كاسىپكەرلەر مەن ساراپشىلاردىڭ دا پىكىرى وسىنداي. شىمكەنتتەگى Danico بالالار كيىمى تسەحىنىڭ وكىلدەرى جاستاردى جۇمىسشى ماماندىعىن مەڭگەرۋگە شاقىرادى. ولاردىڭ ايتۋىنشا, جالپى نارىقتا, ونىڭ ىشىندە جەڭىل ونەركاسىپتە ماماندار تاپشىلىعى بايقالىپ وتىر.
«پرەزيدەنتتىڭ 2025 جىلدى جۇمىسشى ماماندىقتار جىلى دەپ جاريالاعانى وسى سالانىڭ دامۋىنا سەرپىن بەرەدى دەپ سەنەمىز. مەملەكەت تاراپىنان قولداۋ كورسەتىلسە, اسىرەسە, جۇمىسشى ماماندىعىنىڭ ەڭبەگى ناسيحاتتالسا, جاستار وسىنداي ماماندىققا كوپتەپ كەلەر ەدى دەپ سەنەمىز. سەبەبى, ءبىزدىڭ تسەحتىڭ وزىنە مىقتى ماماندارعا دەگەن قاجەتتىلىك تۋىنداپ جاتىر. تىگىنشى-ءپىشۋشى دەگەن ماماندىق بار. ونى يگەرۋ ءۇشىن ادام سول سالاعا قىزىعۋ كەرەك. جالپى تىگىن تسەحىندا جۇمىس كوپ, بىزدەگى تاپسىرىستى ورىنداۋعا شەبەرلەر جەتىسپەيدى. بۇل كاسىپتە ءناسىبىڭدى تابۋ قيىن ەمەس. اسىرەسە, قىز بالالارىنا ارنالعان ناعىز كاسىپ», دەيدى قۇراستىرۋشى تەحنولوگ زاۋرە اليەۆا.
بۇل تىگىن تسەحى 2020 جىلى اشىلعان. جاڭا تۋعان نارەستەلەردەن باستاپ 3 جاسقا دەيىنگى بالالارعا ارنالعان كيىمدەر, توسەك جابدىقتارى تىگىلەدى. وندىرىستە 100 پايىز ماقتا ماتالارى قولدانىلادى. كاسىپكەر ءوز ءىسىن باستاماس بۇرىن بۇل سالانى جاقسىلاپ زەرتتەپ العانىن ايتادى.
«بۇل سالادا سۇرانىس كوپ ەكەنىن بايقادىق. سەبەبى, بالالار تەز وسەدى, تەز كيىم اۋىستىرادى, اتا-انالارىنا ۇنەمى جاڭادان كيىم الۋ قاجەت بولادى. ەلىمىزدىڭ پاتريوتى بولعاندىقتان, وتاندىق تاۋارلارىمىز كوبەيسىن دەگەن ويمەن وسىنداي كاسىپتى اشتىق. ايىنا 12 مىڭ دانا ءونىم دايىنداپ شىعارامىز. قازىرگى تاڭدا تسەحىمىزدا 23 ادام جۇمىس ىستەيدى. جۇمىسشىلار تابۋدا شىمكەنت قالالىق كاسىپكەرلەر پالاتاسىنىڭ كومەگى كوپ. 2023- 2024 جىلدارى ەكى جىل قاتارىنان تسەحىمىزدا 3 ايلىق كۋرس وتكىزدىك. سودان جالپى سانى 50 شاكىرت وقىپ شىقتى. ولار تىگىن سالاسىنىڭ تەورياسىمەن قاتار تاجىريبەسىن دە مەڭگەرىپ, اراسىنان 10 ادام, مىنە, بۇگىندە ءبىزدىڭ تسەحتا جۇمىس ىستەپ كەلەدى», دەيدى كاسىپكەر نۇركەن وتەگەنوۆ.
جاۋاپتى ماماندار جۇمىسشى ماماندىقتار جىلىندا ءبىلىم بەرۋ جۇيەسى مەن مامانداردىڭ بىلىكتىلىگىن ارتتىرۋعا جاڭا مۇمكىندىكتەر اشادى دەگەن پىكىردە.
«قازىرگى تاڭدا وڭىرىمىزدەگى 400-دەن استام كاسىپورىن دۋالدى وقىتۋ جۇيەسىنە قاتىسۋدا. جالپى سانى 24 كوللەدجە 8 مىڭعا جۋىق شاكىرت 25 سالا مەن 75 ماماندىق بويىنشا وسى جۇيەمەن قامتىلعان. وسىنىڭ ناتيجەسىندە ستۋدەنتتەر ءوز ماماندىعىنىڭ تەورياسىن عانا ەمەس, پراكتيكالىق بىلىكتىلىكتەرىن دە ۇيرەنىپ, كاسىپورىنداردا ءىس-تاجىريبەدەن ءوتىپ جاتىر. جالپى, كاسىپكەرلەر پالاتاسى مەن قالامىزداعى ءبىلىم بەرۋ ۇيىمدارى بىلىكتى ماماندار ازىرلەپ, ەكونوميكانىڭ بارلىق سالاسىن دامىتۋعا نەگىز بولاتىن مىقتى ءارى تۇراقتى جۇيە قۇرۋ باعىتىنداعى جۇمىستى جالعاستىرا تۇسەدى», دەدى شىمكەنت قالاسى كاسىپكەرلەر پالاتاسى ديرەكتورىنىڭ ورىنباسارى ماقسات وتكەلباەۆ.
ايتا كەتەيىك, 2014 جىلدان باستاپ «اتامەكەن» ۇلتتىق كاسىپكەرلەر پالاتاسى جىل سايىن وڭىرلەردەگى كاسىپورىندارداعى ماماندار قاجەتتىلىگىنە مونيتورينگ جۇرگىزەدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ enbek.kz پلاتفورماسىنداعى بۇل مونيتورينگ ەڭبەك نارىعىنىڭ قاجەتتىلىگىن ناقتى انىقتاۋعا جانە تەحنيكالىق جانە كاسىبي وقىتۋ بويىنشا مەملەكەتتىك تاپسىرىستى قالىپتاستىرۋعا كومەكتەسەدى. ناتيجەسىندە ءبىلىم بەرۋ ۇيىمدارى مەن وقۋ ورتالىقتارى ءوز باعدارلامالارىن كاسىپورىنداردىڭ سۇرانىسىنا وراي بەيىمدەپ, مامان دايىنداۋدىڭ ساپاسى ارتا تۇسەدى.
