سۋرەت: qaz.sarbaz.kz
مورالدىق-پسيحولوگيالىق تۇراقتىلىق – اسكەرلەردىڭ جاۋىنگەرلىك قابىلەتىنىڭ نەگىزگى قۇرامداس بولىگى. سوندىقتان سالادا زاماناۋي ادىستەر مەن تاسىلدەردى تاجىريبەگە ەنگىزۋ, دايەكتى جانە جۇيەلى جۇمىس ىستەۋگە ەرەكشە نازار اۋدارۋ ماڭىزدى. ءبىر جاعىنان, قازىرگى زامانعى سوعىستىڭ ناتيجەسى جەكە قۇرامنىڭ تەحنيكا مەن قارۋدى شەبەر مەڭگەرۋ قابىلەتىنە عانا ەمەس, سونىمەن قاتار ونىڭ پسيحولوگيالىق كوڭىل كۇيىنە, اسكەري قىزمەتشىلەردىڭ قىزمەتىنە قولايلى جاعداي جاساۋعا, ولاردىڭ ناقتى الەۋمەتتىك قاجەتتىلىكتەرىن قاناعاتتاندىرۋعا بايلانىستى. مۇنى ەسكەرگەن ءمينيستردىڭ ورىنباسارى جيىندا بۇل تەك پسيحولوگيالىق تەستتەر نە جەكە اڭگىمە جۇرگىزۋمەن شەكتەلمەي, ساربازداردىڭ كۇندەلىكتى جانە وقۋ-جاۋىنگەرلىك شارالارى بارىسىندا دا جۇرگىزىلۋى قاجەت ەكەنىن ايتتى.
– اسكەريلەردىڭ جاۋىنگەرلىك قابىلەتىن انىقتايتىن نەگىزگى كريتەريدىڭ ءبىرى – ولاردىڭ مورالدىق جانە پسيحولوگيالىق كۇيى. ويتكەنى اسكەري قىزمەتشىلەردىڭ شايقاستا قورقىنىشتى جەڭۋى جانە جەڭىسكە دەگەن ەرىك-جىگەرىن ساقتاۋى, تاپسىرمانىڭ ءساتتى ورىندالۋى قاۋىپ-قاتەرلەرگە, شيەلەنىستەرگە جانە ۇرىس جاعدايلارىنا قالاي دەن قويۋىنا بايلانىستى. دەمەك ساربازدار مەن وفيتسەرلەردە بۇل فاكتورلاردىڭ تۇراقتى بولۋى جاۋىنگەرلىك ءىس-قيمىلدا قارىم-قابىلەتىن كورسەتەدى, – دەدى گەنەرال-مايور شايح-حاسان جازىقباەۆ.
ءتىپتى وسى ساباق بارىسىندا جاۋىنگەرلىك دايارلىق بويىنشا تومەن باعا العان, ۇيرەتكەنگە نەمقۇرايلى قارايتىن, شىنىقپاعان, ءالسىز جانە قىزمەتكە بەيىمدەلۋدە نەشە ءتۇرلى قيىندىقتارعا تاپ بولعان اسكەري قىزمەتشىلەرگە ەرەكشە نازار اۋدارۋ قاجەت دەگەن پىكىردە. ونىڭ ۇستىنە پسيحوەموتسيونالدىق كۇي جەكە قۇرامعا شىعىندارعا, جاعدايلاردىڭ اۋىرلىعىنا نە رەسۋرستاردىڭ جەتىسپەۋشىلىگىنە قاراماستان, جاۋىنگەرلىك رۋح پەن كۇش-جىگەردى ساقتاۋعا مۇمكىندىك بەرەدى. سايكەسىنشە بولىمشەنىڭ جاۋىنگەرلىك تيىمدىلىگىن ايتارلىقتاي ارتتىرادى.
دوڭگەلەك ۇستەلدە قۇرلىق اسكەرلەرى, اۋە قورعانىسى كۇشتەرى جانە اسكەري-تەڭىز كۇشتەرى باس قولباسشىلارىنىڭ ورىنباسارلارى دا كوزقاراسىمەن ءبولىستى. ولار مورالدىق-پسيحولوگيالىق اسەر ەتۋدە پسيحولوگيالىق, اقپاراتتىق-تاربيەلىك جانە اسكەري-الەۋمەتتىك جۇمىس سىندى كومپونەنتتەرگە جەكە-جەكە توقتالدى.
باسقوسۋعا بەيىندى دەپارتامەنت وكىلدەرى, ۇقۋ جان-جاقتى قامتاماسىز ەتۋ فاكۋلتەتى اسكەري وقىتۋ جانە تاربيە كافەدراسىنىڭ پروفەسسور-وقىتۋشىلار قۇرامى قاتىستى. بەينەكونفەرەنتسيا ارقىلى جەكە قۇرامنىڭ مورالدىق-پسيحولوگيالىق تۇراقتىلىعىن نىعايتۋ ماسەلەلەرىن تالقىلاۋعا اسكەر تەكتەرىنىڭ جانە وڭىرلىك قولباسشىلىقتاردىڭ لاۋازىمدى ادامدارى دا قوسىلدى.
بۇعان قوسا باسقوسۋعا قارۋلى كۇشتەر تىل باستىعى باسقارماسىنىڭ جانە اسكەري بولىمدەردىڭ وكىلدەرى دە قاتىستى. ولار اسكەرلەردى مورالدىق-پسيحولوگيالىق قامتاماسىز ەتۋدى نىعايتۋ جونىندەگى ءوز ۇسىنىستارىن ورتاعا سالدى.
جيىن قورىتىندىسىندا تاقىرىپ توڭىرەگىندەگى ۇسىنىستاردىڭ بارلىعى پراكتيكادا ىسكە اسىرۋ ءۇشىن مۇقيات تالدانىپ جيناقتالاتىنى ايتىلدى.
