سۋرەتتى تۇسىرگەن – ەرلان ومار, «EQ»
ءبىر كۇندىك ادىستەمەلىك جيىندا قالالىق قورعانىس ىستەرى جونىندەگى دەپارتامەنت باستىعى پولكوۆنيك ابدىعابيت شەگەباەۆ ءسوز باستادى. ول وسىنداي ءىس-شارالار جاس ۇرپاقتىڭ بويىندا ۇلتتىق قۇندىلىقتارعا, ەل مەن جەرگە دەگەن قۇرمەت سەزىمىن تۋدىراتىنىن اتاپ ءوتتى. سونداي-اق تاربيەلىك ماندەگى باسقوسۋلار ازاماتتاردىڭ پاتريوتتىق رۋحىن كوتەرۋدە ماڭىزدى ءرول اتقاراتىنىن ايتا كەلە, ءىس-شارانى ۇيىمداستىرۋشىلارعا العىسىن جەتكىزدى.
«بۇل جيىننىڭ ءبىلىم باسقارماسى جانىنداعى «ادىستەمەلىك ورتالىق» مەملەكەتتىك كوممۋنالدىق مەكەمەسىنىڭ» ديرەكتورى شولپان ايتباەۆا مەن اباي, ءال-فارابي, تۇران اۋداندارىنىڭ بىرىكتىرىلگەن قورعانىس ىستەرى جونىندەگى باسقارما باستىعى پولكوۆنيك عالىمجان فاكيردينوۆتىڭ ءوزارا ارىپتەستىگى اياسىندا بەكىتىلگەن جوسپارعا ساي ءوتىپ جاتقانىن بىلەمىز. بۇل سەمينار العا قويعان ماقساتتارىمىزدىڭ ورىندالۋىنا وڭ سەپتىگىن تيگىزىپ, وسكەلەڭ ۇرپاقتى دۇرىس باعىتتا تاربيەلەۋگە بارىنشا ىقپال ەتەدى دەپ كامىل سەنەمىن», دەدى ءا.شەگەباەۆ.
اشىق ساباق تۇرىندە وتكەن سەميناردا ماماندار ءارتۇرلى ادىستەمەلەرمەن ءبولىستى. ايتالىق, ينفورماتيكا ءپانىنىڭ مۇعالىمى ايمان باۋمۇراتوۆا ءدارىس بارىسىندا اسكەري روبوتتەحنيكانىڭ نەگىزدەرى مەن اسكەري روبوتتاردىڭ تۇرلەرى جانە ولاردى قالاي قولدانۋ كەرەكتىگى تۋرالى جان-جاقتى ءتۇسىندىرىپ بەردى. بۇل رەتتە ۇيىمداستىرۋشىلار وسى ساباق ارقىلى سەمينارعا قاتىسۋعا كەلگەندەرگە زاماناۋي تەحنولوگيالاردى تانىستىرىپ, اسكەري روبوتتەحنيكانىڭ ماڭىزدى تۇستارى جونىندە مالىمدەدى. اسىرەسە سوعىس ارەكەتتەرىن جۇرگىزۋدە قولدانىلاتىن ماڭىزدى قۇرالدار – اسكەري روبوتتاردى بالالار قىزىعا قارادى.
سونىمەن قاتار ادىستەمەلىك جيىن كەزىندە دەنە شىنىقتىرۋ پانىندە جاراقات الىپ قالماۋدىڭ الدىن الۋ, ويىن بارىسىندا قاۋىپسىزدىك شارالارىن ساقتاۋ تۋرالى كەڭەستەر ايتىلىپ, بالالاردىڭ دەنساۋلىعىن نىعايتۋعا, ولاردىڭ فيزيكالىق بەلسەندىلىگىن ارتتىرۋعا بايلانىستى ءتيىستى نۇسقاۋلىقتار مەن باعىت-باعدارلار بەرىلدى.
سەميناردا جول ءجۇرۋ ەرەجەلەرى مەن قاۋىپسىزدىك شارالارىنا قاتىستى دارىستەر وقىلدى. سونىڭ بارىسىندا جەرگىلىكتى پوليتسيا دەپارتامەنتىنىڭ قىزمەتكەرلەرى جول ءجۇرۋ ەرەجەلەرىنىڭ قاۋىپسىزدىگى جايىندا ءتۇسىندىرۋ جۇمىستارىن جۇرگىزدى. جول پوليتسياسى وكىلدەرى اسكەري جەتەكشىلەرگە جول قوزعالىسى كەزىندە قاۋىپسىزدىك ەرەجەلەرىن ساقتاۋ قانشالىقتى ماڭىزدى ەكەنىن ءتۇسىندىرىپ بەردى. سەبەبى بۇل شارالار بالالاردىڭ ءومىرى مەن دەنساۋلىعىن قورعاۋعا, سونداي-اق موينىنا مىندەت العان ازاماتتاردىڭ جاۋاپكەرشىلىگىن ارتتىرۋعا ىقپال ەتەدى دەپ اتاپ ءوتتى.
ال سابىر راحىموۆ اتىنداعى اسكەري كوللەدجدەن كەلگەن وكىلدەر جاستاردى اسكەر قاتارىندا وتان الدىنداعى بورىشتى وتەۋگە شاقىردى. وسىعان بايلانىستى جاس ورەندەردى ىنتالاندىراتىن, جىگەر بەرەتىن رۋحتى سوزدەر ايتىپ, اسكەري قىزمەتتىڭ ماڭىزدىلىعى مەن ارتىقشىلىقتارى تۋرالى اڭگىمەلەدى. بىرنەشە تاقىرىپتان قۇرالعان سەميناردىڭ بۇل بولىمىندە جاستار وتان الدىنداعى جاۋاپكەرشىلىكتى سەزىنۋدى ۇيرەندى. راسىندا دا سەمينار جاستاردىڭ كەلەشەكتە اسكەري سالانى ماماندىق رەتىندە تاڭداۋىنا قىزىعۋشىلىعىن وياتقان ماڭىزدى باسقوسۋ بولدى.
تاربيەلىك ءىس-شارا سوڭىندا كونتسەرتتىك قويىلىم قويىلدى. جالپى, سەمينار ازاماتتاردىڭ وتانشىلدىق سانا-سەزىمىن كۇشەيتۋگە باعىتتالدى. سونىمەن قاتار بۇگىنگى اسكەري سالادا كەڭىنەن قولدانىلىپ جاتقان ءارتۇرلى روبوتتاندىرىلعان تەحنيكالاردىڭ تانىستىرىلىمى دا قاتىسۋشىلاردىڭ ءبىراز تانىم-تۇسىنىگىن كەڭەيتتى. اسىرەسە قورعانىس سالاسىنىڭ ماماندارى العاشقى اسكەري دايىندىق ءپانىنىڭ ۇستازدارىنا ءوز تاجىريبەلەرىن ۇيرەتىپ, كاسىبي مامان رەتىندە شەبەرلىكتەرىن شىڭداۋ مەن جاستاردى پاتريوتتىق رۋحتا تاربيەلەۋگە قانداي جولدار مەن ءادىس-تاسىلدەر بار ەكەنىن كورسەتتى.
باسقوسۋدا ايتىلعانداي ەلدە بەيبىتشىلىكتى ساقتاۋدىڭ امالدارىنىڭ ءبىرى – قورعانىس سالاسىنىڭ بەرىكتىگى. ال ونى قامتاماسىز ەتۋ ءۇشىن ەڭ الدىمەن وسى ەلدە تۇرىپ جاتقان ازاماتتاردىڭ وتانعا دەگەن ماحابباتى, پاتريوتتىق سەزىمدەرى وتە كۇشتى بولۋ كەرەك. سونىڭ ىشىندە جاستاردىڭ جۇرەگى ەلىم دەپ سوعىپ, سىن ساعاتتا بارىنە دە دايىن ەكەنىن ىشتەي ءبىلىپ ءجۇرۋى قاجەت. ءوز كەزەگىندە وسكەلەڭ ۇرپاقتىڭ بويىندا وسىنداي مىنەز قالىپتاستىراتىن – ۇلتتىق رۋحتاعى تاربيە. سوندىقتان ۇيىمداستىرۋشىلار تاربيەلىك ماقساتتاعى ادىستەمەلىك سەمينارلار بۇدان كەيىن دە تۇراقتى تۇردە جالعاسىپ وتىراتىنىن جەتكىزدى.
شىمكەنت
