افريكانى اۋىزسۋمەن جارىلقادى

قۇدىق قازۋ جۇمىسى بىلتىر جەلتوقسان ايىندا باستالعان. ونى مەردىگەر ۇيىم ءۇش اپتادا اياقتاپ, بۇرىن وزەن سۋىن ءىشىپ كەلگەن مازاكي تۇرعىندارىن ءبىر جارىلقادى.

– قاتارىمىزدا مىڭنان اسا وبلىس جاستارى بار. باستاپقىدا بۇل جوبانى ىسكە اسىرۋ مۇمكىن ەمەستەي كورىنگەن. قازاقتا «نارتاۋەكەل!» دەگەن اتالى ءسوز بار.  الدى­مەن قاجەتتى قۇجاتتاردى ازىرلەپ, جان-جاقتان قا­راجات جيناي باستادىق. قازان ايىندا ءبىر مەردىگەر كومپانيامەن كەلىسىپ, اقىسىن تولەدىك. جۇمىس ءتورت ايدا ءساتتى اياقتالعان سوڭ, قايىرىمدىلىقتا شەكارا جوق ەكەنىن تاعى ءبىر مارتە ۇعىندىق, – دەدى «جاستار سەمەي» قوعامدىق قورىنىڭ ديرەكتورى جانىبەك قابدۋللين.

مۇنداي يگى ىستە اتىراۋلىق جاستار دا بوي كورسەتتى. اتىراۋ وبلىسى ماقات اۋدانىنىڭ جىگىتتەرى كامەرۋن مەملەكەتىنە قاراستى اۋىلداعى قۇدىق قۇرىلىسىنىڭ اقىسىن تولەپ بەردى. وتاندىق كاسىپكەر ەلدوس ايبەكوۆ تە افريكا قۇرلىعىنداعى تىرشىلىك نارىنە مۇقتاج جاندارعا جاردەمدەسكەن. قۇدىق ۋگاندا مەملەكەتىندەگى نانوكو ەلدى مەكەنىندە ورنالاسقان.

«افريكانىڭ اۋىزسۋدى قاجەت ەتكەن اۋماقتارىن ۇزاق زەردەلەدىم. ارينە, قۇدىق قازۋ ءۇشىن جەرگىلىكتى وكىلدەرمەن دە كەلىسۋ قاجەت. ويلانا كەلە ۋگاندا جانە كەنيادان سالۋدى جوسپارلادىق. ەكى ەلدىڭ الەۋمەتتىك احۋالىن نازارعا الدىق. سالىستىرساق, ۋگاندانىڭ جالپى ىشكى ءونىمى كەنيادان ءۇش ەسە تومەن. سونىمەن, كوپپەن بىرگە وسى مەملەكەتتىڭ حالقىنا قۇدىق قازۋعا شەشىم قابىلدادىق. قولدانىسقا بەرىلگەننەن كەيىن قوسىمشا سىيلىق رەتىندە بالالارعا ارنايى مەكتەپ قۇرالدارىن تابىستادىق. تۇرعىنداردىڭ جۇزىندەگى قۋانىش ەرەكشە اسەرگە بولەدى», دەدى ول.

جالپى وتانداستارىمىز شەكارا اۋماعىندا, ونىڭ سىرت ايماعىندا دا قايىرىمدىلىق ىستە ءبىر جەڭنەن قول, ءبىر جاعادان باس شىعارۋعا بەيىم. سودان بولار, ەلدە 755 ۆولون­تەرلىك ۇيىم, 2 مىڭ باستاماشىل توپ جانە 275 مىڭ بەلسەندى ۆولونتەر جۇمىس ىستەيدى. ءتىپتى ولاردىڭ اراسىندا 3,5 مىڭ «كۇمىس» ۆولونتەر, ياعني 55 جاستان اسقان ەرىكتىلەر بار.

جۋىردا مادەنيەت جانە اقپارات مينيسترىلىگى ۇلتتىق ۆولونتەرلەر فرونت-وفيسىمەن بىرلەسىپ, رەسپۋبليكا كولەمىندە «يگى ءىستى ءبولىس» فلەشموبىن باستادى. ناۋقان مۇقتاج جاندارعا وتەۋسىز كومەك كورسەتۋ ارقىلى قايىرىمدىلىق پەن ۆولونتەرلىك قىزمەتتى دامىتۋدى كوزدەيدى. العاشقى اپتادا-اق 300-دەن اسا قايىرىمدىلىق ءىس-شارا ۇيىمداستىرىلىپ, الەۋمەتتىك جەلىلەرگە جاريالاندى.

وتكەن جىلدىڭ وزىندە بۇعان ۇقساس «يگى ىستەر مارافونى» جوباسى اياسىندا 7 مىڭ يگى ءىس جاسالىپ, وعان 50 مىڭعا جۋىق ادام قاتىسقان ەدى.