيتينگىسى جوعارى عازي ۋنيۆەرسيتەتىنىڭ فيليالى. ول وزبەكالى جانىبەكوۆ اتىنداعى وقپۋ جانىنان قۇرىلاتىن بولادى. قازىرگى تاڭدا وسى جۇمىستى اياعىنا دەيىن جەتكىزۋ ءۇشىن ءتيىستى كەلىسىمدەر جۇرگىزىلىپ جاتىر. ماماننىڭ سوزىنشە پرەزيدەنت تاپسىرماسىنا وراي شەتەلدىك جوو فيليالدارىن كوبەيتۋ ارقىلى قازاقستاندى ورتالىق ازياداعى اكادەميالىق حابقا, ياعني ءبىلىم مەن عىلىم ورداسىنا اينالدىرۋ ماقساتى تۇر. سونداي-اق ءبىر ماسەلەنى ءتۇسىنىپ الۋ كەرەك دەدى مينيستر كەڭەسشىسى. ول الەمدىك رەيتينگتە جوعارى تۇرعان ۋنيۆەرسيتەت فيليالدارى قازاقستاندا جەكە-دارا جوو بولىپ قۇرىلمايدى, تەك ەلىمىزدە بار جەتەكشى جوعارى وقۋ ورىندارىنىڭ جانىنان اشىلادى. سوندىقتان بۇل فيليالدار رەسپۋبليكاداعى بارلىق وتاندىق جوو-لاردىڭ ساپاسىن ارتتىرۋعا, ءبىلىم كوكجيەگىن كەڭەيتۋگە, قازاقستان ۋنيۆەرسيتەتتەرىن ءوزارا باسەكەلەستىرۋ ارقىلى وقىتۋ سەرۆيسىن جاقسارتۋعا وڭ سەپتىگىن تيگىزەدى. بۇگىنگى زامان جاھاندانۋ ۇدەرىسى ءجۇرىپ جاتقان كەز. سول سەبەپتى شەتەلدىك وقۋ ورىندارىنىڭ يدەولوگيالىق باسقا دا ىقپالىنان قورقۋدىڭ قاجەتى جوق دەگەن دە پىكىر ايتتى مامان. ويتكەنى فيليالدىڭ بارلىق ءبىلىم باعدارلاماسى مينيسترلىكتىڭ تىكەلەي باقىلاۋىندا بولادى ەكەن. الدىڭعى قاتارلى شەتەلدىك جوو-لار فيليالىن ەلدە اشۋ جالپى دۇنيە جۇزىندە بار تاجىريبە, قالىپتاسقان ءۇردىس سانالادى. سول ءۇشىن قازاقستان دا وسى باعىتتى تاڭداپ وتىر. ءتىپتى كورشىلەس وزبەكستاندا بۇل باستاما باياعىدان قارقىن العان كورىنەدى.
