فوتو: عىلىم جانە جوعارى ءبىلىم ميمنيسترلىگى
اتالعان تاپسىرمانى جۇزەگە اسىرۋ اياسىندا عىلىم جانە جوعارى ءبىلىم مينيسترلىگى اقپاراتتىق جۇيەلەر جانە جاساندى ينتەللەكت ينستيتۋتىن (ISSAI), عىلىمي ينستيتۋتتار مەن جوعارى وقۋ ورىندارىن تارتا وتىرىپ KazLLM ۇلتتىق ءتىل مودەلىنە قاجەتتى قازاق ءتىلىنىڭ كورپۋسىن قامتاماسىز ەتۋ جۇمىسىن جۇرگىزدى.
اتالعان شارا قازاق تىلىندەگى ماتىندىك اقپاراتتى وڭدەۋ, اۋدارۋ, تالداۋ جانە قازاق ءتىلىن زاماناۋي تەحنولوگيالارعا كىرىكتىرۋگە قاجەتتى ءتيىمدى شەشىمدەر جاساۋعا باعىتتالعان. جاھاندانۋ جانە ەلدىڭ مادەني بىرەگەيلىگىن ساقتاۋ جاعدايىندا جوبانىڭ ماڭىزدىلىعى ءتىپتى ارتىپ وتىر.
اتالعان مينيسترلىكتىڭ ءباسپاسوز قىزمەتىنىڭ مالىمدەۋىنشە KazLLM-گە قاجەتتى قازاق تىلىندەگى كورپۋستى ازىرلەۋگە اتسالىسقان ەلىمىزدىڭ 26 جەتەكشى ينستيتۋتتارىنىڭ, جوعارى وقۋ ورىندارىنىڭ 140-تان اسا عالىمدارى مەن قىزمەتكەرلەرى ەكونوميكا, قارجىلاندىرۋ, ماتەماتيكا, تاريح, بيولوگيا, حيميا, مەديتسينا, تەحنولوگيا جانە تاعى دا باسقا 115 سالا بويىنشا ۇلكەن كولەمدەگى دەرەكتەردى دايىنداۋمەن اينالىسقان. ماسەلەن ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا, ەتيكا, PR, استرونوميا, استروفيزيكا, اقپاراتتىق تەحنولوگيا سالالارى بويىنشا دەرەكتەردى دايىنداۋمەن, ماتەماتيكا جانە ماتەماتيكالىق مودەلدەۋ ينستيتۋتى ماتەماتيكا سالاسى بويىنشا, ش.ءۋاليحانوۆ اتىنداعى تاريح جانە ەتنولوگيا ينستيتۋتى تاريح سالاسى بويىنشا, مەديتسينالىق ۋنيۆەرسيتەتتەر مەديتسينا سالاسى بويىنشا دەرەكتەردى دايىنداعان. عىلىم جانە جوعارى ءبىلىم مەكەمەلەرىمەن بۇل ىنتىماقتاستىق مودەلدىڭ ساپالى ءارى ءتيىمدى ازىرلەنۋىن قامتاماسىز ەتەتىن قازاق تىلىندەگى بىرەگەي كونتەنتتىڭ قۇرىلۋىنا ىقپال ەتكەن.
بۇگىنگى كۇنى KazLLM-ءنىڭ اشىق باستاپقى كودى بار نۇسقاسى https://huggingface.co/issai پلاتفورماسىندا قولجەتىمدى.
تسيفرلىق ينفراقۇرىلىمنىڭ ماڭىزدى بولىگى بولىپ تابىلاتىن اتالعان مودەل كوممەرتسيالىق ەمەس عىلىمي جانە اكادەميالىق ماقساتتاردا, سونداي-اق چات-بوتتار, ۆيرتۋالدى كومەكشىلەر, Google Translate-كە ۇقساس اۆتوماتتى اۋدارماشىلاردى ازىرلەۋدە قولدانىلاتىن بولادى.
