شاڭعى جولى جاستارعا تەگىن جاتتىعۋعا بەرىلدى

الاتاۋدىڭ باۋرايىندا ەن بايلىق پەن يگىلىك جاتىر.  ەبىن تاپسا, تابيعاتتىڭ تالاي سىيىن ەل يگىلىگىنە قىزمەت ەتكىزۋگە بولادى.  سونىڭ ءبىرى – «سۇڭقار» حالىق­ارا­لىق شاڭعى ترامپليندەرى كەشەنىنىڭ اۋماعى بولاتىن. مۇنان بىلايعى جەردە وسىناۋ سپورتتىق ينفراقۇرىلىم حالىققا قىزمەت ەتەتىن بولادى. ەندى شاھارداعى اتالمىش شاڭعى جولى الماتىلىقتاردىڭ يگىلىگى ءۇشىن جۇمىس ىستەيدى. بۇل تۋرالى الماتى اكىمىنىڭ كەڭەسشىسى پاۆەل نوۆيكوۆ جاڭا نىساننىڭ تۇساۋكەسەر بريفينگىندە ونىڭ الەۋمەتتىك باعىتقا يە ەكەندىگىن اتاپ ءوتتى. سپورتتىڭ شاڭعى تۇرلەرىن وسكەلەڭ ۇرپاق اراسىندا كەڭىنەن ناسيحاتتاۋعا جەتە ءمان بەرىلۋدە. مىسالى, جاڭا نىساندى كاسىبي سپورتشىلارمەن قاتار بالالار دا تەگىن پايدالانا الادى. الماتى اكىمى احمەتجان ەسىموۆتىڭ تىكەلەي باس­تاماسى ءارى تاپسىرماسى بويىنشا جوعارى وقۋ ورىندارى ستۋدەنتتەرىنىڭ دەنەشىنىقتىرۋ جانە سپورت جونىندەگى جوسپارلى ساباقتارى شاڭعى تراسساسىنىڭ بازاسىندا وتەتىن بولادى. تەحنيكالىق جاعىنان كۇردەلى بۇل سپورت­تىق نىساننىڭ باستى ەرەك­­شە­لىگى – قالانىڭ تۋرا ورتالىعىندا ورنا­لاس­قان­دىعىندا ءارى ينفراقۇرىلىمى جايلى, قولجەتىمدى. شاڭعى تراسساسىنىڭ ترامپلين جانىنا سالىنۋىنىڭ ءوزى ونىڭ سالماعىن اسىرىپ وتىر. جوعارىدا اتالعان فاكتورلارعا وراي حالىقارالىق ساراپشىلار قوعامداستىعى وعان الەمدىك رەيتينگتە ءۇش ۇزدىكتىڭ ءبىرى دەگەن ءادىل باعاسىن بەردى. اتاپ وتەرلىك جايت, كەزىندە بوس جاتقان جەرگە (قوقىس تاستالاتىن الاڭقاي) قازىرگى زامانعى قۇرىلىس ماتەريالدارىن پايدالانا وتىرىپ, جاڭا نىسان سالۋ مەگاپوليس بيۋدجەتىنە ارزانعا ءتۇستى. اۋقىمدى قۇرىلىس 2014 جىلدىڭ كوكتەمىندە باستالدى. كەشەندە 60 ءمودۋلدى ورىن, ستاندارتتى ستاديون, 600 كورەرمەندىك تريبۋنا, قازىلار كابينالارى بار. شاڭعى جولىنىڭ جالپى ۇزىندىعى – 7,5 شاقىرىم, سولتۇستىك بولىگى – 5 شاقىرىم, وڭتۇستىگى – 2,5 شاقىرىم. قۇرىلىس 2015 جىلى تولىق اياقتالادى, اباتتاندىرۋ, جارىقتاندىرۋ جۇمىستارى قولعا الىنادى. ايناش ەسالي, «ەگەمەن قازاقستان». الماتى. سۋرەتتەردى تۇسىرگەن داۋرەن يساەۆ.