قازىر «Qarmet» اق ونىمدەرىن دۇنيەجۇزىنىڭ قىرىق شاقتى ەلىنە ەكسپورتتايدى. ءبىزدىڭ ساپالى مەتاللۋرگيالىق ونىمدەر الەمنىڭ بارلىق ەلىن قىزىقتىرىپ وتىر. دەگەنمەن كاسىپورىن ىشكى نارىقتى وتاندىق ونىممەن قامتاماسىز ەتۋ ماقساتىندا جاڭا ستراتەگيالىق باعىت تاڭداعان. ءوندىرىس وشاعىنىڭ وكىلدەرى ءوز ونىمدەرىن جەرگىلىكتى كاسىپكەرلەرگە ۇسىنۋ نيەتىمەن جۋىردا شىمكەنتتە ارنايى كەزدەسۋ ۇيىمداستىردى. وعان مەگاپوليستەگى ءوندىرىس, قۇرىلىسپەن اينالىساتىن كوپتەگەن كاسىپورىن باسشىلارى قاتىستى.
ء«بىز بۇل جەرگە «Qarmet» اق مەن جەرگىلىكتى كومپانيالار اراسىندا ارىپتەستىك بايلانىس ورناتۋ ءۇشىن كەلدىك. كاسىپورىن بۇگىندە الدىنا بىرنەشە ماڭىزدى مىندەت قويىپ, سولاردى جۇزەگە اسىرعالى وتىر. اتاپ ايتقاندا, ول جوعارى ناتيجەلى ەڭبەك قاۋىپسىزدىگىن قامتاماسىز ەتۋ, 2028 جىلعا قاراي ءوندىرىس كولەمىن 66%-عا ۇلعايتۋ. ءوندىرىس اۋقىمىنىڭ كەڭەيۋىمەن ءبىز ەلدەگى مەتاللۋرگيا ونىمدەرىنە دەگەن سۇرانىستى 100% جابامىز. وتاندىق كاسىپكەرلەرمەن ارىپتەستىك كەزدەسۋ ۇيىمداستىرىپ, ءوزارا بايلانىستى نىعايتۋ ءۇشىن «اتامەكەن» كاسىپكەرلەر پالاتاسىنىڭ الاڭىن پايدالانامىز. ءبىزدىڭ كاسىپورىن تەمىر تاقتالار, سورتتى پروكات, يلەكتەلگەن ورامدار مەن جۇقا تەمىرلەر, مىرىشتالعان پروكات, شاعىن ديامەترلى قۇبىرلار, مۇزداي يلەكتەلگەن ورامدار مەن تەمىرلەر, پوليمەرمەن قاپتالعان پروكات, سونداي-اق شارشى ءپىشىندى دايىندامالار شىعارادى. مىنە, وسى ونىمدەردى شىمكەنتتىك كاسىپكەرلەرگە ۇسىنۋعا ءارى مەتاللۋرگيا كومبيناتىنىڭ بۇگىنگى تىنىس-تىرشىلىگىن بايانداۋعا كەلدىك. الداعى ۋاقىتتا ارىپتەستىك قارىم-قاتىناس جاندانا تۇسەدى دەگەن سەنىمدەمىز», دەدى «Qarmet» اق وكىلى ايگۇل داۋەنوۆا.
جيىنعا قاتىسۋشى بيزنەس وكىلدەرىنىڭ ىشىندە جول قۇرىلىسى سالاسىندا قىزمەت اتقاراتىن «كورپوراتسيا بەرەكە ا» فيرماسىنىڭ ديرەكتورى ەركىنگۇل وسپاناليەۆا وتاندىق مەتالل بۇيىمدارىنا ەرەكشە قىزىعۋشىلىق تانىتىپ وتىرعانىن جەتكىزدى.
«ەلىمىزدەگى مەتاللۋرگيا كومبيناتىنىڭ الىبى «Qarmet» كومپانياسىنان تەمىر, بولات سەكىلدى مەتالل ونىمدەرىن الۋدى كوزدەپ وتىرمىز. ەگەر قۇنى نارىقتاعى باعادان قىمبات بولماسا, نەگە وزىمىزگە كەرەكتى ونىمدەردى سول جەردەن الماسقا؟ بۇرىن مەتالدى رەسەيدەن تاسىمالدايتىنبىز. بىراق كورشى ەلدەن اكەلۋ قيىنداپ كەتكەن سوڭ, قازىر قاراعاندى وبلىسىنداعى تەمىر بۇيىمدارىن شىعاراتىن ەكى-ءۇش كومپانيادان الىپ ءجۇرمىز. بىزگە نەگىزىنەن تەمىردەن جاسالعان ارماتۋرالار كەرەك. ودان وزىمىزدەگى زاۋىتتا كوپىر قۇرىلىسىنا قاجەتتى تەمىر-بەتون بۇيىمدارىن جاساپ شىعارامىز. سايرام ەلدى مەكەنى اۋماعىندا ۇلكەن ەكى كوپىر سالىپ جاتىرمىز. مۇنداي جاۋاپتى قۇرىلىس جوبالارىنا وتە بەرىك, ساپالى ارماتۋرالار كەرەك. قىتايدىڭ ونىمدەرى وعان جارامايدى. «Qarmet» ونىمدەرىنىڭ ساپاسى ۋاقىتپەن دالەلدەنگەن. سوندىقتان ونىڭ مەتالل بۇيىمدارى ەشقانداي كۇمان تۋعىزا قويماس دەگەن ويدامىز. شىمكەنتتىڭ وزىندە دە تەمىر ارماتۋرالار شىعارىلادى. ونى مەگاپوليستىڭ يندۋستريالىق ايماعىندا ورنالاسقان مەتاللۋرگيا كومبيناتى وندىرەدى. بىراق شىمكەنت ءونىمىنىڭ ساپاسى ناشار. تەمىر بۇيىمدارى تەز مايىسىپ كەتەدى, دانەكەرلەۋگە دە جارامايدى. رەسەيگە سالىنعان سانكتسيانىڭ اسەرى بولدى ما ەكەن, ول جاعىن ناقتى بىلمەدىم. الايدا ول جاقتان مەتالل ونىمدەرىن اكەلۋ تىپتەن قيىنداپ كەتتى. اقشاسىن 3–4 اي بۇرىن اۋدارىپ قويىپ, جانىڭدى شۇبەرەككە ءتۇيىپ وتىراسىڭ. ونىڭ ۇستىنە, تەمىرجول كولىگىنىڭ قۇنى دا اسپانداپ كەتتى. سول سەبەپتى وتاندىق تاۋارعا كوشۋگە شەشىم قابىلدادىق», دەيدى.
ەكونوميست مارات سەيداحمەتوۆ رەسەيدەگى سانكتسيالىق جاعدايدى ەل ەكونوميكاسىن كوتەرۋگە پايدالانۋعا بولاتىنىن ايتادى. قازىر كوپتەگەن نارىقتاعى سەگمەنتتە كورشى ەل تاۋارلارى ازايىپ قالدى. سولاردىڭ ورنىن تولتىرۋ ءۇشىن وتاندىق كاسىپورىندار جانتالاسىپ ءونىم ءوندىرىپ, جاڭا تاۋارلار شىعارىپ, ىشكى نارىقتى تولتىرىپ تاستاۋعا تىرىسۋى قاجەت.
دەگەنمەن مامان بۇل سالادا ءالى دە ءبىراز تۇيتكىل بار ەكەنىن جاسىرمايدى. ماسەلەن, جەمقورلىق, اكىمشىلىك كەدەرگىلەر ءالى دە بيزنەستىڭ اياعىنا تۇساۋ بولىپ تۇر. سونىمەن بىرگە ەلىمىزدىڭ ىشكى نارىعىن سىرتقى تاۋارلاردان قورعاۋ جاعى كەمشىن سوعىپ جاتقان سەكىلدى. سونىڭ كەسىرىنەن كوبىنە جەرگىلىكتى ءونىم وندىرۋشىلەر جاپا شەگىپ وتىر.
دەي تۇرعانمەن, پرەزيدەنت جولداۋىندا ىشكى نارىقتى قورعاۋ جونىندە ايتىلدى. وسىعان وراي ۇلتتىق ەكونوميكانى دامىتۋ ماسەلەسىندە وڭ وزگەرىس بولار دەگەن سەنىم مول. سونىڭ ءبىر مىسالىن جوعارىدا ءسوز بولعان ماڭىزدى كەزدەسۋدەن دە كورۋگە بولادى.
شىمكەنت
