سۋرەت: baq.kz
ديپلوماتيالىق قاتىناستاردىڭ ورناعانىنا 33 جىل تولۋىن اتاپ وتكەن كەزدەسۋدە قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو مەن ۇلىبريتانيا سىرتقى ىستەر مينيسترلىگىنىڭ مەملەكەتتىك ءمينيسترى ستيۆەن داۋتي توراعالىق ەتتى.
ديالوگ بارىسىندا دەلەگاتسيالار ساياسات, ەكونوميكا, ينۆەستيتسيالار, ەنەرگەتيكا, ەكولوگيا, مادەنيەت, ءبىلىم جانە قاۋىپسىزدىك سالالارىنداعى ءوزارا ءىس-قيمىل ماسەلەلەرىن تالقىلادى. سونداي-اق وتكەن جىلدىڭ ءساۋىر ايىندا قول قويىلعان قازاقستان مەن ۇلىبريتانيا اراسىنداعى ستراتەگيالىق ارىپتەستىك جانە ىنتىماقتاستىق تۋرالى كەلىسىمدى راتيفيكاتسيالاۋ بارىسى قارالدى. تاراپتار وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
ر.ۆاسيلەنكو ەكى ەلدىڭ سىرتقى ساياسي ۆەدومستۆولارى اراسىنداعى جوعارى دەڭگەيدەگى ساياسي ديالوگ پەن ءتيىمدى بايلانىستاردى قۇپتاپ, ولاردىڭ كوپجاقتى ىنتىماقتاستىقتى تەرەڭدەتۋگە ىقپال ەتەتىنىن اتاپ ءوتتى.
«2024 جىلى وتكىزىلگەن ءىس-شارالار, سونىڭ ىشىندە قازاقستان پرەزيدەنتى قاسىم-جومارت توقاەۆتىڭ ۇلىبريتانيا پرەمەر-ءمينيسترى كير ستارمەرمەن باكۋدە وتكەن COP29 كليماتتىق كونفەرەنتسياسى اياسىنداعى كەزدەسۋىنىڭ ەكىجاقتى ىنتىماقتاستىقتى جانداندىرۋعا جانە نىعايتۋعا دەگەن ءوزارا ۇمتىلىستى كورسەتتى. وسىعان بايلانىستى ستراتەگيالىق ديالوگ اياسىندا ساۋدا-ينۆەستيتسيالىق سەرىكتەستىكتى كەڭەيتۋ, ىسكەرلىك بايلانىستاردى نىعايتۋ جانە مادەني-گۋمانيتارلىق ىنتىماقتاستىقتى دامىتۋعا ەرەكشە كوڭىل ءبولىندى», دەدى ۆيتسە-مينيستر.
ۇلىبريتانيا – قازاقستان ەكونوميكاسىنا مول قارجى قۇياتىن 10 ءىرى ينۆەستوردىڭ قاتارىندا. ەل ەكونوميكاسىنا سالىنعان ينۆەستيتسيا كولەمى 18 ملرد دوللاردان اسادى. قازاقستاندا بريتاندىقتاردىڭ قاتىسۋىمەن 550-گە جۋىق كومپانيا جۇمىس ىستەيدى.
ال قازاقستان – ۇلىبريتانيا ستراتەگيالىق ديالوگى – ەكىجاقتى ىنتىماقتاستىقتىڭ ينستيتۋتسيونالدىق تەتىكتەرىنىڭ ءبىرى. 2013 جىلدان بەرى وتكىزىلىپ كەلە جاتقان بۇل كەزدەسۋلەر ەكىجاقتى قارىم-قاتىناستىڭ نەگىزگى باعىتتارىن قاراستىرۋ, وڭىرلىك جانە حالىقارالىق ماسەلەلەر بويىنشا پىكىر الماسۋ ءۇشىن ءتيىمدى الاڭ قىزمەتىن اتقارىپ كەلەدى.
بۇل جولعى كەزدەسۋدىڭ ماڭىزدى قورىتىندىسى قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى مەن ۇلىبريتانيانىڭ GLAA اگەنتتىگى اراسىندا ىنتىماقتاستىق تۋرالى مەموراندۋمعا قول قويىلۋى بولدى. ويتكەنى قۇجات ۇلىبريتانيادا ۋاقىتشا جۇمىس ىستەيتىن قازاقستان ازاماتتارىنىڭ ەڭبەك قۇقىن قورعاۋ, سونداي-اق اقپارات, تاجىريبە جانە ەڭبەك قۇقىن قورعاۋ سالاسىنداعى وزىق تاجىريبەلەرمەن الماسۋ ماقساتىندا ەكى ەلدىڭ ءتيىستى ۆەدومستۆولارى اراسىنداعى ىنتىماقتاستىقتى نىعايتۋعا باعىتتالعان.
لوندونعا ساپارى اياسىندا ر.ۆاسيلەنكو ۇلىبريتانيا پارلامەنتى قاۋىمدار پالاتاسى توراعاسىنىڭ ءبىرىنشى ورىنباسارى نۋسرات گانيمەن كەزدەسىپ, ەكى ەل اراسىنداعى پارلامەنتارالىق ديالوگتى دامىتۋ كەلەشەگىن تالقىلادى. سونداي-اق ول حالىقارالىق ستراتەگيالىق زەرتتەۋلەر ينستيتۋتى سياقتى بريتاندىق ساراپتامالىق قاۋىمداستىق وكىلدەرىمەن بىرقاتار جۇمىس كەزدەسۋىن وتكىزدى.
