تۇراقتىلىق تۇعىرىندامىز
الماتى قالاسىنداعى قازاقستان حالقى اسسامبلەياسىنىڭ «دوستىق ۇيىندە» «قازاقستان حالقى اسسامبلەياسى جىلىن باستاۋ» سينحروندى-اكتسياسىنا ارنالعان مەرەكەلىك شارا بولىپ ءوتتى.
وعان جەتىسۋ جەرىن مەكەن ەتكەن ءتۇرلى ۇلت وكىلدەرى, قالادا ورنالاسقان ەتنومادەني بىرلەستىكتەردىڭ بەلسەندى مۇشەلەرى مەن ونەرپازدارى, جوعارى وقۋ ورىندارىنىڭ ستۋدەنتتەرى مەن قالاداعى ءتۇرلى مەملەكەتتىك ەمەس ۇيىمداردىڭ وكىلدەرى قاتىستى.
قازاقستان حالقى اسسامبلەياسىنىڭ تۋىن كوتەرۋ سالتاناتتى راسىمىندە قالا اكىمى احمەتجان ەسىموۆ جيىلعان كوپشىلىك الدىندا ءسوز سويلەپ, مەملەكەت باسشىسى نۇرسۇلتان نازارباەۆتىڭ جەتىسۋ جۇرتىنا, مەرەكەلىك جيىنعا قاتىسىپ وتىرعان كوپشىلىك قاۋىمعا ارناعان قۇتتىقتاۋ ءسوزىن وقىپ بەردى.
– قۇرمەتتى قالا تۇرعىندارى مەن قوناقتارى. سىزدەردى حالقىمىزدىڭ بىرلىگى مەن ىنتىماعىن پاش ەتەتىن مەرەيلى مەرەكەنىڭ باستالۋىمەن قۇتتىقتايمىن. ءبىزدىڭ قالامىزدا ورنالاسقان 34 ەتنومادەني بىرلەستىكتىڭ مۇشەلەرى ەلباسىمىز نۇرسۇلتان نازارباەۆ ناسيحات ەتىپ كەلە جاتقان بەيبىتشىلىك پەن ۇلتتار دوستىعى, مەملەكەتىمىزدەگى تۇراقتىلىق پەن بەرەكەلى ومىرگە زور ۇلەسىن قوسىپ وتىرعاندىعىن ايتقىم كەلەدى. ءبىز, بارشا قازاقستاندىقتار «ءبىر ەل – ءبىر حالىق» دەگەن ۇلى ۇرانمەن ءبىر جاعادان باس, ءبىر جەڭنەن قول شىعارىپ, تاتۋ-ءتاتتى ءومىر سۇرەتىنىمىزگە سەنىمدىمىز, – دەدى قالا باسشىسى.
ىنتىماق پەن بىرلىكتىڭ, تاتۋلىق پەن تۇراقتىلىقتىڭ تۋى كوتەرىلگەن ساتتە اسپانعا بەيبىتشىلىكتىڭ سيمۆولى رەتىندە كوگەرشىندەر ۇشىرىلىپ, ءتۇرلى ۇلت وكىلدەرىنەن قۇرالعان ونەرپازدار مەرەكەلىك كونتسەرتتى باستاپ جىبەردى. بۇل كۇنى «دوستىق ۇيىندە» ءار ۇلتتىڭ سالت-ءداستۇرى مەن ادەت-عۇرپىن باياندايتىن كورمەلەر مەن ەل بىرلىگىن ناسيحاتتايتىن ستەندىلەر قويىلدى.
قانات ەسكەندىر,
«ەگەمەن قازاقستان».
سۋرەتتى تۇسىرگەن ايتجان مىرزانوۆ.
*اقتاۋ
مەرەكە لەبى ەسكەن كۇن
كەزىندە ىرگەتاسىن بىلەك پەن تىلەك قابىستىرا ءجۇرىپ ءار ۇلتتىڭ وكىلدەرى قالاعان, ءارى «دوستىق تەڭىزى» دەپ اتالاتىن كاسپيدىڭ جاعاسىن جايلاعان اقتاۋ قالاسى بۇگىندە دوستىق پەن پەيىل جاراستىعىن بيىك ۇستاعان سان ۇلت پەرزەنتتەرىنە مەكەن بولىپ كەلەدى. رەسپۋبليكامىزدا باستالعان اسسامبلەيا جىلى مەرەكەسىنىڭ شىمىلدىعىن ماڭعىستاۋ وبلىسى دا ءسان-سالتاناتپەن اشتى.
اكادەميك ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتى الدىنا مەملەكەتتىك ورگاندار وكىلدەرى, اسكەري بولىمدەر ساربازدارى مەن جاستار, اسسامبلەيا مۇشەلەرى, قالا تۇرعىندارى كوپ جيىلدى. ءار ۇلتتىڭ ۇلتتىق كيىمدەرىن كيگەن جاستار ادەبي-مۋزىكالىق كومپوزيتسيا اياسىندا پاتريوتتىق باعىتتاعى بي ۇلگىلەرىن كورسەتتى. قولدارىنا اسسامبلەيا جالاۋى مەن بەلگىسىن ۇستاعان شاراعا قاتىسۋشىلار ەلىمىزدىڭ ءانۇرانىن قوسىلا شىرقادى.
اسسامبلەيا جىلىنىڭ باستالۋىمەن ايماق باسشىسى ا.ايدارباەۆ قۇتتىقتاپ, ىنتىماققا ۇيىپ, بىرلىگى جاراسقان سان ۇلتتى مەملەكەتىمىزدىڭ تاۋەلسىزدىگى باياندى بولىپ, بەرەكە-بىرلىگى نىعايا بەرۋىنە تىلەكتەستىگىن ءبىلدىردى. ال اسسامبلەيا جالاۋىن كوتەرۋ قۇرمەتى ءدۇيىم جۇرتتىڭ ماقتانىشىنا اينالعان قوس سپورتشى – ءبىرى وليمپيادا شىڭىن باعىندىرسا, ەكىنشىسى كەزەكتى وليمپيادانىڭ العاشقى جولداماسىن قانجىعاسىنا بايلاعان ءا.نيازىمبەتوۆ پەن ب.ابدىراحمانوۆقا بۇيىردى.
ماڭعىستاۋ ونەرپازدارىنىڭ دۋلى كونتسەرتىنە ۇلاسقان شارادا انشىلەر مەن كۇيشىلەر رۋحتى كوتەرەر پاتريوتتىق باعىتتاعى شىعارمالاردى ۇسىندى. بيىلعى جىلى ەلىمىزدە قازاق حاندىعىنىڭ 550 جىلدىعى مەن ۇلى جەڭىستىڭ 70 جىلدىعى تويلاناتىندىعىنان بولۋى كەرەك, وسى مەرەكەلەردىڭ لەبى بۇگىننەن باستالىپ, اسسامبلەيا جىلى مەرەكەسىمەن استاسىپ كەتتى. اۋقىمدى ەكراننان تاقىرىپتىق بەينەباياندار كورسەتىلىپ, ورىندالعان شىعارمالارمەن ۇندەستىك تاۋىپ جاتتى, جاستار قولىنان ۇشىرىلعان كوك, سارى, اق ءتۇستى جۇزدەگەن شارلار كوككە كوتەرىلدى.
تۇتاس ءبىر كۇنگە سوزىلعان مەرەكە وبلىستىڭ بارلىق اۋدان, قالالارىندا جالعاسىن تاپتى.
گۇلايىم شىنتەمىرقىزى,
«ەگەمەن قازاقستان».
*اقتوبە
تۇسىنىستىك – بار تابىستىڭ باستاۋى
وبلىس ورتالىعىنداعى «دوستىق ءۇيىنىڭ» الدىنداعى الاڭعا قالا تۇرعىندارى مول جينالدى. بۇرىننان دا ۇلكەن مەرەكەلىك شارالاردىڭ ورتاسى بولىپ تابىلاتىن بۇل ءۇي ءسان-سالتاناتىمەن ەرەكشەلەنەدى. شارا ءوتىپ جاتقان الاڭدا ەلىمىزدىڭ كوك بايراعى جەلبىرەپ, ۇلتارالىق كەلىسىمنىڭ ىزگى نيەتىندەي بولعان جالاۋلار مەن جالاۋشالار قالا تۇرعىندارىنىڭ كوڭىلدەرىندە كورىكتى ويدى ءوربىتىپ, ءبىرتۇتاس مەملەكەتىمىزدىڭ بىرلىگى مەن تاتۋلىعىن تاعى دا پاش ەتكەندەي. ولاردىڭ اراسىندا سان ۇلتتاردىڭ وكىلدەرى بار. قازاقستان حالقى اسسامبلەياسى جىلىنىڭ باستالۋىنا بايلانىستى بۇل ۇلكەن شارادا اقتوبەلىكتەر تاعى دا بەرەكە-بىرلىكتىڭ, تاتۋلىق پەن تۇراقتىلىقتىڭ ايقىن نىشانىن اڭعارتتى. وبلىستى مەكەندەگەن توقسانعا جۋىق ەتنوستىڭ وكىلدەرى ۇلتتار دوستىعىنىڭ بەرىك بەكەمدىگىن كورسەتتى. بۇل ءوڭىر قاشاندا ۇلتارالىق كەلىسىم مەن حالىق دوستىعىنىڭ مەكەنى بولىپ كەلەدى. وبلىس اكىمى ارحيمەد مۇحامبەتوۆ قازاقستان پرەزيدەنتى, اسسامبلەيا توراعاسى ن.نازارباەۆتىڭ الداعى جىلدى قازاقستان حالقى اسسامبلەياسى جىلى دەپ جاريالاعانىن جۇرتشىلىققا جەتكىزە كەلىپ, ەلباسىنىڭ قۇتتىقتاۋىن وقىپ بەردى. ءوڭىر باسشىسى مەن قازاقستان حالقى اسسامبلەياسىنىڭ ارداگەرى, «قازاقستان كورەيلەرى قاۋىمداستىعى» رەسپۋبليكالىق قوعامدىق بىرلەستىگى اقتوبە فيليالىنىڭ توراعاسى كونستانتين تسحاي قازاقستان حالقى اسسامبلەياسى جىلىنىڭ تۋىن كوتەردى.تۋ كوتەرۋ سالتاناتىندا تەاترلاندىرىلعان كورىنىستەر قويىلىپ, فلەش-موب ۇيىمداستىرىلدى جانە قحا ەمبلەمالارى بار شارلار ۇشىرىلدى. قازاقستان حالقى اسسامبلەياسى جىلىنىڭ باستاۋ الۋىنا وراي وبلىستىق «دوستىق ۇيىندە» ۇلكەن مەرەكەلىك كونتسەرت بولدى. مەرەكەلىك كونتسەرتتە عازيزا جۇبانوۆا اتىنداعى وبلىستىق فيلورمونيانىڭ, قالالىق وقۋشىلار سارايىنىڭ جانە قۇدايبەرگەن جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ كوركەمونەرپازدارى جۇرتشىلىققا ءوز ونەرلەرىن كورسەتتى. ساتىبالدى ءساۋىرباي, «ەگەمەن قازاقستان». * اتىراۋ
كەلىسىم – ەڭ قىمبات قازىنا
مۇنايلى وڭىردە دە ءتۇرلى ەتنوستىڭ وكىلدەرى ءبىر ەل – ءبىر تاعدىر ۇستانىمىمەن ەلىمىزدىڭ قۋاتتى وركەندەۋىنە لايىقتى ۇلەسىن قوسىپ كەلەدى. قازىر اتىراۋدا ءار ۇلتتىڭ تاريحى مەن مادەنيەتىن, ءتىلى مەن سالت-ءداستۇرىن كەڭىنەن ناسيحاتتايتىن 17 ەتنومادەني بىرلەستىك قۇرىلعان. ولاردىڭ جەتەكشىلەرى تەك ءوز بىرلەستىكتەرىنىڭ عانا ەمەس, سونىمەن بىرگە, باسقا ەتنوستاردىڭ دا وتكىزگەن شارالارىنا بەلسەنە ارالاسادى. ال كەشە سول بىرلەستىكتەردىڭ جەتەكشىلەرى مەن مۇشەلەرى قازاقستان حالقى اسسامبلەياسى جىلىنىڭ باستالۋىنا ارنالعان شارادا تاعى دا باس قوستى. بۇل شارا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ «جايىق» سپورت كەشەنىندە ءوتتى. شارا بارىسىندا الدىمەن وبلىس اكىمى باقتىقوجا ىزمۇحامبەتوۆ ءسوز الىپ, ەلباسى نۇرسۇلتان نازارباەۆتىڭ قازاقستان حالقى اسسامبلەياسى جىلىنىڭ باستالۋىنا وراي قازاقستاندىقتارعا ارناعان قۇتتىقتاۋىن وقىپ بەردى. ال وزگە ۇلت وكىلدەرى اراسىنان «ۆايناح» چەشەن-ينگۋش ەتنومادەني بىرلەستىگىنىڭ ارداگەرى, قازاق قىزىمەن وتاۋ قۇرىپ, قازاق جەرىن قاسيەتتى مەكەنىنە بالايتىن سەيتامين اكاەۆ, «تاتۋلىك» تاتار-باشقۇرت ەتنومادەني بىرلەستىگىنىڭ جەتەكشىسى گۇلسينا بايكەنوۆا, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ستۋدەنتى ۆەرونيكا لي قۇتتىقتادى. – قازاقستان حالقى اسسامبلەياسى قۇرىلعاننان بەرگى 20 جىلدىڭ ىشىندە ءبىز تاتۋلىق پەن دوستىقتىڭ, بىرلىك پەن كەلىسىمنىڭ ەڭ قىمبات قازىنا ەكەنىن ۇعىندىق. وسى كەزەڭدە كەڭ-بايتاق قازاق جەرىن مەكەندەگەن ءتۇرلى ەتنوس وكىلدەرىنىڭ ءبىر-بىرىمەن قارىم-قاتىناسى جاقسارىپ, دوستىعى مەن بىرلىگى نىعايدى, –دەدى گازەت تىلشىسىنە «يۆەريا» گرۋزين ەتنومادەني بىرلەستىگىنىڭ جەتەكشىسى زۋراب بوبوحيدزە. –مەن قازاقستانداي ەكونوميكاسى قارقىندى دامىعان, تۇراقتىلىعى مىقتى, تاتۋلىعى جاراسقان قۋاتتى ەلدە تۇراتىنىمدى ءار ۋاقىت ماقتان تۇتامىن. بالالارىمنىڭ تەك ءوز ۇلتىنىڭ عانا ەمەس, قازاقستاندا تۇراتىن وزگە دە ەتنوستاردىڭ قۇندىلىعىنا قۇرمەتپەن قاراۋىن ۇدايى قاداعالاپ وتىرامىن. بۇل كۇنى ءتۇرلى ەتنوستىڭ وكىلدەرى ءوز تىلدەرىندە دە, وزگە ەتنوس تىلدەرىندە دە اندەر شىرقادى. جالپى, جىل اياعىنا دەيىن ۇلتارالىق دوستىق پەن تاتۋلىقتى بەكىتە تۇسۋگە ىقپال ەتەتىن ءتۇرلى شارالار ۇيىمداستىرىلاتىنى كوزدەلىپ وتىر. جولداسبەك شوپەعۇل, «ەگەمەن قازاقستان». سۋرەتتى تۇسىرگەن راحىم قويلىباەۆ. *كوكشەتاۋباق-بەرەكەنىڭ بەسىگى
كوكشەتاۋدا ماڭىزدى ساياسي وقيعالاردىڭ بارلىعى دەرلىك تاۋەلسىزدىك الاڭىنان باستالىپ, «مەنىڭ قازاقستانىم» ساۋلەت-كومپوزيتسيالىق كەشەنىندە كەڭىنەن جالعاسىن تاباتىن ءداستۇر قالىپتاسقان. ەلباسى نۇرسۇلتان نازارباەۆتىڭ جارلىعىمەن جاريالانعان قازاقستان حالقى اسسامبلەياسى جىلىنىڭ شىمىلدىعى دا وسىندا ءتۇرىلىپ, مەملەكەتتىك ورگانداردىڭ, ەڭبەك ۇجىمدارىنىڭ, ەتنومادەني جانە قوعامدىق بىرلەستىكتەردىڭ, ارداگەرلەر مەن جاستار ۇيىمدارىنىڭ وكىلدەرىنەن قۇرىلعان مەرەكەلىك شەرۋ اباي كوشەسىن شاتتىققا تولتىرىپ, «مەنىڭ قازاقستانىما» مەرەيلەنىپ جەتتى. قازاقستان رەسپۋبليكاسىنىڭ مەملەكەتتىك رامىزدەرىمەن بەزەندىرىلگەن كەشەننىڭ تۋتۇعىرىندا قازاقستان حالقى اسسامبلەياسى جىلىنىڭ جالاۋى كوتەرىلىپ, جينالعان 500 ادام ءبىر اۋىزبەن ەلىمىزدىڭ ءانۇرانىن ورىندادى. پاتريوتتىق ءان-كۇيلەر جىگەر تاسىتىپ, جاستاردىڭ «دوستىق» فلەش-موبى كوڭىل تەربەدى. جان-جاعىمىز ەل تاريحى بەلەستەرىن ەلەستەتەتىن تۋلارعا, مەملەكەتىمىزدىڭ اسىل ماقساتتارىن اسقاقتاتقان قازاقستان حالقى اسسامبلەياسىنىڭ لوگوتيپتەرىنە تولدى دا كەتتى. جۇرتشىلىق قوسىلىپ ءان سالىپ, قۇشاقتاسىپ امانداسىپ جاتىر. بۇل بۇكىل الەمگە اتى تانىلعان قازاق ەلى بەيبىتشىلىك پەن باق-بەرەكەنىڭ بەسىگى, ۇلتتاردى ۇيىستىرعان الدىڭعى قاتارلى جايما-شۋاق مەملەكەت ەكەندىگىنىڭ بەلگىسى ەدى. وبلىس اكىمىنىڭ ورىنباسارى نۇرلان نۇركەنوۆ جۇرتشىلىقتى قۇتتىقتاۋ ءسوزىن ەلباسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ اسسامبلەيا جىلىنا ارنالعان ۇندەۋىن وقىپ بەرۋمەن باستادى. – بۇگىندە ءبىزدىڭ بىرلىگىمىز – «2050» ستراتەگياسىن جۇزەگە اسىرۋدىڭ شەشۋشى فاكتورى. ستراتەگيادا كوپەتنوستى حالقىمىزدىڭ دانالىعى كورىنىس تاپقان. ول ءبىزدىڭ ءبىتىمنىڭ, رۋحاني كەلىسىمنىڭ ايرىقشا مادەنيەتىنىڭ جوعارى قاعيداتتارىنان ارقاۋ الادى. ەلباسىنىڭ تاتۋلىق پەن قوعامدىق كەلىسىم يدەيالارىن كەڭىنەن كورسەتۋگە باعىتتالعان بۇگىنگى ۇلكەن شارا – مەملەكەتىمىز ءۇشىن ماڭىزدى وقيعا. ءبىز, اقمولالىقتار «قازاقستان حالقى اسسامبلەياسى – 20 يگى ءىس» ەستافەتاسىن ءبىرىنشى بولىپ قابىلداپ وتىرمىز. بۇل ءبىز ءۇشىن ۇلكەن ابىروي جانە جوعارى جاۋاپكەرشىلىك جۇكتەيدى. ايتۋلى وقيعاعا ورايلاستىرىلعان عىلىمي-تانىمدىق, بۇقارالىق شارالار كوكشەتاۋداعى «دوستىق ۇيىندە», ءبىلىم وشاقتارىنداعى «قوعامدىق كەلىسىم» ۇيىمدارىندا, كىتاپحانالار مەن مۋزەيلەردە, سونداي-اق وبلىستىڭ بارلىق ەلدى مەكەندەرىندە وتكىزىلدى. باقبەرگەن امالبەك, «ەگەمەن قازاقستان». *قاراعاندىماقسات ايقىن, مىندەت بەلگىلى
كەشە قاراعاندى قالاسىندا تاتۋلىعىمىزدىڭ تۇعىرىن بەكىتكەن ءتۇرلى ەتنوس وكىلدەرىنىڭ قاتىسۋىمەن قازاقستان حالقى اسسامبلەياسى جىلىنىڭ سورەدەن شىعۋىنا بايلانىستى سالتاناتتى شارالار بولىپ ءوتتى. وعان وبلىس اكىمى نۇرمۇحامبەت ابدىبەكوۆ قاتىسىپ, ەلباسى نۇرسۇلتان نازارباەۆتىڭ قازاقستان حالقى اسسامبلەياسى جىلىنىڭ اشىلۋىنا وراي جولداعان قۇتتىقتاۋىن وقىپ بەردى. مۇنىڭ الدىندا قاراعاندىنىڭ ورتالىق الاڭىندا اسسامبلەيا تۋىن كوتەرۋ ءراسىمى ءوتتى. تۋدىڭ وبلىسقا تانىمال ادامداردىڭ قاتىسۋىمەن كوتەرىلگەنىن اتاپ وتكەن ءجون. ال بۇل شارادان سوڭ ءار ۇلتتىڭ ۇلتتىق كيىمدەرىن كيگەن جاستار ادەبي-مۋزىكالىق كومپوزيتسيا شەڭبەرىندە پاتريوتتىق باعىتتاعى تەاترلاندىرىلعان كورىنىستەر كورسەتتى. قولدارىنا اسسامبلەيا جالاۋشاسىن ۇستاعان جۇرتشىلىق وكىلدەرى قازاقستان رەسپۋبليكانىڭ ءانۇرانىن قوسىلا شىرقادى. قازاقستان حالقى اسسامبلەياسى جىلىنىڭ باستالۋىنا وراي بۇل ۇلكەن شارا بارىسىندا قاراعاندىلىقتار تاعى دا ىنتىماق پەن بىرلىكتىڭ, تاتۋلىق پەن دوستىقتىڭ ەلىمىزدە سالتانات قۇرىپ وتىرعانىن وزدەرىنىڭ كوڭىل-كۇيلەرىمەن پاش ەتتى. بۇل ءوڭىر ەجەلدەن ۇلتارالىق كەلىسىم مەن حالىق دوستىعىنىڭ وشاعىنا اينالعان. ال قازاقستان حالقى اسسامبلەياسى جىلىنىڭ باستاۋ الۋىنا وراي وبلىس ورتالىعىندا ۇلكەن مەرەكەلىك كونتسەرت ۇيىمداستىرىلعانىن دا ايتا كەتەيىك. كەزىندە ىرگەسىن بىلەك سىبانا, تىلەك قوسا ءجۇرىپ ءار ۇلتتىڭ وكىلدەرى بەكىتە تۇسكەن كەنشىلەر قالاسى قازىرگى تاڭدا دوستىعى مەن بىرلىگى جاراسقان سان ۇلتتىڭ پەرزەنتتەرى تاتۋ-ءتاتتى ءومىر ءسۇرىپ جاتقان ءوندىرىستى قالا سانالادى. وتانىمىزدىڭ ورتالىعىندا تۋ تىككەن شاھار قازىرگى تاڭدا وزىندە تۇراتىن بارلىق ەتنوستار بىرلىگىنىڭ ناعىز نىشانىنا اينالعان. دوستىق پەن تۇسىنىستىكتىڭ ارقاسىندا قاراعاندى قالاسىندا عانا ەمەس, جالپى ءوڭىر ەلدى مەكەندەرىندە ءبىر جەڭنەن قول, ءبىر جاعادان باس شىعارا ىنتىماقپەن ەڭبەك ەتكەن حالىقتى كورەسىڭ. كەشكە سالىم قالا ورتالىعىنداعى الاڭدا اسسامبلەيا جىلىنا ارنالعان شارالار ودان ءارى جالعاسىن تاپتى. ايقىن نەسىپباي, «ەگەمەن قازاقستان». * قوستاناي
دوستىق پەن بىرلىك بايانى
قازاقستان حالقى اسسامبلەياسى جىلىنىڭ قادامى قوستانايدا «جاستار قوعامدىق كەلىسىمدى قالايدى» اتتى جاستار فلەش-موبىنان باستالدى. قولدارىنا الۋان ءتۇستى گۇل, لەنتا, شار ۇستاعان جاستاردىڭ «قازاقستان حالقى اسسامبلەياسىنا – 20 جىل!», «17 ميلليون قازاقستاندىقتىڭ قالاۋى – دوستىق, بىرلىك!», «جاستار قوعامدىق كەلىسىمدى قولدايدى!» دەگەن داۋىسى جارقىن ەستىلەدى. قازاقستاندى قۇت مەكەن ەتكەن ءارتۇرلى ۇلتتاردىڭ اۋەنى قالىقتادى. دوستىق پەن بىرلىك, ادامدار اراسىنداعى شىنايى سىيلاستىق جانە جاستار جالىنى باردا, قىس اۋاسىنىڭ قىتىمىرلىعى دا ىعىساتىنداي. فلەش-موبتىڭ سالتاناتىن كەلتىرىپ تۇرعان جاستاردىڭ الاۋلاعان ءجۇزىن اياز وبەدى. جاستار جيىنىندا اسسامبلەيا جىلىنىڭ تۋى سالتاناتتى كوتەرىلدى. ونى كوتەرۋ قۇرمەتى وبلىسقا, رەسپۋبليكاعا بەلگىلى سپورتشى جاستار توقتار جيەنتاەۆ, يۆان گەربەر, ەليزاۆەتا ياكوۆلەۆا, مارس اقبالينوۆ, جادىرا قاليەۆا جانە ۇلى وتان سوعىسىنىڭ ارداگەرى ميحايل پودولياكوۆ پەن بۇگىنگى كۇننىڭ باتىرى, بىرنەشە ادامنىڭ ءومىرىن ورتتەن قورعاپ قالعان اعا سەرجانت ەرلان دۇزەنوۆكە بەرىلدى. تۋ سالتاناتتى كوتەرىلگەننەن كەيىن جاستار اسپانعا دوستىقتىڭ, بەيبىت ءومىردىڭ بەلگىسىندەي ءتۇرلى-ءتۇستى شارلار ۇشىردى. مۇنان كەيىن قازاقستان حالقى اسسامبلەياسىنىڭ اشىلۋ سالتاناتى ءى.وماروۆ اتىنداعى وبلىستىق قازاق دراما تەاترىندا جالعاستى. وندا وبلىس اكىمى نۇرالى سادۋاقاسوۆ قوستانايلىقتاردى قازاقستان حالقى اسسامبلەياسى جىلىنىڭ اشىلۋىمەن قۇتتىقتادى. – ەلباسى نۇرسۇلتان نازارباەۆتىڭ باستاماسىمەن قۇرىلعان قازاقستان حالقى اسسامبلەياسى 20 جىل بويى قوعامدىق كەلىسىمنىڭ قازاقستاندىق ۇلگىسىنىڭ باسىندا تۇردى, – دەدى نۇرالى مۇستافا ۇلى. – 2015 جىل ەلباسى جارلىعىمەن قازاقستان حالقى اسسامبلەياسىنىڭ جىلى بولىپ جاريالاندى. وسىلاي دەگەن اكىم قازاقستان حالقى اسسامبلەياسىنىڭ ءتوراعاسى نۇرسۇلتان نازارباەۆتىڭ قازاقستاندىقتارعا قۇتتىقتاۋ ءسوزىن وقىپ بەردى. سالتاناتتى جيىنداعى قازاقستاننىڭ وتكەن تاريحي جولى ءتۇرلى ۇلت وكىلدەرىنىڭ ءان-جىرىمەن, بيىمەن بەينەلەندى. ءنازيرا جارىمبەتوۆا, «ەگەمەن قازاقستان». *قىزىلوردا
ىرىس ۇيىعان ەل
سىردىڭ بويىندا اسسامبلەيا جىلىنىڭ اشىلۋى ءسان-سالتاناتىمەن باستالدى. تۇراقتىلىق پەن تولەرانتتىلىقتىڭ, ىرىس پەن ىنتىماقتىڭ ۇيىتقىسىنداي بولعان ۇيىمنىڭ مەرەيىن اسىرىپ, مەيماناسىن تاسىتاتىن شارالار كۇن ۇياسىنان كوتەرىلە تۋىن تىكتەدى. «مۇز ايدىنىندا» ەستافەتالىق جارىس ءوتتى الدىمەن. حالىق مەرەكەنىڭ بەرەكەسىنە اۋىلشارۋاشىلىق جارمەڭكەسىندە كۋا بولدى. ونان سوڭ «سىر انا» مونۋمەنتىنەن باستاۋ العان اۆتوشەرۋ بۇكىل قالانى ارالاپ, ورتالىق الاڭعا كەلىپ توقتادى. بۇل ساتتە قازاقستان حالقى اسسامبلەياسى جىلىنىڭ تۋى رەسمي تۇردە كوتەرىلىپ, «جاستار قوعامدىق كەلىسىمدى قولدايدى» اتتى فلەش-موب ءوتىپ جاتقان. ونان كەيىنگى سالتاناتتى جيىن نارتاي بەكەجانوۆ اتىنداعى دراما تەاتردىڭ ساحناسىندا جالعاستى. ءتۇرلى ۇلت پەن ۇلىستىڭ وكىلدەرى وزدەرىنىڭ ۇلتتىق كيىمىن كيىپ, ءبىر-بىرىمەن ايقارا قۇشاقتاسىپ امانداسىپ, مەرەيلى مەرەكەمەن قۇتتىقتاسىپ, ابىر-سابىر كۇي كەشتى. تەاتردىڭ كىرە بەرىسىنە ءار حالىقتىڭ ومىرىنەن سىر شەرتەتىن بۇيىمدار قويىلىپ, كورمە ۇيىمداستىرىلىپتى. اسسامبلەيا جىلىنىڭ اشىلۋ سالتاناتىنا قاتىسقان وبلىس اكىمى قىرىمبەك كوشەرباەۆ ەلباسىنىڭ حاتىن وقىپ بەرىپ, قۇتتىقتاۋ ءسوز سويلەدى. ايماق باسشىسى ءوز بايانداماسىندا اتالعان ۇيىمنىڭ ءمانى مەن ماڭىزىنا توقتالىپ, قوعامداعى ەرەكشە ءرولىن اتاپ ءوتىپ, بىرلىك پەن ىنتىماق بولعان جەرگە بەرەكە ورنايتىنىن ايتتى. سالتاناتتى شارانىڭ سوڭى «مەنىڭ ەلىم – ماڭگىلىك ەل» اتتى تەاترلاندىرىلعان قويىلىمعا ۇلاستى. ءاربىر ۇلتتىڭ ءانى ورىندالىپ, ءبيى بيلەنىپ, ساحنا جايناپ سالا بەردى. راسىندا, قازاقستان حالقى اسسامبلەياسى سەكىلدى قوعامدىق ينستيتۋت الەمنىڭ ەشبىر ەلىندە جوق. ەلباسى نۇرسۇلتان نازارباەۆتىڭ تىكەلەي باستاماسىمەن قۇرىلعان ۇيىم ەلىمىزدەگى تۇراقتىلىق پەن دامۋدىڭ وزەگىندەي دۇنيە ەكەنى انىق. ەرجان بايتىلەس, «ەگەمەن قازاقستان». *ورالتۋىستىق تۋى قاشاندا جوعارى
كەشە جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ الدىنداعى الاڭعا باتىسقازاقستاندىق جۇرتشىلىق وكىلدەرى وتە كوپ جينالدى. ولار مۇندا اسسامبلەيا جىلىنىڭ اشىلۋىنا وراي وتكىزىلگەن شارالارعا قاتىستى. اسسامبلەيا جىلىنىڭ اشىلۋ ءراسىمى اياسىندا ماڭگىلىك ەل كوشىنە بەتتەپ بارا جاتقان قازاق ەلىنىڭ كەشەگىسى مەن بۇگىنگىسىنە قاتىستى وقيعالاردى قامتيتىن تەاترلاندىرىلعان كورىنىستەر تەرەڭ اسەر قالدىردى. بۇدان سوڭ قازاقستان حالقى اسسامبلەياسى جىلىنىڭ ەمبلەماسى بەلگىلەنگەن جەر شارىنىڭ بەينەسى مەن اسسامبلەيا جىلىنىڭ تۋى كوككە كوتەرىلە بەردى. بۇل تاماشا قايتالانباس ءسات «جاستار قوعامدىق كەلىسىمدى قورعايدى» اتتى 400-گە تارتا ستۋدەنت پەن جاستار قاتىسقان فلەش-موبتىڭ تۇيىنىنە اينالدى. كەلەسى كەزەكتە اتالعان ايماقتىق جوعارى وقۋ ورنىنىڭ ءماجىلىس زالىندا ۇلتتىق-مادەني بىرلەستىكتەر وكىلدەرىنىڭ باستاماسىمەن «اسسامبلەيانىڭ 20 جىلدىعىنا – 20 جاقسى ءىس» اتتى ەستافەتانىڭ بەتاشارى وتكىزىلدى. بۇل كۇنى شوقتىعى بيىك شارالارعا جينالعان جۇرتشىلىق وكىلدەرى الدىندا باتىس قازاقستان وبلىسىنىڭ اكىمى نۇرلان نوعاەۆ باتىسقازاقستاندىقتارعا ارنالعان ەلباسىنىڭ قۇتتىقتاۋىن وقىپ بەردى. بۇدان ءارى وبلىس باسشىسى قازاقستان حالقى اسسامبلەياسىنىڭ بۇعان دەيىنگى تاريحى بىرلىك پەن كەلىسىم, دوستىق پەن تۋىسقاندىق بارشا قازاقستاندىقتىڭ باستى قۇڭدىلىعى ەكەنىن دالەلدەپ بەرگەندىگى جونىندە وي قورىتتى. اسسامبلەيا جىلىن مەرەكەلەۋ رۋحاني كەلىسىم مەن تاتۋلىققا نەگىزدەلگەن ءبىزدىڭ وسىنداي تەرەڭ مازمۇندى بايلانىستارىمىز بەن قارىم-قاتىناسىمىزدى ودان ءارى تەرەڭدەتۋگە قىزمەت جاساي الادى, دەدى ودان ءارى ول. ءبىر سوزبەن ايتقاندا, ەلىمىزدىڭ باتىستاعى قاقپاسى – ورالدا وتكىزىلگەن اسسامبلەيا جىلىنىڭ اشىلۋ ءساتى جارقىن مەرەكەگە اينالدى. ورال ءوڭىرىن مەكەندەيتىن ءتىلەگى ءبىر, ماقسات-مۇددەلەرى ورتاق ءارتۇرلى ەتنوس وكىلدەرى دە گازەت تىلشىسىنە ءوز وي-پىكىرلەرىن جەتكىزدى. سولاردىڭ ءبىرى ورال – جايىق كازاچەستۆوسى باسقارماسىنىڭ ءتوراعاسى اناتولي اۆيلوۆ بىزگە بىلايشا ءۇن قاتتى: – قازاقستان حالقى اسسامبلەياسى جىلى – ەلباسىمىز نۇرسۇلتان نازارباەۆتىڭ بارشامىزعا ورتاق قازاقستاندىق قوعامدىق كەلىسىمدى ورنىقتىرۋ مەن قالىپتاستىرۋداعى باعا جەتپەس قىزمەتىن وسىرمەي, دابىرالاماي, اسىرەلەمەي ايتاتىن ۋاقىت. بىزدە بۇكىل الەمگە ۇلگى بولا الاتىنداي ەتنوسارالىق جاراسىمدىلىق پەن ۇيلەسىمدىلىكتىڭ قايتالانباس مودەلى جاسالدى. ءبىزدىڭ كۇشىمىز – بىرلىكتە. ءبىز اسسامبلەيا ءرولى بۇدان ءارى دە كوتەرىلەتىنىنە, ونىڭ اتقاراتىن قىزمەتى ودان ءارى نىعايا بەرەتىنىنە سەنەمىز. تەمىر قۇسايىن, «ەگەمەن قازاقستان». * وسكەمەنىنتىماقتىڭ التىن ارقاۋى
ەلىمىزدە قازاقستان حالقى اسسامبلەياسى جىلىنىڭ اشىلۋىنا وراي وتكەن جالپىحالىقتىق سينحرون-اكتسياعا شىعىسقازاقستاندىقتار دا ايرىقشا ءۇن قوستى. ەرتەڭگىلىك ەركە ەرتىستىڭ سول جاعاسىنداعى كومسومول ارالىنا حالىق تولاسسىز اعىلدى. وبلىس باسشىلارىمەن بىرگە ءوڭىردەگى قحا مۇشەلەرى, ەتنومادەني بىرلەستىكتەردىڭ وكىلدەرى, جوعارى وقۋ ورىندارىنىڭ ستۋدەنتتەرى جانە قالا تۇرعىندارى مەن قوناقتارى قاتىسقان اكتسياعا بارلىعى 7 مىڭنان استام ادام جينالدى. اتالعان شارا قازاقستان حالقى اسسامبلەياسىنىڭ مەرەكەلىك تۋىن زەڭگىر كوككە سالتاناتتى تۇردە كوتەرۋدەن باستالدى. تۋدى ۇلى وتان سوعىسىنىڭ ارداگەرلەرى ءابىلماجىن بايجۇمانوۆ, دميتري موسكالتسوۆ, وليمپيادا چەمپيونى ولگا رىپاكوۆا جانە وڭىردەگى ءتۇرلى ەتنومادەني بىرلەستىكتەردىڭ جاستارى كوتەردى. مەملەكەت باسشىسى, قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ اكتسيانىڭ قاتىسۋشىلارىنا جولداعان قۇتتىقتاۋ لەبىزىن وبلىس اكىمى دانيال احمەتوۆ وقىپ بەرىپ, بيىل ەلىمىزدە بىرقاتار ايشىقتى مەرەيتويلار وتەتىنىن, ونىڭ ىشىندە قازاقستان حالقى اسسامبلەياسى جىلىنىڭ اشىلىپ وتىرعانىن جەتكىزدى. – ەلباسى نۇرسۇلتان نازارباەۆتىڭ كەمەل ساياساتىمەن قۇرىلعان قازاقستان حالقى اسسامبلەياسى بىرلىك پەن تاتۋلىقتىڭ بىرەگەي ۇلگىسىنە اينالدى. دوستىققا دانەكەر ۇلاعاتتى ىستەردىڭ ۇيىتقىسى بولدى. بيىل ەلىمىزدەگى بەيبىتشىلىك پەن ىنتىماقتىڭ التىن ارقاۋىنا اينالعان اسسامبلەياعا 20 جىل تولادى, – دەدى ءوڭىر باسشىسى دانيال احمەتوۆ. شارا سوڭى مەرەكەلىك كونتسەرتپەن جالعاسىپ, دوستىق ۇيلەرى مەن ەتنومادەني ءبىرلەستىكتەردىڭ قۇرامىنداعى شىعارماشىلىق ۇجىمدار ءوز ونەرلەرىن پاش ەتتى. سونداي-اق, شاڭعىدان جارىس ۇيىمداستىرىلدى. اكتسياعا قاتىسۋشىلار بارلىق ۇلت پەن ۇلىس وكىلدەرىنىڭ ۇلتتىق تاعام مازىرىنەن دايىندالعان «دوستىق داستارقانىنان» ءدام تاتتى. مۇز ايدىنىندا «ءبىز دوستىعىمىزبەن قۋاتتىمىز!» اتتى جاستاردىڭ فلەش-موب اكتسياسى دا جۇرت نازارىن اۋداردى. اتالعان سينحرون-اكتسيانىڭ نەگىزگى ءتىنى – ەلباسى نۇرسۇلتان نازارباەۆتىڭ قوعامدىق كەلىسىم جانە بەيبىتشىلىك يدەيالارى ۇستانىمىن پاش ەتۋگە, «نۇرلى جول – بولاشاققا باستار جول» جولداۋىنداعى مىندەتتەر مەن تاپسىرمالارىن جۇزەگە اسىرۋعا, «ماڭگىلىك ەل» يدەياسىنىڭ توڭىرەگىنە توپتاسۋعا جانە قازاقستان حالقى اسسامبلەياسى جىلىنىڭ اياسىندا بەرەكە-بىرلىگىمىز بەن دوستىعىمىزدى نىعايتۋعا باعىتتالعان. دۋمان اناش, «ەگەمەن قازاقستان». *پاۆلودار
تاڭداۋىمىز – تاتۋلىق
وبلىستاعى اسسامبلەيا مۇشەلەرى, ەتنومادەني بىرلەستىكتەردىڭ جەتەكشىلەرى, اسسامبلەيانىڭ جاستار قاناتى, ۇلتتىق جاڭعىرۋ مەكتەبىنىڭ ۇستازدارى, سوعىس جانە ەڭبەك ارداگەرلەرى, ستۋدەنتتەر, مادەنيەت, ءبىلىم, سپورت سالاسىنىڭ قىزمەتكەرلەرى وبلىس ورتالىعىنا كىرەبەرىستەگى «بىرلىك جانە كەلىسىم مونۋمەنتى» جانىنان استانادان كەلگەن اسسامبلەيا جىلىنىڭ تۋىن كۇتىپ الدى. – بۇل كۇن ءبارىمىز ءۇشىن ەرەكشە ەستە قالادى, ەلىمىزگە تاعى ءبىر مەرەكە كەلىپ قوسىلعانداي, – دەدى ەتنوبىرلەستىكتەر جاستار كەڭەسىنىڭ ءتورايىمى ەلينا پاۋلي. ءيا, ەلباسى جارلىعىمەن 2015 جىل قازاقستان حالقى اسسامبلەياسىنىڭ جىلى بولىپ جاريالاندى. تۋ كوتەرگەن ەستافەتا مۇشەلەرى وبلىستىق جۇسىپبەك ايماۋىتوۆ اتىنداعى مۋزىكالىق-دراما تەاترىن, مەملەكەتتىك رامىزدەر الاڭىن, ش.ءۋاليحانوۆ پەن گ.پوتانين ەسكەرتكىشتەرىن, ساياسي قۋعىن-سۇرگىن قۇرباندارىن ەسكە الۋ ەسكەرتكىشىن, «داڭق» وبەليسكىسىن اينالىپ ءوتىپ, ەسكەرتكىشتەرگە گۇل شوقتارىن قويدى. سودان سوڭ, قازاقستان حالقى اسسامبلەياسى جىلىنىڭ تۋى وبلىس ورتالىعىنداعى «دوستىق ءۇيىنىڭ» الاڭىنا كەلىپ جەتتى. الاڭعا اسسامبلەيا تۋىن سالتاناتتى تۇردە اقىن ارمان قاني, كونكيشى ليۋدميلا پروكاشەۆا, ستۋدەنت انجەليكا كرەيمەر, چەشەن-ينگۋش ەتنومادەني بىرلەستىگىنىڭ توراعاسى مۋمادي ابدۋراشيد, كۇيشى ولجاباي تەمىرلان, تاتار-باشقۇرت وكىلى رينات ابدۋلكايۋموۆ الىپ شىقتى. تۋ كوتەرۋدىڭ سالتاناتتى ءراسىمىن وبلىس اكىمى, وبلىستىق قازاقستان حالقى اسسامبلەياسىنىڭ توراعاسى قانات بوزىمباەۆ, «ۆاتان» ازەربايجان قوعامىنىڭ توراعاسى دجافار ماحمۋدوۆ, ەتنومادەني بىرلەستىكتەردىڭ ءتورايىمى ەلينا پاۋلي جاسادى. وبلىس اكىمى ق.بوزىمباەۆ ەلباسى نۇرسۇلتان نازارباەۆتىڭ قۇتتىقتاۋ ءسوزىن وقىپ بەردى. سونىمەن بىرگە, «دوستىق ءۇيىنىڭ» الاڭىندا «حالىق دوستىعى» اتتى فلەش-موب ۇيىمداستىرىلدى. وبلىستىق قحا جاستار بىرلەستىكتەرىنىڭ كوشباسشىلارى «مەنىڭ تاڭداۋىم – بىرلىك» دەگەن جازۋى بار شارلار ۇشىردى. ورتالىق الاڭدا ءارتۇرلى ۇلتتاردىڭ اۋەندەرىندە ءان ايتىلىپ, بي بيلەندى. «دوستىق ۇيىندە» ءارتۇرلى ۇلت وكىلدەرىنىڭ حالىق قولونەرىنىڭ كورمەسى اشىلدى. وبلىستىق ەتنومادەني بىرلەستىكتەردىڭ باسشىلارىمەن ءتۇرلى كەزدەسۋلەر وتكىزىلدى. اپتا بويى اسسامبلەيا جىلىنا ارنالعان ءتۇرلى شارالار وبلىستاعى اۋدان, قالا, اۋىلداردا دا اتالىپ وتەدى. مەكتەپتەردە قازاقستان حالقى اسسامبلەياسى تاريحىنىڭ قۇرىلۋى, قازىرگى جۇمىسى, بولاشاعى تاقىرىبىندا لەكتسيا ساباقتارى جۇرەدى. سونىمەن قاتار, وبلىستاعى كىتاپحانالاردا كىتاپ كورمەلەرى, كەزدەسۋلەر جانە تاعى باسقا شارالار ۇيىمداستىرىلادى. فاريدا بىقاي, «ەگەمەن قازاقستان». سۋرەتتى تۇسىرگەن ۆلاديمير بۋگاەۆ. *پەتروپاۆل
تاعاتتىلىق تامىرى تەرەڭدە
ەلىمىزدىڭ وزگە ايماقتارى سياقتى قىزىلجار وڭىرىندە دە قازاقستان حالقى اسسامبلەياسى جىلى سالتاناتتى تۇردە اشىلىپ, حالىقتىق مەرەكەگە ۇلاستى. ەلباسى ن.نازارباەۆتىڭ ارنايى جارلىعىمەن جاريالانعان رەسمي شارا وبلىس اكىمى ەرىك سۇلتانوۆتىڭ قاتىسۋىمەن م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە «جاستار قوعامدىق كەلىسىمدى قولدايدى!» اتتى فلەش-موبپەن ءوتىپ, ەڭ باستى قۇندىلىقتارىمىز – تاۋەلسىزدىگىمىز, بىرلىگىمىز بەن ىنتىماعىمىز كەڭىنەن جىرلاندى. سوعىس, ەڭبەك ارداگەرلەرىنەن, جاستاردان, قوعامدىق ۇيىمدار مەن ۇلتتىق-مادەني بىرلەستىكتەر وكىلدەرىنەن قۇرالعان مىڭداعان ادام وسىندا جينالىپ, بىرەگەي ينستيتۋت – قازاقستان حالقى اسسامبلەياسىنىڭ ەلىمىزدەگى بارلىق ۇلت پەن ۇلىستى ءبىر شاڭىراق استىنا توپتاستىرا بىلگەن تاباندى دا جىگەرلى جۇمىستارىنا قولداۋ كورسەتتى. ءيا, مەملەكەت باسشىسىنىڭ ساليقالى دا بايىپتى ساياساتى ارقاسىندا قازاقستاننىڭ تاتۋلىق مەكەنىنە, دوستىقتىڭ بەكەم ورداسىنا اينالعانىنا ەشكىم شاك كەلتىرە الماسى انىق. ەرىك حامزا ۇلى سولتۇستىكقازاقستاندىقتاردى ەلىمىزدىڭ بارلىق جەرلەرىندە ءبىر مەزگىلدە الاۋى تۇتانعان سالتاناتتى مەرەكەنىڭ مارە الۋىمەن قۇتتىقتاپ, ەلباسىنىڭ قازاقستان حالقى اسسامبلەياسىنىڭ اشىلۋىنا ارنالعان قۇتتىقتاۋىن وقىپ بەردى. ەڭبەك ارداگەرى گريگوري كۋحار, №17 ۇلتتىق جاڭعىرتۋ مەكتەبى تاريح ءپانىنىڭ مۇعالىمى يرينا تۋحۆاتۋلينا ءوز سوزدەرىندە باق-بەرەكە, ىرىس ەسەلەنگەن, اسەم ءان مەن كۇي تەربەلگەن ەلىمىز قوعامدىق بىرلىكتى تۋ ەتىپ ۇستاۋ ارقىلى دامىعان, بولاشاعى جارقىن مەملەكەتكە اينالعانىن, كەز كەلگەن عالامات جوسپارلاردى ىسكە اسىرۋعا قابىلەتتى ەكەنىن تولعانا جەتكىزدى. وبلىسقا تانىمال ءبىر توپ سوعىس, ەڭبەك ارداگەرلەرى مەن سپورت مايتالماندارى اسسامبلەيا تۋىن كوتەرۋ قۇرمەتىنە يە بولدى. اكتسيا ودان ءارى ەڭسەلى ءبىلىم ورداسىنىڭ اكت زالىندا جالعاسىپ, اسسامبلەيانىڭ قازاقستان ازاماتتارىن وتانسۇيگىشتىك رۋحتا تاربيەلەۋدەگى, ولاردىڭ اراسىنداعى دوستىق پەن ىنتىماقتى نىعايتۋداعى ولشەۋسىز ءىسى پاش ەتىلدى. سونىڭ ناقتى كورىنىسى رەتىندە جۇزدەن استام ەتنوستاردىڭ باسىن بىرىكتىرىپ وتىرعان ءوڭىردىڭ بەرەكەلى دە مەرەكەلى كەلبەتى ءار جۇرەككە نۇر بولىپ قۇيىلىپ جاتتى. مەرەكەلىك كونتسەرت «قازاقستان – ورتاق ءۇيىمىز» اتتى ۆوكالدى-حورەوگرافيالىق كومپوزيتسيامەن اشىلىپ, ساحناعا كەزەكپە-كەزەك كوتەرىلگەن «اراي», «قارلىعاش», «درۋجنىە رەبياتا», «ەكسپرومت», «الۋا», «قۋانامىن» بي انسامبلدەرى ءار حالىقتىڭ بيلەرىن ناقىشىنا كەلتىرە ورىنداپ بەردى. ءتۇرلى تىلدەردە شىرقالعان اندەردى كورەرمەندەر وتە جىلى قابىلداپ, ۇلكەن ىقىلاسپەن تىڭدادى. ءومىر ەسقالي, «ەگەمەن قازاقستان». سۋرەتتى تۇسىرگەن تالعات تانىباەۆ. *تالدىقورعان
جاراسىمدى جالعاعان جىل
تالدىقورعانداعى «جاستار» سپورت سارايىندا قازاقستان حالقى اسسامبلەياسى جىلىنىڭ اشىلۋىنا وراي سالتاناتتى جيىن ءوتتى. «عاسىرلار ۇندەستىگى» اتتى قازاق حاندىعىنىڭ 550 جىلدىعىنان سىر تارتقان تەاترلاندىرىلعان كورىنىس شوقان, ءسۇيىنباي, اباي تۋىندىلارىن پاش ەتە كوك بايراقتى جەلبىرەتە ەل بولىپ ءانۇراندى ورىنداۋمەن ۇلاستى. ەلباسىنىڭ اسسامبلەيا جىلى اياسىنداعى حالىققا ارناعان قۇتتىقتاۋىن الماتى وبلىسىنىڭ اكىمى اماندىق باتالوۆ وقىپ بەردى. اسسامبلەيا جىلىنىڭ تۋى كوتەرىلىپ, ءار ەتنوس وكىلدەرى ۇلتتىق بيلەرىن بيلەپ, مەرەكەلىك ءان شاشۋمەن كوڭىلدەرگە قۋانىش نۇرىن سەبە ءبىلدى. بەلگىلەنگەن كەستەگە سايكەس, «قازاقستان حالقى اسسامبلەياسى – 20 ىزگى ءىس» اتتى اۋىسپالى ەستافەتاسىنىڭ سيمۆولى اقسۋ اۋدانىنىڭ وكىلدەرىنە تاپسىرىلدى. جىل سوڭىنا دەيىن بۇل تايقازان الماتى وبلىسىنىڭ اۋداندارى مەن قالالارىن ارالاتا وتكىزىلىپ, استاناعا جەتكىزىلەتىنى دە حابارلاندى. سونداي-اق, رەسپۋبليكالىق, وبلىستىق دەڭگەيلەردە ءتۇرلى سالالار بويىنشا بايقاۋلار وتكىزىلەتىنىن دە سالا وكىلدەرى جاريالادى. بەلارۋس مايدانىنا قاتىسقان ارداگەرلەرگە «بەلارۋس مەملەكەتىنىڭ نەمىس باسقىنشىلارىنان ازات ەتىلگەنىنە – 70 جىل» مەدالىن وبلىس اكىمى وسى كۇنى تابىس ەتتى. ايتۋلى شارانىڭ تاعى ءبىر ارتىقشىلىعى ساحنا تورىنە كوتەرىلىپ, ىزگى نيەتتەرىن بىلدىرگەن ءتۇرلى ەتنوس وكىلدەرىنىڭ بارلىعى تازا قازاق تىلىندە ەش ءمۇدىرىسسىز سويلەپ, جاميعاتتىڭ قوشەمەتىنە بولەندى. وسىناۋ ىزگىلىكتى «ءتىل-پاراسات» رەسپۋبليكالىق بايقاۋىنىڭ جەڭىمپازى تاتيانا بەدارەۆا «مەملەكەتتىك تىلگە دەگەن قۇرمەتىمىز» دەپ تۇيىندەدى. جەتىسۋ جەرىندە تۇراتىن 103 ەتنوس وكىلى باس قوسقان جيىن «قازاقستان – نۇرسۇلتان!» ۇرانىمەن ارلەنىپ, باۋىرساق مەرەكەسىمەن شادىمان شاتتىققا بولەدى. نۇربول الدىباەۆ, «ەگەمەن قازاقستان». *تارازشاڭىراعى بيىك شاتتىق مەكەنى
«ەل بىرلىگى – ەڭ اسىل قاسيەت» دەپ ەلباسىمىز ايتقانداي, قازاقستان كوپتەگەن ۇلتتاردىڭ باسىن ءبىر شاڭىراق استىنا بىرىكتىرىپ وتىرعان تۇعىرلى مەكەن. ءيا, وسىناۋ ۋاقىت ارالىعىندا جاس بارىستاي قۋاتتى مەملەكەتىمىز الەمگە ءوزىن تانىتىپ, دامۋدىڭ قارىشتى قادامدارىن جاساعان سەرپىندى ەل رەتىندە مويىندالىپ ۇلگەردى. ەڭ باستىسى, سۇتتەي ۇيىعان ۇلتتار تاتۋلىعىنىڭ جارقىن ۇلگىسىنە اينالدى. كەشە قازاقستان حالقى اسسامبلەياسى جىلىنىڭ جامبىل جەرىندە باستالعان سالتاناتتى ساتتەرىن اۋليەاتالىقتار بەرەكە, بىرلىگىمەن قارسى الدى. قاسيەتتى اۋليەاتا ءوڭىرى – ەجەلدەن دوستىقتىڭ كيەلى مەكەنى. جالپى, جامبىل وبلىسىندا سەكسەننەن استام ۇلتتىڭ وكىلدەرى تۇرادى. 26 وبلىستىق, 47 اۋداندىق ەتنومادەني بىرلەستىك جۇمىس ىستەيدى. بۇل كۇنى تۇڭعىش پرەزيدەنت ساياباعىنان باستالعان مارافون, «بالاساعۇن» وكز الدىنداعى قازاقستان حالقى اسسامبلەياسى جىلىنىڭ تۋىن سالتاناتتى كوتەرۋ راسىمىمەن جالعاستى. جاستار جەتكىزگەن دوستىق تۋىن مۇنان سوڭ لوندون وليمپياداسىنىڭ قولا جۇلدەگەرى اقجۇرەك تاڭاتاروۆ, قوعام قايراتكەرى الەكساندر ساۆچەنكو جانە جامبىل وبلىسىنىڭ اكىمى كارىم كوكىرەكباەۆ تۇعىرعا بەكىتىپ, سالتاناتتى جاعدايدا بيىككە كوتەردى. سونداي-اق, «جاستار قوعامدىق كەلىسىمدى قولدايدى» جاستار فلەش-موبى, «شەبەر» حالىقتىق-قولدانبالى ونەر شەبەرلەرىنىڭ كورمە-جارمەڭكەسى, «قازاقستان حالقى اسسامبلەياسى جىلىنىڭ باستاۋ الۋى» سينحرون-اكتسياسىنىڭ سالتاناتتى اشىلۋى كوپشىلىككە كوتەرىڭكى كوڭىل-كۇي سىيلادى. ورالحان ءداۋىت, «ەگەمەن قازاقستان». * شىمكەنت
جاسا, سامعا, قازاقستان!
جاڭا اكىمشىلىك-ىسكەرلىك ورتالىعىنداعى الاڭدا قازاقستان حالقى اسسامبلەياسى جىلىنىڭ اشىلۋى سالتاناتتى جاعدايدا ءوتتى. وڭتۇستىك قازاقستان وبلىسىندا ءجۇزدەن اسا ءارتۇرلى ەتنوس وكىلدەرى, جيىرما مادەني-ۇلتتىق بىرلەستىك جۇمىس جاسايدى. قازاقستان حالقى اسسامبلەياسى جىلى – بەيبىتشىلىك پەن كەلىسىم, تاتۋلىق, «ماڭگىلىك ەل» يدەياسىن ىسكە اسىرۋ, «نۇرلى جول – بولاشاققا باستار جول», ياعني جاڭارۋ جىلىمەن استاسىپ جاتقان قۇتتى جىل. ءسوز العان ەتنوس وكىلدەرى ويلارىن ەلىمىز ءۇشىن باستى قۇندىلىقتار بولىپ سانالاتىن وسى جايتتاردان الىپ جاتتى. اسسامبلەيا تۋىن سالتاناتتى تۇردە الىپ شىققان سپورتشىلاردى ۋاقىتىندا قازاقستان بوكس قۇراماسىنىڭ كاپيتانى بولعان, ەڭبەك سىڭىرگەن سپورت شەبەرى, كسرو-نىڭ ءتورت دۇركىن, ەۋروپانىڭ ەكى ءدۇركىن, ازيا مەن ازيا ويىندارىنىڭ ەكى دۇركىن چەمپيونى نۇرجان سمانوۆ باستاپ شىقتى. ال 15 مەترلىك تۋدى كوتەرگەندەر – داڭقتى بالۋان بيسولت دەتسيەۆ, اۋىر اتلەتشى اندرەي ماكاروۆ, بوكسشى, وليمپيادانىڭ قولا جۇلدەگەرى ەركەبۇلان شىناليەۆ. بۇل سالتاناتتى شارادان كەيىن «جاستار قوعامدىق كەلىسىمدى قولدايدى» اتتى فلەش-موب وڭتۇستىك ورەندەرىنىڭ ورىنداۋىندا كوپشىلىك نازارىنا ۇسىنىلدى. ال وڭتۇستىكتەن باقىتىن تاپقان ەتنوس وكىلدەرىنىڭ سالتاناتتى شەرۋىنەن كەيىن وبلىستىق ءماسليحاتتىڭ دەپۋتاتى, «ەل ءبىرلىگى» دەپۋتاتتار توبىنىڭ جەتەكشىسى ءابىلقاسىم دوسبولوۆ قۇتتىقتاۋ ءسوز سويلەدى. «تۇركىستان» سارايىندا جالعاسقان مەرەكەدە وبلىس اكىمىنىڭ ورىنباسارى ساپاربەك تۇياقباەۆ قازاقستان رەسپۋبليكاسىنىڭ پرەزيدەنتى – قازاقستان حالقى اسسامبلەياسىنىڭ توراعاسى نۇرسۇلتان نازارباەۆتىڭ قازاقستان حالقى اسسامبلەياسى جىلىنىڭ اشىلۋىنا ارنالعان قۇتتىقتاۋ ءسوزىن وقىدى. سالتاناتتى كەش كونتسەرتتىك باعدارلاماعا ۇلاستى. باقتيار تايجان, «ەگەمەن قازاقستان». سۋرەتتى تۇسىرگەن قايسار شەرىم.
