قوستانايدا جاڭا تەحنولوگيالارى كورمەسى ءوتتى

قوستاناي. 7 قاڭتار. قوستانايدا ەنەرگيا ۇنەمدەۋ سالاسىنداعى جاڭا تەحنولوگيالار كورمەسى ءوتتى. وندا جەرگىلىكتى كومپانيالارمەن قاتار, قازاقستاننىڭ وزگە قالالارىنان, رەسەيدەن كەلگەن كاسىپورىندار شارۋاشىلىقتىڭ ءتۇرلى سالالارىندا قولدانۋعا بولاتىن ونىمدەرىن كوپشىلىك نازارىنا ۇسىندى. بۇل تۋرالى alau.kz حابارلادى. قازىر ەنەرگيا ۇنەمدەۋ – ەلىمىزدەگى ستراتەگيالىق ماڭىزى بار مىندەتتەردىڭ ءبىرى. سوندىقتان, مۇنداي كورمەنىڭ بەرەرى كوپ ەكەنى ءسوزسىز. ۇسىنىلعان ونىمدەردى كورۋ ءۇشىن كورمەگە كاسىپكەرلەر مەن كوممۋنالدىق كاسىپورىندار باسشىلارى كەلدى. كوپشىلىك نازارىن اۋدارعان ونىمدەر از بولعان جوق. مىسالى قاراعاندىداعى «ISO PLUS تسەنترالنايا ازيا» كومپانياسىنىڭ جىلۋ بولەتىن يننوۆاتسيالىق قۇبىرىن قىزىقتاعاندار كوپ بولدى. ول ۇزاق مەرزىمگە جىلۋ ساقتايدى, سوندىقتان ەنەرگيا دا ۇنەمدەلەدى. قوستانايداعى «كازگەوبەل -1» كومپانياسى قازاقستاندا ينفراقۇرىلىمدى دامىتۋعا بەلسەنە قاتىسىپ ءجۇر. ولار ەنەرگيانى ءتيىمدى پايدالانۋ باعىتىنداعى يننوۆاتسيالىق ءونىمىن كورسەتتى. ونىڭ ءونىمىن باتىس ەۋروپا – باتىس قىتاي باعىتىنداعى جول قۇرىلىسىنا الادى. كومپانيا مەنەدجەرىنىڭ ايتۋىنا قاراعاندا, ساراپشىلار بەكىتكەندەي, ولار شىعارعان گەوسينتەتيكا ءونىمىن پايدالانعان جولدار ادەتتەگىدەن 2 ەسە بەرىكتىك تانىتادى. قوستاناي وبلىسىنداعى تۇرعىن ءۇي-كوممۋنالدىق شارۋاشىىلعىندا ەنەرگيا ۇنەمدەۋ تەحنولوگياسى بىرنەشە جىلدان بەرى ەنگىزىلىپ كەلەدى. بۇل جونىنەن ليساكوۆ قالاسى كوش باستايدى. مۇندا بىرنەشە «اقىلدى ءۇي», «اقىلدى مەكتەپ» جوبالارى جۇزەگە اسقان. «ليساكوۆسكگوركوممۋنوەنەرگو» كاسىپورنىنىڭ ديرەكتورى: «ەنەرگيا ۇنەمدەۋ تەحنولوگياسىنىڭ تيىمدىلىگى بىردەن-اق بىلىنەدى, بىراق ونىڭ ءوزىن ءوزى اقتاۋىنا كەمىندە بەس جىل ۋاقىت كەرەك», دەدى. ءنازيرا جارىمبەتوۆا. دەرەك, سۋرەت: alau.kz.