كەشە ۇكىمەتتىڭ ەكونوميكالىق بلوگىنىڭ دەلەگاتسياسىن الماتىعا باستاپ كەلگەن پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ەلدەگى بيزنەس نىساندارىنىڭ 65 پايىزى الماتىدا ەكەنىن, وسى ماسەلەگە قاتىستى قوعامدىق پىكىر دە الماتىعا قاراپ كوش تۇزەيتىنىن ايتتى.
سونداي-اق كەزدەسۋگە قارجى ءمينيسترى ءمادي تاكيەۆ, ۇلتتىق ەكونوميكا ۆيتسە-ءمينيسترى ازامات ءامىرين, «اتامەكەن» ۇكپ باسقارما توراعاسى رايىمبەك باتالوۆ, جەڭىل ونەركاسىپ قاۋىمداستىعى, تۋريستىك كومپانيالار مەن باسقا دا سالالىق بيزنەس بىرلەستىكتەرى, 50-دەن اسا ءىرى جانە شاعىن بيزنەس وكىلدەرى تاۋەلسىز ساراپشىلار قاتىستى. كەزدەسۋدە ققس بويىنشا تىركەۋ شەگىن 15 ملن تەڭگەگە دەيىن تومەندەتۋ جانە ارنايى B2C رەجىمدەگى قىزمەت تۇرلەرىنىڭ اياسىن تارىلتۋ كاسىپكەرلەردىڭ كوتەرگەن نەگىزگى ماسەلەلەرى بولدى. سالىق تولەۋشىلەردى تىركەۋ ءۇشىن رەفورما شەڭبەرىندە بەلگىلەنگەن شەك شاعىن بيزنەستىڭ ودان ءارى جۇمىس ىستەۋىنە كەدەرگى بولۋى مۇمكىن جانە كاسىپكەرلەر سالىق سالۋدى بولدىرماۋ ءۇشىن ءوز كاسىپورىندارىن بولشەكتەۋگە نەمەسە ءوز قىزمەتىنىڭ ءبىر بولىگىن جاسىرۋعا ءماجبۇر بولادى.
«جىل سايىن مەملەكەت ققس بويىنشا ەسەپكە قويۋدىڭ جوعارى شەگىنە بايلانىستى بيزنەستى بولشەكتەۋدەن شامامەن 800 ملرد تەڭگە تابىس سالىعىن جوعالتادى. ءىس جۇزىندە بىزدە ورتا بيزنەس بار, بىراق زاڭ جۇزىندە جوق. بۇل تەتىكتەردى ەنگىزۋ – ققس بويىنشا ەسەپكە قويۋ شەگىن تومەندەتۋ ءارى جەڭىلدەتىلگەن ارنايى رەجىم تەك B2C – بۇل كاسىپكەرلىككە قارسى كۇرەس ەمەس, كولەڭكەلى ەكونوميكاعا قارسى كۇرەس. سالىق تولەيتىن ادام تولەمەيتىندەرمەن ادال باسەكەلەسە المايدى. ال ءادىل سالىق سالۋعا ۇمتىلۋدا بيزنەستى جاپپاي قولداۋسىز مەملەكەتتىك ورگاندار كولەڭكەلى ەكونوميكامەن تولىققاندى كۇرەسە المايدى», دەپ اتاپ ءوتتى ا.ءامىرين.
ەڭبەكاقى تولەۋ قورىنا جۇكتەمەنى ازايتۋ بويىنشا ساۋالدارعا دا جاۋاپ بەرىلدى. كاسىپكەرلەردىڭ الەۋمەتتىك سالىقتى جانە مىندەتتى زەينەتاقى جارنالارىن تولەۋدى جويۋ بولىگىندە بۇرىن ۇسىنىلعان رەفورما ققس مولشەرلەمەسى 20%-عا دەيىن كوتەرىلگەن جاعدايدا جۇرگىزىلۋى مۇمكىن ەكەنە اتاپ ءوتىلدى. وندا مەملەكەت جۇمىس بەرۋشىنىڭ ورنىنا الەۋمەتتىك اۋدارىمداردى جابۋعا كىرىس الادى. بىراق قازىرگى ۋاقىتتا ۇسىنىلىپ وتىرعان 16% ققس مولشەرلەمەسىمەن الەۋمەتتىك اۋدارىمداردى وزگەرىسسىز قالدىرۋ ۇسىنىلادى.
كەزدەسۋدە سپورت كلۋبتارى, اقپاراتتىق قاۋىپسىزدىك, مەديتسينا, جەڭىل ونەركاسىپ, تۋريزم جانە باسقا دا سالالار بويىنشا بيزنەس وكىلدەرى ءسوز سويلەدى. كەزدەسۋ قورىتىندىسى بويىنشا س.جۇمانعارين قاتىسۋشىلارعا سىندارلى ديالوگ ءۇشىن العىس ءبىلدىرىپ, بارلىق ۇسىنىس سالىق رەفورماسى جوباسىن ءماجىلىستىڭ قاراۋىنا شىعارار الدىندا ۇكىمەتتەگى جۇمىس توپتارىندا قارالاتىنىن اتاپ ءوتتى.
الماتى
